Juezob 15 - Chol: I T’an Dios

¹ Che' i yorajlelix mi' tujq'uel trigo, Sansón tsa' tili i jula'tan i yijñam yic'ot juncojt alʌ chivo tsa' bʌ i pʌyʌ tilel. Tsi' yʌlʌ: Com ochel cha'an mij q'uel quijñam, che'en. Pero i tat xch'oc ma'anic tsi' yʌc'ʌ ti ochel.

² Tsi' yʌlʌ: Tsa cʌlʌ woli jach a ts'a'len a wijñam. Jini cha'an tsa'ix c sijibe yambʌ. Pero ñumen i t'ojol jini xch'oc bʌ i yijts'in bajche' i chich. Pʌyʌ jini ijts'iñil bʌ cha'an i q'uexol a wijñam, che'en.

³ Sansón tsi' yʌlʌ: Wʌle ma'anic c mul che' mic tic'lan jini filisteojob, che'en.

⁴ Jini cha'an Sansón tsa' majli i chuc tilel jo'lujunc'al (300) wax. Tsi' ch'ʌmʌ tilel i ñich c'ajc. Tsa' caji i cʌchben i ñej jini wax ti cha'cha'cojt yic'ot te' woli bʌ ti lejmel.

⁵ Che' wolix ti wen lejmel jini c'ajc, tsi' colo jini wax ya' ti' pʌc'ʌbʌl tac jini filisteojob. Tsi' laj pulbe pejtelel jini trigo max to bʌ tuc'bilic, yic'ot jini tuc'bil bʌ ja'el, yic'ot ja'el olivojil.

⁶ Jini filisteojob tsi' c'ajtibeyob: ¿Majqui tsi' mele bajche' jini? che'ob. I pi'ʌlob tsi' jac'ʌyob: Jiñʌch Sansón i nij'al Timnat, come tsi' chilbe i yijñam. Tsi' yʌc'ʌ ti' wenta yambʌ winic. Jini cha'an jini filisteojob tsa' tiliyob ba'an jini x'ixic yic'ot i tat. Tsi' puluyob ti cha'ticlel.

⁷ Sansón tsi' subeyob jini winicob: Cha'an la' mul, ti isujm mi caj cʌq'ueñetla i q'uexol jini tsa' bʌ la' mele. Ma'anic mi caj j cʌy c tic'lañetla jinto che' tojbilix la' mul, che'en.

⁸ Jini cha'an Sansón tsi' jisa cabʌl winicob. Ti wi'il tsa' jubi majlel ti chumtʌl ti lech'el bʌ i mal xajlel ya' ti Etam.

Sansón tsi' jisa jini filisteojob ya' ti Lehi

⁹ Jini filisteojob tsa' letsiyob majlel ti Judá. Ya' tsa' jijliyob. Tsi' pam pucuyob i bʌ lʌc'ʌl ti Lehi.

¹⁰ Jini winicob ti Judá tsi' c'ajtibeyob: ¿Chucoch tsa' letsiyetla tilel cha'an mi la' contrajiñon lojon? che'ob. Tsi' jac'beyob: Tsa' tili j cʌch lojon Sansón, come tsa'ix i wen tic'layon lojon. Jini cha'an wersa mij q'uextan lojon chuqui tsi' melbeyon lojon, che'ob.

¹¹ Tsa' majliyob uxp'ejl mil winicob i p'olbalob Judá ba'an Sansón ya' ti mal jini ch'en am bʌ ti Etam. Tsi' subeyob: ¿Mach ba a wujilic woli lac wersa yuman jini filisteojob? ¿Chucoch tsa' techbeyob i mich'ajel tic tojlel lojon? che'ob. Sansón tsi' jac'beyob: Tsac tic'la jini filisteojob che' bajche' tsi' tic'layoñob, che'en.

¹² Jini cha'an jini winicob tsi' yʌlʌyob: Tsa' tili cʌq'uet lojon ti c'ʌb jini filisteojob, che'ob. Sansón tsi' subeyob: Subeñonla ti isujm, ma'anic mi caj la' tsʌnsañon jatetla, che'en.

¹³ Jini winicob tsi' yʌlʌyob ti' pejtelel: Isujm, ma'anic mi caj c tsʌnsañet lojon. Cojach com cʌchet lojon cha'an mi cʌq'uet lojon ti c'ʌb jini filisteojob, che'ob. Che' jini tsi' cʌchʌyob ti cha't'ujm chij wen tsijib to bʌ, cha'an mi' pʌyob loq'uel ti jini xajlel ba' woli ti jijlel.

¹⁴ Che' wolix i c'ʌlʌl c'otel ti Lehi, jini filisteojob tsa' tili i tajob. C'am tsi' cha'leyob t'an, pero tsa' c'oti i yEspíritu lac Yum ti' tojlel Sansón yic'ot cabʌl i p'ʌtʌlel. Jini chij tac cʌchbil bʌ ya' ti' c'ʌb tsa' c'uñ'a. Tsa' ts'ojqui jini lazo tac. Pejtelel i cʌjchil tac tsa' laj p'ajti jubel ti' c'ʌb.

¹⁵ Sansón tsi' taja ti lum jump'ejl i xʌc'ti' burro mero tsijib to bʌ. Tsi' chucu. Tsi' c'ʌñʌ i tsʌnsan jump'ejl mil winicob.

¹⁶ Jini cha'an Sansón tsi' yʌlʌ: Yic'ot jach i xʌc'ti' burro tsac p'ul jisayob. Yic'ot i xʌc'ti' burro tsa' mejli c tsʌnsan jump'ejl mil winicob, che'en.

¹⁷ Che' ujtemix ti t'an tsi' choco i xʌc'ti' burro am bʌ ti' c'ʌb. Tsi' yotsʌbe i c'aba jini lum Ramatlehi, mu' bʌ i yʌl ti lac t'an: I witsilel xʌc'ti'ʌl.

¹⁸ Che' bʌ wen cabʌl jax i tiquin ti' tsi' pejca lac Yum ti oración: Tsa'ix a wen coltayon ti pejtelel jini wocol. ¿Mu' ba caj a wʌc'on ti chʌmel wʌle ti tiquin ti'? ¿Mu' ba caj c chʌmel ti' tojlel jini mach bʌ i cʌñʌyetobic? che'en.

¹⁹ Che' jini Dios tsi' jambe i loq'uib ja' am bʌ ti' jajp lum ya' ti Lehi. Tsa' loq'ui tilel ja'. Tsi' japʌ. Tsi' cha' taja i p'ʌtʌlel. Tsa' cha' p'ʌta. Jini cha'an tsi' yotsʌbe i c'aba' jini lum Enhacore, mu' bʌ i yʌl ti lac t'an: Cuxul bʌ ja' i cha'an jini mu' bʌ i pejcan Dios. Ya'to an ti Lehi c'ʌlʌl wʌle.

²⁰ Junc'al jab tsi' mele i ye'tel Sansón ti' tojlel israelob, pero jini filisteojob cabʌl tsi' tic'layob jini israelob.