Juezob 13 - Chol: I T’an Dios

Tsi' yila pañimil Sansón

¹ Tsa' cha' caji' melob chuqui jontol ti' wut lac Yum jini israelob. Jini cha'an lac Yum tsi' yʌc'ʌyob ti' c'ʌbob jini filisteojob cha'c'al jab.

² An winic ya' ti Zora, loq'uem bʌ ti' p'olbal Dan, i c'aba' Manoa. Awilan to'o wa'al jach i yijñam.

³ Tsa' majli i yAngel lac Yum i suben jini x'ixic: Ma'anic a walobil c'ʌlʌl wʌle, pero mux caj a cʌntan a walobil. Mi caj a wʌc' ti pañimil alʌ ch'iton.

⁴ Jini cha'an chʌcʌ q'uele a bʌ. Mach yomic ma' jap paj'esʌbil bʌ i ya'lel ts'usub mi lembal mi yan tac bʌ chuqui tac bibi'.

⁵ Come mi caj a cʌntan a walobil cha'an ma' wʌc' ti pañimil. Ma'anic mi caj i wis set'bentel i tsutsel i jol jini ch'iton, come mi caj i yajñel ti nazareo ti' tojlel Dios c'ʌlʌl mi' yilan pañimil c'ʌlʌl mi' chʌmel. Mi caj i coltan jini israelob ti' tojlel filisteojob, che'en.

⁶ Jini x'ixic tsa' bʌc' tili i suben i ñoxi'al: Juntiquil i winic Dios tsa' tili i pejcañon. Che'ʌch yilal jini winic bajche' i yAngel lac Yum, wen bʌbʌq'uen jax. Ma'anic tsaj c'ajtibe baqui ch'oyol. Ma'anic tsi' subeyon chuqui i c'aba'.

⁷ Tsi' subeyon: “Ma'anic a walobil c'ʌlʌl wʌle, pero mux caj a cʌntan a walobil. Mi caj a wʌc' ti pañimil alʌ ch'iton. Jini cha'an mach yomic ma' jap vino mi lembal. Che' ja'el mach yomic ma' c'ux chuqui tac bibi', come ili ch'iton mi caj i yajñel ti nazareo ti' tojlel lac Yum c'ʌlʌl mi' yilan pañimil c'ʌlʌl mi' chʌmel”, che'en. Che' tsi' yʌlʌ jini x'ixic.

⁸ Che' jini Manoa tsi' pejca lac Yum ti oración: C Yum, ti wocol t'an mij c'ajtibeñet la' cha' tilic i winic Dios tic tojlel lojon cha'an mi' cʌntesañon lojon bajche' yom mij cosan lojon, che'en.

⁹ Awilan lac Yum tsi' yubibe i yoración Manoa. I yAngel lac Yum tsa' cha' c'oti ti' tojlel jini x'ixic che' ya'an ti cholel, pero mach ya'ic an i ñoxi'al yic'ot.

¹⁰ Jini x'ixic ti ajñel tsa' majli i suben i ñoxi'al: Awilan jini winic tsa' bʌ i pejcayon ti yambʌ ora tsa'ix cha' tili, che'en.

¹¹ Ti ora jach Manoa tsa' majli yic'ot i yijñam. Che' bʌ tsa' c'oti ba'an jini winic tsi' c'ajtibe: ¿Jatet ba tsa' bʌ a pejca jini quijñam? che'en. Jini winic tsi' jac'be: Joñon cu, che'en.

¹² Manoa tsi' sube: Che' mi' ts'ʌctiyel a t'an, ¿bajche' yom mi' ñusan q'uin jini ch'iton? ¿Bajche' yom mij cʌntesan lojon? che'en.

¹³ I yAngel lac Yum tsi' sube Manoa: La' i mel a wijñam pejtel mu' bʌ c suben.

¹⁴ Mach yomic mi' jap mi wisilic jini melbil tac bʌ ti ts'usub, mi lembal. Mach yomic mi' wisi c'ux chuqui tac bibi', che'en.

¹⁵ Che' jini Manoa tsi' sube i yAngel lac Yum: Ti wocol t'an mic subeñet max to yomic ma' poj majlel. Mu' to c chajpʌbeñet lojon alʌ chivo, che'en.

¹⁶ I yAngel lac Yum tsi' sube Manoa: Anquese mic poj cʌytʌl, ma'anic mi caj j c'ux jini we'elʌl, pero uts'at mi a wom a wʌq'uen pulbil bʌ i majtan lac Yum, che'en. Manoa ma'anic tsi' ña'ta mi i yAngelʌch lac Yum jini woli bʌ i pejcan.

¹⁷ Manoa tsi' c'ajtibe i yAngel lac Yum: ¿Chuqui a c'aba'? Che' mi' ts'ʌctiyel ili a t'an com c tsictesʌbeñob c pi'ʌlob lojon, che'en.

¹⁸ I yAngel lac Yum tsi' jac'be: ¿Chucoch ma' c'ajtin j c'aba'? Wen ñuc j c'aba', che'en.

¹⁹ Che' jini Manoa tsi' chucu tilel juncojt alʌ chivo yic'ot majtañʌl melbil bʌ ti trigo cha'an mi' yʌq'uen i majtan lac Yum. Tsi' yʌc'ʌ ti pam xajlel. Manoa yic'ot i yijñam tsi' q'ueleyob jini ñuc bʌ i melbal lac Yum che' bʌ tsa' puli jini majtañʌl.

²⁰ Che' woli ti lejmel jini c'ajc ti pulʌntib, che' woli ti letsel ti' tojel panchan, i yAngel lac Yum tsa' letsi majlel ti c'ajc am bʌ ti pulʌntib. Che' bʌ tsi' q'ueleyob, tsi' pʌcchocoyob i bʌ ti lum Manoa yic'ot i yijñam.

²¹ Pero i yAngel lac Yum ma'anix tsa' chʌn caji i pʌs i bʌ ti' tojlelob. Che' jini tsa' caji i ña'tan Manoa i yAngelʌch lac Yum.

²² Manoa tsi' sube i yijñam: Wersa mi caj lac chʌmel, come tsa'ix laj q'uele Dios, che'en.

²³ Pero i yijñam Manoa tsi' yʌlʌ: Yomic i tsʌnsañonla lac Yum, ma'anic tsi' ch'ʌmʌ ti' wenta jini pulbil bʌ i majtan, yic'ot jini majtañʌl melbil bʌ ti trigo tsa' bʌ la cʌq'ue. Che'ic jini ma'anic tsi' pʌsbeyonla ili i yejtal tac i p'ʌtʌlel, ma'anic tsi' subeyonla chuqui tac mi caj i yujtel ti lac tojlel, che'en.

²⁴ Che' bʌ tsa' c'oti i yorajlel, tsi' yila pañimil jini ch'iton bʌ i yalobil Manoa. Tsi' yotsʌbeyob i c'aba' Sansón. Jini ch'iton tsa' caji ti colel. Lac Yum tsi' wen colta.

²⁵ Awilan i yEspíritu lac Yum tsa' caji' mel i ye'tel ti' tojlel ya' ba' chumul ti Dan, ti' yojlil Zora yic'ot Estaol.