Josue 17 - Chol: I T’an Dios

¹ Jiñʌch i lumal Manasés, jini ascuñʌl bʌ i yalobil José. Maquir jiñʌch ascuñʌl bʌ i yalobil Manasés. I tatʌch Galaad. Wen yujil guerra. Tsa' aq'uenti Maquir jini lum i cha'an Galaad yic'ot Basán.

² Jiñobʌch winic bʌ i yalobilob Manasés: Abiezer yic'ot i yalobilob, Helec yic'ot i yalobilob, Asriel yic'ot i yalobilob, Siquem yic'ot i yalobilob, Hefer yic'ot i yalobilob, Semida yic'ot i yalobilob.

³ Ma'anic ch'iton bʌ i yalobilob Zelofehad (i yalobil Hefer, i yalobil Galaad, i yalobil Maquir, i yalobil Manasés). An xch'oc bʌ i yalobilob. Jiñobʌch Maala, Noa, Hogla, Milca, Tirsa.

⁴ Tsa' majli i pejcañob Eleazar jini motomaj yic'ot Josué i yalobil Nun yic'ot jini año' bʌ i ye'tel. Tsi' yʌlʌyob: Lac Yum tsi' yʌq'ue mandar Moisés cha'an lajal yom mi cʌq'uentel lojon c lum che' bajche' c pi'ʌlob, che'ob. Jini cha'an tsa' aq'uentiyob i lumob lajal bajche' i yerañob i tat, come che'ʌch tsi' yʌlʌ lac Yum ti mandar.

⁵ Tsa' aq'uenti Manasés lujumpejt, yic'ot yambʌ i lumal jiñʌch Galaad yic'ot Basán am bʌ ti junwejl Jordán ja'.

⁶ Come i yixic'alob Manasés tsa' aq'uentiyob i lumob lajal bajche' jini ch'iton bʌ i yalobilob. Tsa' aq'uenti i lumal Galaad yambʌ junmojt bʌ Manasés.

⁷ Jini cayajon i cha'an Manasés tsa' tejchi ba'an Aser. Tsa' c'oti ba'an Micmetat am bʌ ti' tojel Siquem ba' mi' pasel q'uin. Tsa' majli ti sur ba'an i pasija' Tapúa.

⁸ Jini lum i cha'an Tapúa i cha'añʌch Manasés, pero jini tejclum ya' ba' jaxʌl i lumal Manasés i cha'añʌch efraíñob.

⁹ Jini cayajon ya' jaxʌl ti pa' i c'aba' Caná. Tsa' c'ʌlʌl c'oti ti colem ñajb. Lamital jini tejclum tac ya' ti sur ti' lumal Manasés i cha'añʌch Efraín.

¹⁰ Jini lum am bʌ ti tojel jini sur i cha'añʌch Efraín. Jini am bʌ ti norte i cha'añʌch Manasés. Jini cayajon ya' jaxʌl ti colem ñajb. Mi' tajob i bʌ yic'ot Aser am bʌ ti norte yic'ot Isacar am bʌ ti' pasibal q'uin.

¹¹ Lamital i p'olbal Manasés tsa' aq'uenti tejclum tac yic'ot xchumtʌl tac ya' ti' lumal Isacar yic'ot ti' lumal Aser: Betseán, Ibleam, Dor, Endor, Taanac, Meguido, ba'an uxpejt lum.

¹² Jini manasesob ma'anic tsa' mejli i ch'ʌmob ili lum tac, come jini cananeojob tsi' wen mʌctayob.

¹³ Che' bʌ tsa' ch'ejl'ayob jini israelob, tsi' yotsayob jini cananeojob ti majtan e'tel. Pero ma'anic tsa' mejli i chocob loq'uel.

¹⁴ I p'olbalob José tsi' pejcayob Josué: ¿Chucoch ts'ita jach tsa' wʌq'ueyon lojon jini lum che' wen oñon lojon? Lac Yum tsa'ix i pʌsbeyon lojon i yutslel i t'an.

¹⁵ Josué tsi' jac'beyob: Mi wen oñetla, seq'uela majlel jini te'el cha'an mi la' taj la' wajñib ti' lumob jini ferezeojob yic'ot refaíjob, come jini wits i cha'an Efraín mach jasʌlic la' cha'an, che'en Josué.

¹⁶ I p'olbalob José tsi' yʌlʌyob: Mach jasʌlic c cha'an lojon jini wits. Pejtelel jini cananeojob año' bʌ ti joctʌl an i cha'añob carreta tac melbil bʌ ti tsucul taq'uin. Ya' chumulob ti Betseán yic'ot ti jini xchumtʌl tac am bʌ ti joytilel, yic'ot ti joctʌl i c'aba' Jezreel, che'ob.

¹⁷ Che' jini Josué tsi' jac'beyob i p'olbalob José año' bʌ ti Efraín yic'ot ti Manasés. Tsi' yʌlʌ: Wen cabʌletla. Wen ch'ejletla. Mach ts'ita'ic jach mi caj la' taj.

¹⁸ Mi caj la' ch'ʌm jini lum am bʌ ti wits. Uts'at mi la' sec' jini te'el cha'an ya' mi la' chumtʌl, come mi caj la' choc loq'uel jini cananeojob, anquese ch'ejlob, anquese melbil ti tsucul taq'uin i carreta tac, che'en.