Job 8 - Chol: I T’an Dios

Bildad tsi' subu toj Dios

¹ Tsa' caji ti t'an Bildad ch'oyol bʌ ti Suha.

² ¿Jala to mi caj a chʌn cha'len t'an che' bajche' jini? Lajal a t'an bajche' ic'.

³ ¿Mu' ba caj i ts'ot i bijlel Dios? ¿Mach ba tojic mi' cha'len meloñel ti pejtelel ora?

⁴ Che' bʌ tsi' cha'leyob mulil la' walobilob ti' tojlel Dios, tsi' yʌq'ueyob i toj i mul.

⁵ Jini cha'an yom ma' bʌx'an cha'an ma' sʌclan Dios. C'ajtiben i yutslel i pusic'al jini Mach bʌ Anic I P'isol I P'ʌtʌlel.

⁶ Che' jini che' sʌquet, che' tojet ja'el, mux i tilel i tajet. Mux i cha' aq'ueñet i tijicñʌyel a pusic'al ti a wotot.

⁷ Anquese ts'ita' jach a chubʌ'an che' ti ñaxan, Dios mi caj i p'ojlesʌbeñet che' ti wi'il.

⁸ C'ajtesan i cʌntesʌbal a tatob año' bʌ ti oñiyi. Cabʌl i ña'tʌbal ajñel. Ti' tojlel lac tat maxto anic lac pusic'al.

⁹ Poj ac'bi yilal tsa' laj q'uele pañimil. Lajalonla bajche' axñal mu' bʌ i puts'el. Che'ʌch mi lac ñumel ti pañimil.

¹⁰ An cabʌl i pusic'al lac ñojte'el. Wen yujilob cʌntesa.

¹¹ ¿Yujil ba colel jam ti tiquin lum? ¿Mach ba anic mi' colel ba' ach' jini lum?

¹² Ya' ba' woli' colel mi' bʌc' tiquin i yopol che' ma'anic mi' taj ja'.

¹³ Lajal jini winic mu' bʌ i cʌy Dios. Mach i tajayic chuqui mi' pijtan.

¹⁴ Mach p'ʌtʌlic come ma'anic i xuc'tilel i pusic'al. Lajal i c'unlel bajche' i jalbal am.

¹⁵ Jini winic mu' bʌ i cʌy Dios mi' lon ña'tan xuc'ul i yotot, pero mi' caj ti yajlel. Che' mi' ñʌctan pajc', mi' caj ti jejmel.

¹⁶ Lajalʌch winic bajche' ac' mu' bʌ i pam colel ti corral.

¹⁷ Chucul i wi' ti' jajp ts'ʌlʌl bʌ xajlel.

¹⁸ Che' mi' bojquel ya' ba' chucul, mach chʌn tsiquilix i yajñib ba' tsa' coli.

¹⁹ Ya' ba' tsa' poj coli mux i pasel pimel.

²⁰ Ña'tan che' jini Dios ma'anic mi' choc loq'uel jini toj bʌ. Ma'anic mi' cʌy i mʌctan jini jontolo' bʌ.

²¹ Mu' to caj i yʌq'uet ti tse'ñal yic'ot tijicña bʌ. Mi caj a cha'len t'an ti' tijicñʌyel a pusic'al.

²² Mux i yubiñob quisin jini mu' bʌ i ts'a'leñetob. Mi' caj ti jilel i yotot jini xjontolil. Che' tsi' yʌlʌ Bildad. Tsa' ujti ti t'an.