Job 7 - Chol: I T’an Dios

Job tsi' letsa i t'an ti' contra Dios

¹ ¿Mach ba cabʌlic mi laj cuch wocol ti pañimil? Mi' joloñel laj q'uiñilel che' bajche' i q'uin x'e'telob mu' bʌ i ch'ʌmob i tojol.

² Jal mic pijtan cha'an mi' bʌjlel majlel q'uin. Lajalon bajche' x'e'tel jal bʌ mi' pijtan i tojol cha'an i ye'tel.

³ Cabʌlix uw wolij cuch wocol. Ti jujump'ejl q'uin wocol mic ñusan ac'ʌlel.

⁴ Che' mic ñoltʌl, wocol mic pijtan i yorajlel ch'ojyel. Cabʌl mic ñijcan c bʌ cha'an c'ux c bʌc'tal. Jal mi' sʌc'an.

⁵ Bibi'on, mi' p'ojlel motso' tic pʌchilel. Sit'il c pʌchilel c'ʌlʌl mi' cha' cajel ti loq'uel i pujwil.

⁶ Jumuc' jach woliyon ti ñumel ti pañimil. Ora jax mi' ñumel q'uin tac che' bajche' i jaloñib jini wen yujil bʌ jalbal. Wolic ñox'an. ¿Chuqui to mic chʌn pijtan ti pañimil?

⁷ Ña'tan, lajal j cuxtilel bajche' junjajts' ic'. Ma'anix mi caj c taj tijicña bʌ.

⁸ Jini mu' bʌ i q'uelon wʌle mach sujtix i cha' q'uelon. Mi caj a cha' ña'tan a q'uelon, pero ma'anix tsiquilon.

⁹ Che' bajche' tocal mu' bʌ i lon julel ma'anix tsiquil, che' ja'el jini mu' bʌ i jubel ti' yajñib chʌmeño' bʌ ma'anic mi' cha' tilel.

¹⁰ Mach chʌn sujtix ti' yotot. Mach i q'ueleyobix jini año' bʌ ti' yotot.

¹¹ Jini cha'an ma'anic mic tic' c t'an. Mic cha'len t'an cha'an ch'ijiyem c pusic'al. Mach cujchix c cha'an ili wocol. Mi' yochel i ch'ajel tic pusic'al.

¹² ¿Lajalon ba bajche' colem ñajb? ¿Lajalon ba bajche' jontol bʌ chʌy yujil bʌ jisaya mu' bʌ a wersa tic'?

^13-14 Che' comix wʌyel cha'an mi' ts'ita' ñajʌyel c cha'an wocol, ma' bʌc'tesañon ti ñajal. Che' comix c'aj co tic wʌyib, ma' wʌq'ueñon j q'uel bʌbʌq'uen tac bʌ.

¹⁵ Ñumen uts'at mi tsa' jujch'iyon. Ñumen uts'at mi tsa' chʌmiyon cha'an mi' junyajlel lajmel c tic'lʌntel.

¹⁶ C'ojyemonix. Mach comic jalijel ti pejtelel ora. La' ajñicon tic bajñel, come ma'anix c cha'an cabʌl q'uin.

¹⁷ ¿Am ba i c'ʌjñibal winic cha'an ma' q'uel ti ñuc? ¿Chucoch ma' p'is ti wenta?

¹⁸ Ma' q'uelon ti jujump'ejl q'uin. Ma' wilʌbeñon c pusic'al jujump'ejl ora.

¹⁹ ¿Baqui to ora mi caj a poj cʌyon tic bajñelil cha'an mic choc c tujb?

²⁰ Jatet ma' q'uel pejtel winicob. Mi tsac cha'le mulil, ¿chuqui c mul? ¿Chuqui tsac tumbeyet? ¿Chucoch tsa' yajcayon cha'an ma' julon ti jalʌjb? Mic lon p'ojlesʌbeñet a we'tel.

²¹ Yom ma' ju'sʌbeñon c pusic'al mi wolic chañ'esan c bʌ. Ñusʌbeñon c mul. Pocoyon. Come mach jalix mi caj c chʌmel. Che' ma' tilel a tajon ma'añonix. Che' tsi' yʌlʌ Job.