Juezob 2 - Chol: I T’an Dios

I yAngel lac Yum ti Boquim

¹ I yAngel lac Yum tsa' loq'ui ti Gilgal. Tsa' letsi majlel ti Boquim. Tsi' yʌlʌ: Joñon tsac loc'sayet ti Egipto. Tsa cotsayet ti jini lum che' bajche' tsac sube a ñojte'elob. Wersa mi' ts'ʌctesan jini t'an tsa' bʌ c mele la' wic'ot.

² Pero mach yomic mi la' laj la' t'an yic'ot chumulo' bʌ ti ili lum. Jembenla i yajñib i dioste', cho'on. Pero jatetla ma'anic tsa' la' jac'ʌ c t'an. ¿Chucoch tsa' la' cha'le bajche' iliyi?

³ Jini cha'an, ma'anic mi caj c choc loq'uel ti la' tojlel jini tejclum tac. Muq'uix i yajñel che' bajche' asiyal ti la' tojlel. Jini i diosob mi caj i yʌq'ueñetla cabʌl la' wocol. Che' tsi' yʌlʌ i yAngel lac Yum.

⁴ Che' bʌ tsi' yʌlʌ ili t'an i yAngel lac Yum ti' tojlel i yalobilob israel, c'am tsi' cha'le t'an jini tejclum. Tsa' uq'uiyob.

⁵ Jini cha'an tsi' yotsʌbeyob i c'aba' ili lum Boquim. Ya'i tsi' pulbeyob i majtan lac Yum.

Tsa' chʌmi Josué

⁶ Che' bʌ Josué tsi' subeyob sujtel jini soldadojob, israelob tsa' majli i ch'ʌmob i lum ti jujuntiquil.

⁷ Jini winicob x'ixicob tsi' ch'ujutesayob lac Yum che' cuxul to Josué yic'ot jini ñoxo' bʌ tsa' bʌ ajniyob yic'ot Josué. Tsi' q'ueleyob pejtelel jini ñuc bʌ i ye'tel lac Yum tsa' bʌ i mele ti' tojlel Israel.

⁸ Tsa' chʌmi Josué che' anix lujump'ejl i wʌcc'al (110) i jabilel. Josué (i yalobil Nun) jiñʌch x'e'tel i cha'an lac Yum.

⁹ Tsi' mucuyob Josué ya' ti lum i c'aba' Timnatsera am bʌ ti wits i c'aba' Efraín. An ti' tojel jini wits i c'aba' Gaas ya' ti norte.

¹⁰ Tsa' chʌmiyob pejtelel jini winicob x'ixicob año' bʌ ti jini ora. Ti wi'il tsa' p'ojliyob yaño' bʌ mach bʌ cʌñʌlobic i cha'an lac Yum. Ma'anic tsi' cʌñʌyob i ye'tel lac Yum tsa' bʌ i mele ti' tojlel israelob.

Jini israelob tsi' cʌyʌyob Dios

¹¹ Jini israelob tsi' cha'leyob jontolil ti' tojlel lac Yum. Tsa' caji i ch'ujutesañob jini dios Baal.

¹² Tsi' cʌyʌyob lac Yum, i Dios i ñojte'elob tsa' bʌ i loc'sayob ti' lumal Egipto. Tsi' tsajcayob majlel dios tac i cha'an yambʌ tejclumob am bʌ ti' joytilel. Tsi' ch'ujutesayob. Tsi' techbeyob i mich'ajel lac Yum.

¹³ Tsi' cʌyʌyob lac Yum. Tsa' caji i ch'ujutesañob Baal yic'ot Astarot.

¹⁴ Tsa' tili i mich'ajel lac Yum ti' contra Israel. Tsi' yʌc'ʌyob ti' c'ʌb xujch'ob tsa' bʌ i chilbeyob i chubʌ'an. Tsi' choñoyob ti' c'ʌb i contrajob año' bʌ ti' joytilel. Ma'anic tsa' mejliyob ti leto yic'otob i contra.

¹⁵ Baqui jach tsa' majliyob, lac Yum tsa' ajni ti' contra cha'an mi' yubiñob wocol, come che'ʌch tsi' yʌlʌ lac Yum. Cabʌl tsi' yubiyob wocol che' bajche' tsi' wʌn alʌ lac Yum.

¹⁶ Lac Yum tsi' yʌq'ueyob juezob tsa' bʌ i coltayob loq'uel ti' c'ʌb i contrajob.

¹⁷ Pero ma'anic tsi' jac'beyob i yaj coltayajob ja'el. Tsi' tsajcayob dios tac. Tsi' ch'ujutesayob. Tsi' bʌc' cʌyʌyob jini bij tsa' bʌ i xʌñʌyob majlel i ñojte'elob tsa' bʌ i jac'beyob i mandar lac Yum. Ma'anic tsi' jac'beyob lac Yum.

¹⁸ Che' bʌ lac Yum tsi' choco tilel juez, tsi' coltayob che' cuxul to jini juez. Lac Yum tsi' p'unta jini winicob x'ixicob, come tsi' yubibeyob i yajcʌn che' bʌ tsa' tic'lʌntiyob cha'an jontolo' bʌ. Lac Yum tsi' coltayob che' cuxul to jini juez.

¹⁹ Che' bʌ tsa' chʌmi jini juez, tsa' caji i cha' melob ñaxan bʌ i melbal. Ñumen leco tsi' cha'leyob bajche' i ñojte'elob. Tsi' tsajcayob yan tac bʌ dios. Tsi' ñocchocoyob i bʌ ti' tojlel. Ma'anic tsi' cʌyʌyob jontol bʌ i melbalob. Mach yomobic i cʌy jini bij woli bʌ i tsajcañob.

²⁰ Tsa' lejmi i mich'ajel lac Yum ti' contra Israel. Tsi' yʌlʌ: Ili tejclum tsi' ñusa jini xuc'ul bʌ t'an tsa' bʌ c mele yic'ot i ñojte'elob. Ma'anic mi' jac'beñoñob c t'an.

²¹ Jini cha'an ma'anix mi caj c choc loq'uel jini yan tac bʌ tejclum tsa' bʌ cʌle che' bʌ tsa' chʌmi Josué.

²² Mi caj cʌc' ti prueba jini israelob cha'an mi' tsictʌyel mi mux i chʌn jac'beñoñob che' bajche' i ñojte'elob, o mi ma'anic, che'en.

²³ Jini cha'an lac Yum ma'anic tsi' choco loq'uel ti junyajlel jini tejclum tac. Ma'anic tsi' yʌc'ʌyob ti' wenta israelob cha'an mi' jisañob.