Josue 3 - Chol: I T’an Dios

Tsa' c'axiyob majlel ti Jordán ja'

¹ Che' ti wen sʌc'ajel Josué yic'ot pejtelel winicob israelob tsa' loq'uiyob ya' ti Sitim ya' ba' tsa' jijliyob ti lejchempat tac. Tsa' cajiyob ti c'otel ya' ti Jordán ja'. Ya' tsa' jijliyob.

² Che' ñumenix uxp'ejl q'uin jini año' bʌ i ye'tel tsa' ñumiyob majlel ba'an jini lejchempat tac.

³ Tsi' yʌq'ueyob mandar jini winicob: Che' mi la' q'uel jini Arca cha'an Xuc'ul bʌ i T'an lac Yum Dios yic'ot jini motomajob levíjob woli bʌ i q'uechob majlel, yom mi la' loq'uel majlel yic'otob. Tsajcanla majlel.

⁴ Che' jini mi cajel la' cʌn la' bijlel, ya' ba' maxto anic tsa' ñumiyetla. Yom mi la' cʌytʌl ti ñajt ba'an jini Arca che' bajche' lujunc'al i yuxbajc' metro. Mach yomic mi la' wen ñochtan, che'en.

⁵ Josué tsi' sube winicob: La' i sʌq'uesañetla lac Yum, come mi caj i wen pʌs i ñuclel ijc'ʌl ti la' tojlel, che'en.

⁶ Josué tsi' pejca jini motomajob: Ch'uyula majlel jini Arca cha'an Xuc'ul bʌ i T'an. Yom ñaxan mi la' majlel ti' tojel winicob, che'en. Tsa' caji' q'uechob majlel ti' tojlelob.

⁷ Che' jini lac Yum tsi' sube Josué: Ti ili q'uin mi caj cʌq'uet ti q'uejlel ti ñuc ti' tojlel pejtel israelob cha'an mi' ña'tañob añon a wic'ot. Che' bajche' tsa' ajniyon quic'ot Moisés, che' ja'el mi caj cajñel a wic'ot.

⁸ Yom ma' suben motomajob mu' bʌ i q'uechob majlel Arca: “Che' mi la' c'otel ti' ti' ja' i c'aba' Jordán, yom mi la' cʌytʌl ya' ba' maxto tamic”, che'en.

⁹ Josué tsi' sube israelob: La'la ti lʌc'ʌl. Ñich'tʌbenla i t'an lac Yum Dios.

¹⁰ Che' jini mux cajel la' ña'tan an ti la' tojlel jini cuxul bʌ lac Yum Dios. Jiñʌch lac ña'tʌntel cha'an mux i choc loq'uel ti la' tojlel jini cananeojob yic'ot heteojob yic'ot heveojob yic'ot ferezeojob yic'ot gergeseojob yic'ot amorreojob yic'ot jebuseojob.

¹¹ Jini Arca ba' lotol jini xuc'ul bʌ t'an i cha'an i Yum pejtel pañimil mi caj i c'axel ti Jordán ja'. Ti wi'il mi caj la' c'axel.

¹² Yom mi la' yajcan lajchʌntiquil winicob loq'uemo' bʌ ti jujunmojt winicob ti Israel cha'an i ye'tel testigo.

¹³ Mi caj i yochelob majlel ti Jordán ja' jini motomajob woli bʌ i q'uechob majlel jini Arca i cha'an i Yum pejtel pañimil. Che' mi' yochelob, jini ja' am bʌ ti entʌl mi caj i jubel majlel. Jini ja' am bʌ ti chan mi caj i lʌmtʌl. Mi caj i tempʌyel ti' chan, che'en Josué.

¹⁴ Jini winicob x'ixicob tsa' loq'uiyob majlel ba' jijlemob ti pisil tac bʌ otot. Tsa' c'axiyob majlel ti Jordán ja'. Ñaxan tsa' majliyob jini motomajob, q'uechel i cha'añob jini Arca ba' lotol jini Xuc'ul bʌ T'an. Wi'ilix tsa' majliyob winicob x'ixicob.

¹⁵ Che' bʌ tsa' c'otiyob ti Jordán ja' jini motomajob q'uechel bʌ i cha'añob jini Arca, tsa' ts'ajcuyiyob i yoc ti ja'. Jiñʌch i yorajlel che' mi' ts'ʌjmel loq'uel jini Jordán ja' ti' ti'il che' ti' yorajlel mi' tujq'uel trigo.

¹⁶ Jini ja' woli bʌ ti jubel tilel tsi' cʌyʌ i xʌmbal. Ñajt to tsa' wa'le che' bajche' bujtʌl. Tsa' cʌle ya' ti tejclum i c'aba' Adam am bʌ ti' t'ejl Saretán. Tsa' sʌcʌ jili jini ja' woli bʌ i ñumel majlel ti jini joctʌl Arabá c'ʌlʌl ba' mi' yochel ti colem ñajb i c'aba' Ats'am. Jini winicob x'ixicob tsa' c'axiyob majlel ti ja'. Tsa' c'otiyob lʌc'ʌl ti Jericó.

¹⁷ Jini motomajob q'uechel bʌ i cha'an jini Arca ba' lotol jini Xuc'ul bʌ T'an i cha'an lac Yum, tsa' wa'leyob ti tiquin lum ya' ti' yojlil Jordán ja'. Che' ya' wa'alob jini motomajob ti' yojlil, pejtel jini israelob tsa' lu' c'axiyob ti Jordán ja' che' bajche' tiquin bʌ lum.