Juezob 10 - Chol: I T’an DiosTola yic'ot Jair tsi' cha'leyob melojel ti Israel 1 Che' chʌmenix Abimelec, jini Tola tsa' caji i coltan israelob. Tola i yalobilʌch Fúa, i yalobil Dodo, loq'uem bʌ ti' p'olbal Isacar. Tsa' chumle ti Samir am bʌ ti Efraín wits. 2 Uxp'ejl i cha'c'al (23) jab tsi' cha'le yumʌntel ti' tojlel israelob. Tsa' chʌmi. Tsa' mujqui ya' ti Samir. 3 Ti wi'il tsa' caji i mel i ye'tel Jair jini ch'oyol bʌ ti Galaad. Cha'p'ejl i cha'c'al jab tsi' cha'le yumʌl ti' tojlelob israelob. 4 An lujuntiquil i cha'c'al (30) i yalobilob Jair. Tsi' c'ʌchtayob lujuncojt i cha'c'al (30) burro. An i cha'an lujump'ejl i cha'c'al tejclum ja'el otsʌbil bʌ i c'aba' i tejclum tac Jair c'ʌlʌl ti ili ora. Ya'an ti' lumal Galaad. 5 Che' bʌ tsa' chʌmi Jair, tsa' mujqui ti Camón. Jefté tsi' colta israelob ti' tojlel amoñob 6 Jini israelob tsa' cha' caji i melob chuqui tac jontol ti' wut lac Yum, come tsa' cha' caji i ch'ujutesañob jini dios Baal yic'ot Astarot, yic'ot i dios tac Siria, yic'ot Sidón, yic'ot Moab, yic'ot amoñob, yic'ot filisteojob. Tsi' junyajlel cʌyʌyob lac Yum. Ma'anix tsi' chʌn melbeyob chuqui yom. 7 Jini cha'an lac Yum tsa' caji i contrajiñob. Tsi' yʌc'ʌyob ti c'ʌb filisteojob yic'ot ti' c'ʌb amoñob. 8 Waxʌclujump'ejl (18) jab tsi' tic'layob jini israelob año' bʌ ti junwejl Jordán já ti' lumob amorreojob ya' ti Galaad. 9 Jini amoñob tsa' c'axiyob ti Jordán cha'an mi' majlelob ti guerra ti' contra Judá yic'ot ti' contra Benjamín yic'ot ti' contra Efraín. C'ax p'ump'uñob tsa' tic'lʌntiyob jini israelob. 10 Jini cha'an jini israelob c'am tsi' pejcayob lac Yum: Isujm tsa'ix c cha'le lojon mulil ti a tojlel, come tsa'ix j cʌyʌ lojon jini mero Dios. Tsac lon ch'ujutesa lojon jini Baal, che'ob. 11 Lac Yum tsi' jac'beyob: ¿Mach ba anic tsaj coltayetla che' bʌ tsa' la' wubi la' tic'lʌntel ti Egipto ti' tojlel amorreojob, yic'ot ti' tojlel amoñob, yic'ot ti' tojlel filisteojob, 12 ti' tojlel año' bʌ ti Sidón, ti' tojlel Amalec, yic'ot ti' tojlel Maón? Che' c'am tsa' la' pejcayon, tsaj coltayetla. 13 Pero tsa'ix la' cʌyʌyon cha'an mi la' lon ch'ujutesan dioste'. Jini cha'an ma'anix mi caj c chʌn coltañetla wʌle. 14 Cucula, pejcan la' dios tac tsa' bʌ la' yajca. La'ix i coltañetla ti pejtelel la' wocol mu' bʌ la' taj. Che' tsi' yʌlʌ lac Yum. 15 Jini israelob tsi' cha' subeyob lac Yum: Isujm tsa'ʌch c cha'le lojon mulil. Mele che' bajche' a wom tic tojlel lojon. Cojach mij c'ajtibeñet lojon ti wocol t'an cha'an ma' coltañon lojon ti ili q'uin, che'ob. 16 Che' jini tsi' chocoyob loq'uel jini dioste' tac. Tsa' caji i ch'ujutesañob lac Yum. Awilan jini lac Yum tsi' mele i pusic'al cha'an i wocol israelob. 17 Tsa' caji i tempañob i bʌ jini amoñob. Tsa' majliyob ti much'tʌl ya' ti Galaad. Che' ja'el tsa' caji i tempañob i bʌ jini israelob. Tsa' majliyob ti much'tʌl ya' ti Mizpa. 18 Jini ñuc taco' bʌ am bʌ i ye'tel ya' ti Galaad tsi' c'ajtibeyob i bʌ. ¿Majqui mi caj i tech guerra ti' tojlel amoñob? Jini mu' bʌ i tech mi caj i yumʌntel ti' tojlel jini chumulo' bʌ ti Galaad, che'ob. |
© 1977, Wycliffe Bible Translators, Inc. All rights reserved.
Wycliffe Bible Translators, Inc.