Job 41 - Chol: I T’an Dios

¹ ¿Mejl ba a luc loq'uel ajin ti a lucojib? ¿Mejl ba a cʌchben i yac' ti' xʌc'ti' yic'ot lazo?

² ¿Mejl ba a julben i ni' ti lazo? ¿Mejl ba a jec'ben i xʌc'ti' ti lanza lawux?

³ ¿Mu' ba i c'ajtibeñet ti wocol t'an cha'an ma' p'untan? ¿Mu' ba i pejcañet ti uts bʌ t'an?

⁴ ¿Mu' ba i yʌc' i bʌ ti a wenta cha'an ma' c'ʌn ti to'ol e'tel jinto mi' chʌmel? ¿Mu' ba i bʌc'ñañet?

⁵ ¿Mejl ba a wuts'esan che' bajche' te'lemut? ¿Mu' ba caj a wʌq'ueñob xch'oc bʌ a walobilob cha'an mi' yʌsiñob?

⁶ Jini xchuc chʌyob, ¿mu' ba caj i chombeñob jini mu' bʌ i cha' choñob? ¿Mu' ba caj i t'oxbeñob i pi'ʌlob cha'an mi' c'uxob?

⁷ Mi tsa' julbe i pʌchilel ti lucojib o mi tsa' julbe i jol ti lanza te', ¿mu' ba caj i yubin?

⁸ Mi tsa' wʌc'ʌ a c'ʌb ti' jol, mi caj a chʌn ña'tan chuqui tsi' tumbeyet. Jasʌl junyajl. Mach cha'yajlic mi caj a mel.

⁹ Lolom jach ma' ñop a chuc. Bʌbʌq'uen jax majqui mi' lon ñop i chuc.

¹⁰ Ma'anic majqui mi' lon ña'tan i ñijcan. Jini tonto bʌ ja'el mi' bʌc'ñan. Mi che'ʌch i bʌc'ñʌntel, ¿mach ba anic c bʌc'ñʌntel ja'el? ¿Majqui mi' wa'tʌl tic tojlel?

¹¹ ¿Am ba ba' tsajniyon ti c'ajtiya? ¿Am ba chuqui tsac majña mu' bʌ caj c cha' sutq'uin? Pejtel chuqui an ti yebal panchan c cha'añʌch.

¹² Yom mic subeñet ja'el bajche' an i bontʌlel yic'ot bajche' c'amel an i p'ʌtʌlel i cuctal yic'ot i yoc.

¹³ Ti pejtelel ora ma'anic majqui tsi' ts'ulbe i pʌchilel. Ch'ʌjyatax i pʌchilel. Ma'anic majqui tsi' sʌl jec'be i sujl.

¹⁴ ¿Majqui mi mejlel i jamben i yej? Bʌbʌq'uen jax i bʌquel i yej.

¹⁵ Jini i sujl am bʌ ti' pat mi' ñʌp' i bʌ ti lajm ti lajm. Wen lʌp'ʌl tac che' bajche' sello.

¹⁶ Mach ñumic ic' ya' ba' lʌp'ʌl tac i sujl.

¹⁷ Ma'anic chuqui mi mejlel ti ñumel. Ma'anic majqui mi mejlel i ts'ulben i sujl.

¹⁸ Chʌ'ʌch yilal i ja'tsijn bajche' i nich c'ajc. Añʌch i c'ʌc'al i wut che' bajche' i c'ʌc'al q'uin ti sʌc'an.

¹⁹ Mi' loq'uel c'ajc ti' yej yic'ot i nich tac c'ajc.

²⁰ Mi' loq'uel ic' ti' ni' che' bajche' i yowix ja' woli bʌ ti lojc ti p'ejt c'ʌcʌl bʌ ti yoquejt ya' ba' woli' pulel jomojch'.

²¹ I yiq'uilel i yej mi' xic' c'ajc ba' ñʌch'ʌl abʌc. Mi' loq'uel c'ajc ti' yej.

²² Cabʌl jax i p'ʌtʌlel i bic'. Baqui jach mi' majlel mi' toj sajtel i pusic'al majqui jach mi' lʌc' i bʌ. Mi' c'un'an pañimil ti bʌq'uen.

²³ Mi' pʌc i bʌ i pʌchilel. Ch'ʌjyatax i bʌc'tal. Ma'anic i lewil.

²⁴ Tsʌts i pusic'al che' bajche' xajlel, che' bajche' ña'tun.

²⁵ Che' mi' letsan i jol, mi' cajelob ti bʌq'uen jini p'ʌtʌlo' bʌ. Mi' toj sajtelob i pusic'al.

²⁶ Lolom jach mi lac jul ti espada mi ti machit mi ti yan tac bʌ e'tijibʌl. Ma'anic mi' mʌy i bʌ.

²⁷ Jini fierro lajal jach mi' q'uel bajche' jam mach bʌ wisilic i p'ʌtʌlel. Jini chʌchʌc taq'uin lajal jach bajche' i yoc'beñal te'.

²⁸ I te'el lac jalʌjb mi' lon taj. I tuñil lac pʌrʌntun lajalʌch ti' wut bajche' tiquin bʌ jam.

²⁹ Lajal mi' q'uel jini jats'onib te' bajche' amuy. Che' sʌrʌcña mi' yubiben i yiq'uilel machit, mu' jach i wajlen.

³⁰ Che'ʌch i yebal bajche' i sajl tac uc'um. Baqui jach mi' ñumel mi' cʌytʌl i yejtal tac i ñʌc' ti oc'ol.

³¹ Ya' ba' mi' ñijcan i bʌ mi' cajel ti lojc ja' che' bajche' ti p'ejt am bʌ ti c'ajc. Mi' tit'esan jini colem ñajb che' bajche' ts'ac am bʌ ti limete.

³² We'ecña ja' ya' ba' tsa' ñumi. Sʌc i lojc che' bajche' i tsutsel xñoxob.

³³ Ti pejtelel pañimil ma'anic yambʌ bʌc'ñʌbil bʌ bajche' jini. I bajñel mach yujilic bʌq'uen.

³⁴ Mi' ts'a'len chuqui tac wen chan. I yumʌch pejtel mu' bʌ i chañ'esañob i bʌ. Che' tsi' yʌlʌ lac Yum.