Josue 5 - Chol: I T’an Dios

Tsi' tsepbeyob i pʌchʌlel. Tsi' meleyob Pascua ya' ti' Gilgal

¹ I yumob amorreojob ya' ti junwejl Jordán ja' ya' ti bʌjlibal q'uin yic'ot i yumob cananeojob año' bʌ ti' ti' jini colem ja' tsa' caji i yubiñob. Lac Yum tsa'ix i tsʌc'mesa jini Jordán ja'. Tsa' lu' c'axiyob jini israelob. Che' bʌ tsi' yubiyob tsa' toj sajtiyob i pusic'al. Mach chʌn contentojobix tsa' ajniyob come tsi' bʌc'ñayob jini israelob.

² Ti jim bʌ ora lac Yum tsi' sube Josué: Yom ma' mel cuchillo wen jay bʌ. Cha' tsepben i pʌchʌlel jini israelob.

³ Josué tsi' mele jini cuchillo jay bʌ i yej. Tsa' caji' tsepbeñob i pʌchʌlel jini israelob ya' ti bujtʌl i c'aba' Aralot.

⁴ Jini cha'an Josué tsi' tsepbeyob i pʌchʌlel, come tsa' chʌmiyob pejtel jini winicob tsa' bʌ loq'uiyob ti Egipto yujilo' bʌ guerra. Tsa' chʌmiyob ya' ti jochol bʌ lum che' añob ti bij, che' loq'uemobix ti Egipto.

⁵ Ti pejtelob tsa' bʌ loq'uiyob ti Egipto tsa'ix tsepbentiyob i pʌchʌlel. Pero max to tsepbilobic i pʌchʌlel pejtelel jini tsa' bʌ i yilayob pañimil ti jochol bʌ lum che' añob ti bij.

⁶ Come jini israelob tsi' cha'leyob xʌmbal ya' ti jochol bʌ lum cha'c'al jab. Tsa' ajniyob ti jochol bʌ lum jinto tsa' lu' chʌmiyob pejtelel jini winicob yujilo' bʌ guerra tsa' bʌ loq'uiyob ti Egipto. Come ma'anic tsi' jac'beyob i t'an Dios. Lac Yum tsi' yʌc'ʌ i t'an cha'an ma'anic mi caj i q'uelob jini lum mu' bʌ caj i yʌq'ueñob che' bajche' tsi' wʌn sube i ñojte'elob. Wen uts'at jini lum. Wen cabʌl mi' yʌc' leche yic'ot chab.

⁷ Lac Yum tsi' ts'ʌctesa i t'an che' bʌ tsi' pʌybeyob i yalobilob cha'an mi' yochelob ti jini lum che' bajche' wʌn albil. Josué tsi' tsepbeyob i pʌchʌlel, come ma'anic tsa' tsepbentiyob i pʌchʌlel che' añob to ti bij.

⁸ Che' bʌ tsa'ix laj ujti ti tsepbentelob i pʌchʌlel jini winicob, ya' to tsa' cʌleyob ba' jijlemob jinto tsa' lajmiyob.

⁹ Lac Yum tsi' sube Josué: Tsa'ix c loc'sayetla ya' ba' cabʌl la' wajlentel ti' tojlel egiptojob, che'en. Jini cha'an tsa' otsʌbenti i c'aba' jini lum Gilgal c'ʌlʌl wʌle.

¹⁰ Che' ya' añob jini israelob ti Gilgal tsi' meleyob q'uin cha'an Pascua che' ti ic'ajel che' ti chʌnlujump'ejlel (14) q'uin ti jini jach bʌ uw. Tsi' meleyob ya' ti joctʌl lʌc'ʌl ti Jericó.

¹¹ Che' ti yijc'ʌlal che' bʌ tsi' meleyob Pascua, tsi' c'uxuyob waj mach bʌ anic i levadurajlel yic'ot i wut jam yic'ot i wut yambʌ pʌc'ʌbʌl.

¹² Ti jini jach bʌ q'uin tsa' lajmi jini maná che' bʌ tsa' caji' c'uxob i wut pʌc'ʌbʌl. Jini israelob ma'anix tsi' chʌn tajayob jini maná. Ti jini jach bʌ jab tsa' caji i c'uxob i wut jini lum ya' ti Canaán.

Jini winic chucul bʌ i cha'an espada

¹³ Che' bʌ lʌc'ʌlix tsa' c'oti Josué ya' ti Jericó, tsi' q'uele ya' wa'al juntiquil winic ti' tojel. Chucul i cha'an jini winic junts'ijt espada, bots'bil i cha'an ti' yotot. Josué tsi' lʌc'tesa i bʌ ya' ba' wa'al. Tsi' c'ajtibe: ¿Jatet ba jini c pi'ʌlet bʌ lojon o jatet ba jini i pi'ʌlet bʌ j contra lojon? che'en Josué.

¹⁴ Jini winic tsi' jac'ʌ: Tsa' tiliyon che' bajche' i yaj capitán soldadojob i cha'an lac Yum, che'en jini winic. Josué tsi' pʌcchoco i bʌ ti' tojlel jini winic. Tsi' yʌlʌ: C Yum, a winicon, subeñon chuqui a wom, che'en Josué.

¹⁵ Jini capitán am bʌ i ye'tel ti' tojlel i soldadojob lac Yum tsi' sube: Loc'san a xʌñʌb, come ch'ujulʌch ili lum ba' wa'alet, che'en. Che'ʌch tsi' mele Josué.