Jonas 3 - Chol: I T’an Dios

Jini año' bʌ ti Nínive tsi' sutq'uiyob i bʌ ti lac Yum

¹ Ti' cha'yajlel tsa' tili i t'an lac Yum ba'an Jonás:

² Ch'ojyen. Cucu ti Nínive, jini colem tejclum. Subeñob jini t'an mu' bʌ caj c subeñet, che'en.

³ Jini cha'an tsa' ch'ojyi Jonás. Tsa' majli ti Nínive che' bajche' tsi' sube lac Yum. Wen colem jini tejclum i c'aba' Nínive. Uxp'ejl q'uin ti xʌñol ti' xottilel.

⁴ Jonás tsa' caji ti ochel ti tejclum. Tsi' xʌñʌ majlel jump'ejl q'uin. C'am tsi' subu: Anto yom cha'c'al q'uin mi caj i jisʌntel Nínive, che'en.

⁵ Jini chumulo' bʌ ti Nínive tsi' ñopoyob Dios. Tsa' cajiyob ti ch'ajb. Tsi' laj lʌpʌyob coxtal, jini wen chumulo' bʌ yic'ot jini p'ump'uño' bʌ.

⁶ Tsa' c'oti jini t'an ba'an i yum Nínive. Tsi' cʌyʌ i buchlib ba' woli ti yumʌntel. Tsi' jocho i t'ojol jax bʌ i bujc. Tsi' xojo coxtal. Tsa' buchle ti' tʌñil c'ajc.

⁷ Tsi' cha'le mandar. Tsi' sube pejtel winicob x'ixicob ti Nínive: Che'ʌch woli' yʌc' mandar rey yic'ot año' bʌ i ye'tel: La' i cha'leñob ch'ajb winicob x'ixicob yic'ot i yʌlac' yic'ot wacax yic'ot tiñʌme'. Mach yomic chuqui mi' wis c'uxob. Mach yomic mi' c'uxob i bʌl i ñʌc'. Mach yomic mi' japob ja'.

⁸ La' i lʌpob coxtal winicob x'ixicob yic'ot i yʌlac'. La' i pejcañob Dios ti wocol t'an ti pejtelel i pusic'al. La' i cʌyob i jontolil ti jujuntiquilob. La' i cʌyob jontol bʌ i melbal i c'ʌb.

⁹ Mach la cujilic, tic'ʌl mi mux i q'uextan i pusic'al Dios cha'an mi' cʌy i mich'ajel, cha'an ma'anic mi lac jilel. Che' tsi' yʌc'ʌ mandar jini rey.

¹⁰ Che' bʌ tsi' q'uele Dios woli' cʌyob i jontolil, tsi' q'uexta i pusic'al. Ma'anic tsi' choco tilel wocol che' bajche' tsi' subeyob. Ma'anic tsi' jisayob.