Josue 11 - Chol: I T’an Dios

Josué tsa' mʌjli i cha'an ti pejtelel jini lum

¹ Che' bʌ tsi' yubi pejtelel iliyi, jini yumʌl Jabín am bʌ ti tejclum i c'aba' Hazor, tsi' choco ti subentel Jobab i yum Madón, yic'ot i yum Simrón, yic'ot i yum Acsaf.

² Che' ja'el tsi' choco ti subentel jini yumʌlob año' bʌ ti wits tac ya' ti norte, yic'ot jini yumʌlob año' bʌ ti Arabá am bʌ ti' tojel Cineret, yic'ot jini año' bʌ ti joctʌl tac, yic'ot jini año' bʌ ti Dor ti' tojel i bʌjlibal q'uin.

³ Tsi' choco ti subentel jini cananeojob am bʌ ti' pasibal q'uin yic'ot ti' bʌjlibal q'uin, yic'ot jini amorreojob, yic'ot jini heteojob, yic'ot jini ferezeojob, yic'ot jini jebuseojob am bʌ ti wits, yic'ot jini heveojob am bʌ ti yentʌlal Hermón ti' lumal Mizpa.

⁴ Ti pejtelel iliyi tsa' loq'uiyob majlel yic'ot pejtelel i soldadojob. Wen bajc'ʌlob che' bajche' ji' am bʌ ti ñajb, yic'ot cabʌl caballo tac yic'ot carreta tac cha'an guerra tujc'ʌbil bʌ majlel ti caballo.

⁵ Tsi' lajayob i t'an pejtelel ili yumʌlob. Tsa' c'otiyob ti jijlel ti ja' i c'aba' Merom cha'an mi' techob guerra ti' contra israelob.

⁶ Lac Yum tsi' sube Josué: Mach a bʌc'ñañob, come ijc'ʌl che' bajche' ili ora mi caj cʌc'ob ti jisʌntel ti' tojlel israelob. Mi caj la' tsepben i chijil i yoc i caballo tac. Mi caj la' pul jini carreta tac, che'en.

⁷ Ti ora jach Josué yic'ot i soldadojob tsi' contrajiyob ya' ti' t'ejl jini ja' am bʌ ti Merom.

⁸ Lac Yum tsi' yʌc'ʌyob ti' c'ʌb jini israelob. Tsi' tsʌnsayob. Tsi' yajñesayob majlel c'ʌlʌl ti colem bʌ Sidón, c'ʌlʌl ti Misrefotmaim, c'ʌlʌl ti joctʌl ba'an Mizpa ya' ti' pasibal q'uin. Tsi' tsʌnsayob. Ma'anix majqui tsa' cʌle.

⁹ Josué tsi' mele ti' tojlelob che' bajche' lac Yum tsi' yʌc'ʌ mandar. Tsi' tsepbe i chijil i yoc jini caballo tac. Tsi' pulu jini carreta tac.

¹⁰ Josué tsi' sutq'ui i bʌ yic'ot i soldadojob cha'an mi' contrajiñob jini año' bʌ ti Hazor. Ti wajali jiñʌch ñuc bʌ teclum tac. Josué tsi' ch'ʌmʌ jini tejclum. Tsi' tsʌnsa jini yumʌl.

¹¹ Tsi' tsʌnsa pejtelel jini cuxulo' bʌ. Tsi' pulu jini tejclum Hazor.

¹² Che'ʌch tsa' mʌjli i cha'an Josué ti' tojlel pejtel jini yumʌlob yic'ot i tejclum tac. Tsi' laj jisayob che' bajche' tsi' yʌc'ʌ mandar Moisés i winic lac Yum.

¹³ Jini israelob ma'anic tsi' puluyob jini tejclum tac an tac bʌ ti bujtʌl. Cojach Hazor tsi' pulu Josué.

¹⁴ Jini israelob tsi' ch'ʌmʌyob pejtelel jini wacax yic'ot chubʌ'añʌl an tac bʌ ti ili tejclum tac. Pero tsi' laj jisayob jini winicob x'ixicob. Ma'anix majqui tsa' cʌle.

¹⁵ Che' bajche' lac Yum tsi' yʌq'ue mandar Moisés i winic, Moisés tsi' cha' aq'ue mandar Josué. Che'ʌch tsi' mele Josué. Josué tsi' laj ts'ʌctesʌbe i mandar lac Yum che' bajche' tsi' sube Moisés.

¹⁶ Josué tsi' ch'ʌmʌ ti' wenta pejtelel ili tejclum tac: jini wits tac, pejtelel jini Neguev, pejtelel i lumal Gosén, jini joctʌl tac, jini Arabá, jini wits tac yic'ot joctʌl tac ti Israel.

¹⁷ Tsa' mʌjli i cha'an ti wits ba'an Seir c'ʌlʌl ti Baalgad am bʌ ti joctʌl i cha'an Líbano lʌc'ʌl ba'an jini wits i c'aba' Hermón. Tsa' mejli i tsʌnsan pejtelel i yumob jini tejclum tac.

¹⁸ Jal tsi' cha'le guerra Josué ti' tojlelob.

¹⁹ Jini jach jini heveojob año' bʌ ti Gabaón tsi' lajayob i t'an yic'ot Josué. Ma'anic yambʌ tejclum tsa' bʌ i yʌc'ʌ i bʌ ti' wenta Josué. Josué tsi' jisayob ti pejtelelob.

²⁰ Come che'ʌch tsi' ña'ta lac Yum cha'an mi' tsʌts'esʌbeñob i pusic'al i contrajob israelob cha'an mi' jisañob, cha'an ma'anic mi' p'untʌntelob. Che' jini lac Yum tsi' yʌc'ʌyob ti jisʌntel che' bajche' tsi' yʌq'ue mandar Moisés.

²¹ Ti jim bʌ ora Josué tsi' jisayob jini ch'ejl bʌ winicob año' bʌ ti wits tac, Hebrón, Debir, Anab, pejtelel jini wits tac am bʌ ti Judá, pejtelel jini wits tac am bʌ ti Israel. Josué tsi' jisayob jini winicob yic'ot i tejclum tac.

²² Tsa'ix i laj jisa jini ch'ejl tac bʌ winicob año' bʌ ti pejtelel jini lum tsa' bʌ i ch'ʌmʌyob ti' wenta jini israelob. Jini jach tsa' cʌleyob jini año' bʌ ti Gaza, yic'ot ti Gat, yic'ot ti Asdod.

²³ Che' jini Josué tsi' ch'ʌmʌ ti' wenta pejtelel jini lum. Tsa' ts'ʌctiyi pejtelel jini mandar che' bajche' lac Yum tsi' sube Moisés. Josué tsi' yʌq'ueyob jini lum israelob che' bajche' wʌn albil. Tsi' t'oxbeyob lum ti mojt ti mojt. Tsa' lajmi guerra. Ñʌch'ʌl tsa' ajniyob.