Juezob 12 - Chol: I T’an Dios

Jefté yic'ot Efraín

¹ Tsa' caji i tempañob i bʌ jini winicob ti Efraín. Tsa' c'axiyob majlel ti Zafon ba' tsi' subeyob Jefté: ¿Chucoch tsajniyet ti guerra ti' contra amoñob che' ma'anic tsa' pʌyʌyon lojon majlel a wic'ot? Jini cha'an mux caj c pulet lojon ti a wotot, che'ob.

² Jefté tsi' jac'beyob: An i mul jini amoñob tic tojlel lojon. Jini cha'an tsac pʌyʌyetla, pero ma'anic tsa' tili la' coltañon lojon loq'uel ti' c'ʌbob.

³ Che' bʌ tsaj q'uele mach la' womic la' coltañon lojon, ma'anic tsac bʌc'ña c tsʌnsʌntel. Tsa' majliyon ti guerra ti' contra jini amoñob. Che' jini lac Yum tsi' yʌc'ʌyob tij c'ʌb. ¿Chucoch wʌle tsa' lon tiliyetla cha'an mi la' cha'len guerra tij contra? che'en.

⁴ Jefté tsi' mich'leyob jini año' bʌ ti Efraín, come tsi' tse'tayob, come tsi' subeyob: Chocbiletla, ma'anic la' c'ʌjñibal, che'ob. Jini cha'an Jefté tsi' wets'e tilel pejtelel soldadojob ya' ti Galaad. Tsi' cha'le guerra ti' contra Efraín. Jini winicob ch'oyolo' bʌ ti Galaad tsi' jisayob jini ch'oyolo' bʌ ti Efraín.

⁵ Jini cha'an jini galaadob tsi' ch'ʌmʌyob jini c'axib ja' ya' ti Jordán ti' tojel Efraín. Ba' ora tsi' yʌlʌ xputs'el ch'oyol bʌ ti Efraín: “Com c'axel”, che'en, wersa tsi' c'ajtibeyob jini winicob año' bʌ ti Galaad: “¿Jatet ba efrateo?” che'ob. Mi tsi' jac'ʌ: “Ma'anic”,

⁶ che' jini tsi' wersa subeyob cha'an mi' yʌl jini t'an: “Xibolet”. Jini ch'oyolo' bʌ ti Efraín tsi' yʌlʌyob: “Sibolet”, come ma'anic tsa' wen mejli i yʌlob. Che' jini ti ora jach tsi' chucuyob. Tsi' tsʌnsayob ya' ti' c'axibʌl Jordán ja'. Ti jim bʌ q'uin tsa' jiliyob cha'p'ejl i yuxc'al mil (42,000) winicob ch'oyolo' bʌ ti Efraín.

⁷ Wʌcp'ejl jab tsi' cha'le yumʌntel Jefté ti' tojlel israelob. Che' bʌ tsa' chʌmi tsa' mujqui ti jump'ejl tejclum ya' ti Galaad.

Ibzán, Elón yic'ot Abdón, yumʌlob ti' tojlel israelob

⁸ Che' chʌmenix Jefté, tsa' caji i mel i ye'tel ti juez jini Ibzán ti' tojlel israelob ti Belén.

⁹ An lujuntiquil i cha'c'al (30) ch'iton bʌ i yalobilob, yic'ot lujuntiquil i cha'c'al xch'oc bʌ i yalobilob ti pejtelel. Tsi' sijiyob jini xch'oc bʌ i yalobilob ti yambʌ tejclum tac. Tsi' pʌyʌ tilel yambʌ lujuntiquil i cha'c'al xch'oc ch'oyolo' bʌ ti yambʌ tejclum tac cha'an i yalobilob. Wucp'ejl jab tsi' cha'le yumʌl ti' tojlel israelob.

¹⁰ Che' bʌ tsa' chʌmi Ibzán, tsa' mujqui ti Belén.

¹¹ Ti wi'il tsi' cha'le yumʌntel Elón ch'oyol bʌ ti Zabulón. Lujump'ejl jab tsi' cha'le yumʌntel ti' tojlel israelob.

¹² Che' bʌ tsa' chʌmi Elón ch'oyol bʌ ti Zabulón, tsa' mujqui ti Ajalón ya' ti' lum Zabulón.

¹³ Che' jini tsa' caji ti yumʌntel Abdón (i yalobil jini Hilel jini piratón).

¹⁴ An cha'c'al i yalobilob Abdón yic'ot lujuntiquil i cha'c'al (30) i butsob. Tsi' c'ʌchtayob lujuncojt i chʌnc'al (70) burro. Waxʌcp'ejl jab tsi' cha'le yumʌntel ti' tojlel israelob.

¹⁵ Tsa' chʌmi Abdón. Tsa' mujqui ti' tejclum i c'aba' Piratón ya' ti' lumal Efraín ti jini wits i cha'an Amalec.