Juezob 18 - Chol: I T’an Dios

Micaía yic'ot i p'olbal Dan

¹ Ti jim bʌ ora ma'anic rey ti' tojlel israelob. Jini i p'olbal Dan woli' sʌclañob lum baqui mi' chumtʌlob, come maxto tajbilic i cha'an lum, come ma'anic tsa' aq'uentiyob che' bʌ tsi' tajayob lum jini israelob.

² Jini cha'an i p'olbalob Dan tsi' chocoyob majlel jo'tiquil wen ch'ejlo' bʌ winicob loq'uemo' bʌ ti Zora yic'ot ti Estaol. Tsa' majli i q'uelob pañimil cha'an mi' cʌñob mi weñʌch jini lum. Jini año' bʌ ti Dan tsi' subeyob: Cucula cha'an mi la' cʌn jini lum, che'ob. Ili winicob tsa' majliyob ya' ti wits i c'aba' Efraín c'ʌlʌl ti' yotot Micaía. Ya' tsa' caji i c'ajob i yo.

³ Che' bʌ lʌc'ʌlix añob ti' yotot Micaía, ora jach tsi' cʌñʌyob ti' t'an jini winic leví. Tsi' c'ajtibeyob: ¿Majqui tsi' pʌyʌyet tilel ilayi? ¿Chuqui an a cha'an ilayi? che'ob.

⁴ Jini winic tsi' jac'beyob: Micaía tsi' yʌq'ueyon pejtel iliyi. Motomajon. Tsa'ix i wa'chocoyon cha'an que'tel ti motomaj, che'en.

⁵ Jini jo'tiquil winicob tsi' subeyob: C'ajtiben Dios mi muc'ʌch c taj lojon jini woli bʌ c sʌclan lojon, che'ob.

⁶ Jini motomaj tsi' jac'beyob: Cucula ti' ñʌch'tʌlel la' pusic'al, come jini woli bʌ la' mel an ti' wenta lac Yum, che'en.

⁷ Che' jini tsa' loq'uiyob majlel jini jo'tiquil winicob. Tsa' c'ʌlʌl c'otiyob ti Lais. Tsi' q'ueleyob wen tijicñayob jini ya' bʌ chumulob. Wen chumulob, wen ñʌch'ʌlob. Mach chajpʌbilobic cha'an guerra, come ma'añobic i contrajob. Che' ja'el ñajt to añob i pi'ʌlob ti Sidón. Ma'anic woli' wen pejcañob i bʌ yic'ot yambʌ tejclum.

⁸ Tsa' cha' sujtiyob ti' lumal. Che' bʌ cha' c'otemob ti' ti' Zora yic'ot ti Estaol, i pi'ʌlob tsi' c'ajtibeyob: ¿Bajche' tsa' ujti? che'ob. Jini winicob tsi' jac'beyob:

⁹ Conla ti ora cha'an mi lac jisañob, come tsa'ix c wen tsaji lojon bajche' yilal jini lum. Tsaj q'uele lojon wen uts'atʌch jini lum. Jixcu jatetla, ¿mach ba ti orajic la' wom majlel? Cucula ti ora. Ch'ʌmʌla jini lum, che'ob.

¹⁰ Che' mi la' c'otel, mi caj la' taj jini winicob mu' bʌ i yajñelob ti' ñʌch'tilel i pusic'al. Wen colem jini lum. Jini cha'an yom mi la' ch'ejl'esan la' bʌ, come lac Yum tsa'ix i yʌq'ueyetla jini lum ba' mi' wen ac' i wut. Ma'anic chuqui anto yom, che'ob.

¹¹ Jini cha'an tsa' loq'uiyob majlel lujunc'al i cha'bajc' (600) winicob i p'olbalob Dan, chajpʌbilo' i bʌ cha'an guerra. Tsa' loq'uiyob ti Zora yic'ot ti Estaol.

¹² Tsa' majliyob ti much'tʌl lʌc'ʌl ti Quiriat Jearim ya' ti Judá. Jini cha'an tsi' yotsʌbeyob i c'aba' jini lum: I jijlibob Dan. C'ʌlʌl wʌle jini lum mi' pejcʌntel bajche' iliyi. An ti' tojel i bʌjlibal q'uin ya' ti Quiriat Jearim.

¹³ Che' jini tsa' ñumiyob majlel ya' ti wits i c'aba' Efraín. Tsa' c'otiyob c'ʌlʌl ti' yotot Micaía.

¹⁴ Jini jo'tiquil winicob tsajni bʌ i cʌñob jini lum ya' ti Lais tsi' subeyob i pi'ʌlob: Ti ili otot an efod, yic'ot dios tac. Jini cha'an ña'tanla chuqui yom mi la' mel, che'ob.

¹⁵ Tsa' majliyob ti' yotot Micaía ya' ba' an jini leví. Tsi' c'ajtibeyob bajche' an.

¹⁶ Ya' añob jini lujunc'al i cha'bajc' winicob i p'olbalo' bʌ Dan ya' wa'alob ti jumpat ba'an i trancajlel corral. An i cha'añob e'tʌjibʌl cha'an guerra.

¹⁷ Jini jo'tiquil winicob tsajniyo' bʌ i tsajin jini lum tsa' c'ʌlʌ ochiyob ti mal i yotot Micaía cha'an mi' ch'ʌmob loq'uel jini dios tac yic'ot jini efod. Ya'an jini motomaj lʌc'ʌl ti' trancajlel corral yic'ot jini lujunc'al i cha'bajc' winicob chajpʌbilo' bʌ cha'an guerra.

¹⁸ Tsa' ochiyob jini jo'tiquil ti' yotot Micaía. Tsi' loc'sayob jini dios tac yic'ot jini efod. Jini motomaj tsi' c'ajtibeyob: ¿Chuqui woli la' mel? che'en.

¹⁹ Tsi' jac'beyob: Ch'abix. Yom jach ñʌch'ʌlet. La' quic'ot lojon cha'an ma' wochel ti' wenta c tat lojon yic'ot c motomaj lojon. ¿Uts'at ba che' motomajet ti' yotot juntiquil winic? ¿Mach ba ñumen uts'atic che' ma' wochel ti motomaj ti' tojlel junmojt israelob? che'ob.

²⁰ Jini motomaj tijicña jax tsi' yubi jini t'an. Tsi' ch'ʌmʌ majlel jini efod yic'ot jini dios tac. Xinlʌpʌl tsa' caji ti majlel yic'ot jini winicob.

²¹ Che' bʌ tsa' sujtiyob ba' tilemob ti xʌmbal, tsa' caji i yʌc'ob jini alobob yic'ot jini alʌc'ʌl yic'ot jini cuchʌl ñaxan ti' tojel i wut.

²² Che' ñajtix añob ti' yotot Micaía, yambʌ winicob lʌc'ʌl bʌ i yotot ba'an Micaía tsi' tempayob i bʌ cha'an mi' majlelob i taj i p'olbal Dan.

²³ C'am tsi' yotayob che' ti ñajtʌl. Jini dañob tsa' sujti i q'uelob Micaía. Tsi' subeyob: ¿Chuqui a wom? ¿Chucoch woli a tsʌcleñon lojon yic'ot cabʌl winicob? che'ob.

²⁴ Micaía tsi' jac'beyob: Tsa'ix la' xujch'i majlel c dioste' yic'ot c motomaj. Wʌle wolix la' majlel. ¿Chuqui to mi' cʌytʌl c cha'an? ¿Chucoch mi la' wʌl: “¿Chuqui a wom?” che'etla. Che' tsi' yʌlʌ Micaía.

²⁵ Jini i p'olbalob Dan tsi' subeyob: Mach ma' cha'len cabʌl t'an, come mich'ob c winicob. Tsajalet me ame tsʌnsʌntiquet yic'ot a pi'ʌlob ti xʌmbal, che'ob.

²⁶ Jini dañob tsa' cha' majliyob ti xʌmbal. Che' bʌ tsi' q'uele Micaía ñumen cabʌlob tsa' jach cha' sujti ti' yotot.

²⁷ Che' jini tsi' ch'ʌmʌyob majlel jini dioste' tsa' bʌ i mele Micaía. Tsi' pʌybeyob i motomaj. Tsa' c'otiyob jini dañob ya' ti Lais. Ma'anic xcʌntayajob ti jini tejclum, come wen ñʌch'ʌl pañimil, ma'anic bʌq'uen. Jini dañob tsi' jisayob ti espada ti pejtelelob. Tsi' puluyob jini tejclum.

²⁸ Ma'anic majch tsi' coltayob, come ñajt to an jini tejclum i c'aba' Sidón. I bajñel jach añob. Jini tejclum an ti joctʌl lʌc'ʌl ti Betrehob. Jini dañob tsi' cha' meleyob jini tejclum. Ya'i tsa' chumleyob.

²⁹ Jini cha'an tsi' yotsʌbeyob i c'aba' jini tejclum Dan, che' bajche' i c'aba' i ñojte'el, i yalobil Israel. I c'aba' jini lum ti ñaxan jiñʌch Lais.

³⁰ Jini dañob tsi' wa'chocoyob jini dioste'. Jonatán i yalobil Gerson i yalobil bʌ Moisés yic'ot cha'tiquil i yalobilob Jonatán tsa' ochiyob ti motomaj i cha'an jini dañob. Ya' añob c'ʌlʌl tsa' wersa cʌjchiyob majlel ti ñajtʌl jini israelob.

³¹ Tsi' chʌn ch'ujutesayob jini dioste' tsa' bʌ i yʌc'ʌ ti melol Micaía che' wa'chocobil jini Tabernáculo ya' ti Silo.