Jonas 4 - Chol: I T’an Dios

I mich'ajel Jonás

¹ Jini cha'an Jonás tsi' wen mele i pusic'al. Tsa' wen mich'a come Dios tsi' p'untayob.

² Tsi' pejca lac Yum ti oración. Tsi' sube: ¡Aj! c Yum, mic pejcañet. ¿Mach ba jiniqui tsa' bʌ c wʌn ña'ta che' bʌ ya'to añon tic lumal? Tsa cʌlʌ tic pusic'al ma'anic mi caj a jisañob come cujil Dioset, cujil cabʌl i yutslel a pusic'al. Ma' p'untan winicob x'ixicob. Jal ma' cuchbeñob i mul. Wen cabʌl a c'uxbiya. Mi' cha' uts'an a pusic'al che' wola' ña'tan a choc tilel wocol. Jini cha'an tsac ñopo puts'el majlel ti Tarsis.

³ Wʌle c Yum, a wocolic mic subeñet la'ix chʌmicon come mach tijicñayonic che' cuxulon to. Ñumen uts'at mi tsa' chʌmiyon, che'en.

⁴ Lac Yum tsi' sube: ¿I t'ojol ba ma' cha'len mich'ajel? ¿Che' ba yom ma' mel bajche' jini? che'en.

⁵ Jonás tsa' loq'ui ti tejclum. Tsa' buchle ti junwejl tejclum ya' ba' mi' pasel q'uin. Tsi' mele lejchempat. Tsa' buchle ti' yʌxñʌlel lejchempat cha'an mi' q'uel bajche' mi' caj ti jilel jini tejclum.

⁶ Lac Yum Dios tsi' chajpʌbe juntejc ac'. Tsi' cosa ya' ba'an lejchempat ame c'uñ'ac Jonás cha'an i c'uxel q'uin. Wen tijicña i pusic'al Jonás cha'an jini ac'.

⁷ Che' bʌ tsa' sʌc'a ti' yijc'ʌlal, Dios tsi' chajpa juncojt pechjol. Tsi' wilube i yebal jini ac'. Ti ora tsa' tiqui i yopol.

⁸ Che' bʌ tsa' pasi q'uin Dios tsi' choco tilel ticʌw bʌ ic' ch'oyol bʌ ti' pasibal q'uin. Jini q'uin tsi' pulbe i jol Jonás. Jini cha'an tsa' caji ti c'uñ'an pañimil. Tsi' c'ajtibe Dios cha'an mi' chʌmel. Tsi' sube: Uts'at mi tsa' chʌmiyon. Mach uts'atic che' cuxulon, che'en.

⁹ Jini cha'an Dios tsi' sube Jonás: ¿Yom ba ma' mich'an cha'an tsa cʌc'ʌ ti jilel jini ac'? che'en. Jonás tsi' sube: Yom cu mich'acon. La'ix chʌmicon, che'en.

¹⁰ Lac Yum tsi' sube: Wola' p'untan jini ac' tsa' bʌ chʌmi anquese mach a we'telic, mach a cosʌbalic. Ti jump'ejl jach ac'ʌlel tsa' coli. Ti jump'ejl jach ac'ʌlel tsa' jili.

¹¹ ¿Mach ba yomic mic p'untan Nínive jini colem tejclum? Ya' añob ñumen ti wʌcc'al ti mil winicob x'ixicob mach bʌ i cʌñʌyobic c t'an. Lajalob bajche' alʌlob mach bʌ anic mi' ña'tañob baqui bʌ i ñoj mi baqui bʌ i ts'ej. Ya'an cabʌl alʌc'ʌl tac ja'el, che'en lac Yum.