Job 5 - Chol: I T’an Dios

¹ C'ajtin a coltʌntel ti wocol t'an. Q'uele mi an majqui mi caj i jac'. ¿Am ba juntiquil ch'ujul bʌ mu' bʌ mejlel i coltañet?

² Jini tonto bʌ mi' bajñel tsʌnsan i bʌ ti mich'ajel. Jini mu' bʌ i lon mich'len i pi'ʌlob cha'an tsʌytsʌyña i pusic'al mi' bajñel jisan i bʌ.

³ Jini mu' bʌ i cʌyob Dios tic'ʌl mi poj jumuc' mi' tajob chuqui yomob, pero mi' bʌc' tilel wocol i jisañob.

⁴ P'ump'un mi' cʌytʌlob i yalobilob. Mi' tic'lʌntelob. Ma'anic majqui mi' p'untañob.

⁵ Mi' xujch'ibentelob i c'ajbal. Yaño' bʌ mi' c'uxob. Mi' jisʌbeñob i taq'uin.

⁶ Mach tilemic ti lum lac wocol. Ti' caj i mul winicob mi' tajob wocol cha'an woli' c'ajob chuqui tac jach tsi' pʌc'ʌyob.

⁷ I tilel mi' lejmel c'ajc che' tsuc'bil. I tilel mi' tajob wocol winicob c'ʌlʌl che' alʌlob to.

⁸ Muq'uic c taj wocol che' bajche' jatet, mic sʌclan Dios. Mic junyajlel ac' c bʌ ti' wenta.

⁹ Wen yujil i melol chuqui tac ñuc yic'ot chuqui tac uts'at. Ma'anix i p'isol i ñuclel, wen ñuc tac i ye'tel.

¹⁰ Mi' choc tilel ja'al cha'an mi' yʌch'esan jini lum.

¹¹ Mi' coltan jini utso' bʌ i pusic'al yic'ot p'ump'uño' bʌ. Mi' pʌyob loq'uel ti wocol cha'an mi' yʌq'ueñob tijicña bʌ.

¹² Mi' mʌctan jini jontolo' bʌ che' an chuqui woli' ña'tañob i mel.

¹³ Mi' yʌc'ob ti chujquel ya' ti yac mu' bʌ i lon chajpañob cha'an mi' chucob yambʌ i pi'ʌl. Mi' jembeñob i pensar che' an chuqui leco mi' lon ña'tañob i mel.

¹⁴ Ti q'uiñil mi' cha'leñob xʌmbal ti ic'ch'ipan bʌ pañimil. Lajlajña mi' majlelob yilal che' bajche' xpots'. Lajal jach mi' melob ti q'uiñil che' bajche' ti ac'ʌlel. Mach yujilobic bajche' mi caj i yujtel i ye'tel.

¹⁵ Dios mi' coltan meba' alʌlob yic'ot p'ump'uño' bʌ cha'an mi' loq'uelob ti' c'ʌb jini woli bʌ i tic'lañob.

¹⁶ Che' jini xuc'ul mi caj i tajob tijicña bʌ. Pero mi caj i jilel i p'ʌtʌlel jini yujil bʌ jisaya.

¹⁷ Tijicñayonla che' toj'esʌbilonla cha'an lac Yum. Jini cha'an mach ma' ts'a'len lac Yum che' mi' ju'sʌbeñet a pusic'al ti wocol.

¹⁸ Wocol mi la cubin che' mi' lowonla Dios, pero mi caj i pixbeñonla lac lojwel cha'an mi lac cha' lajmel.

¹⁹ Ma'anic mi caj a wʌjq'uel ti jilel anquese mi' cʌlʌx tajet wocol. Jujunyajl mi caj i coltañet loq'uel.

²⁰ Mi caj i cʌntañet che' ti' yorajlel wi'ñal ame chʌmiquet. Mi caj i cʌntañet che' ti' yorajlel guerra ame jejq'uiquet ti espada.

²¹ Mi caj i cʌntañet che' mi' pʌq'uetob ti mulil. Mach a bʌc'ñan jini wocol mu' bʌ caj i tilel.

²² Anquese mi' p'ojlel guerra yic'ot wi'ñal mux caj a cha'len tse'ñal, come ma'anic chuqui mi caj i tumbeñet. Che jach mi caj i ñusañet jini jontol bʌ bʌte'el.

²³ Anquese wen jontol, uts mi caj i c'axel ti a t'ejl. Jini pañimil ja'el mi caj i pʌsbeñet i yutslel.

²⁴ Ma'anic chuqui mi caj a bʌc'ñan. Ma'anic majqui mi caj i tic'lan a wotot che' an ba' ma' majlel. Ma'anic majqui mi caj i xujch'ibeñet a wʌlac' mi i bʌlic a ñʌc' lotol bʌ a cha'an.

²⁵ Mi caj i q'uejlelob ti ñuc a walobilob. Mi caj i p'ojlelob che' bajche' jam.

²⁶ Che' bajche' mi' cujchel tilel ixim ba' mi' lʌjt'el ti' yorajlel c'ajbal, che'ʌch mi caj a tilel ti mucoñibʌl che' wen ñoxetix.

²⁷ Cujil isujm ili woli bʌ c subeñet. Mi a wom a taj tijicña bʌ, jac'beñon c t'an, che'en Elifaz.