Job 40 - Chol: I T’an Dios

^1-2 Lac Yum tsi' chʌn pejca Job: Jini woli bʌ i yʌ'leñon, ¿yom ba ochel ti leto yic'ot jini Mach bʌ Anic i P'isol i P'ʌtʌlel? Jini yom bʌ i yʌ'len Dios, la' i sub, che'en lac Yum.

^3-4 Job tsi' jac'be lac Yum: Awilan, ¿chuqui j c'ʌjñibal? ¿Chuqui mi mejlel c sub? Mic mʌc quej. Ñʌch'ʌlon.

⁵ Tsa'x c cha'le t'an pero mach yomix mic cha' sub. Cha'yajlix tsac cha'le t'an pero jasʌlix. Mach chʌn comix, che'en.

I tsictesʌntel i p'ʌtʌlel Dios

^6-7 Lac Yum tsi' sube Job ti sutujt ic': Cʌchʌx a bʌ. Pʌsʌ a bʌ ti ch'ejl che' bajche' winic. An chuqui com c'ajtibeñet. Jac'beñon.

⁸ ¿Mu' ba a ña'tan mach tojonic? ¿Mu' ba a ña'tan an c mul? ¿Mu' ba a sub a bʌ ti toj?

⁹ ¿Lajal ba a c'ʌb bajche' i c'ʌb Dios? ¿Mejl ba a cha'len t'an che' bajche' i t'an chajc?

¹⁰ Pʌsʌ a bʌ ti ñuc che' bajche' rey mu' bʌ i yumañob winicob. Tsictesan a ñuclel cha'an mi' wersa jac'ob a mandar.

¹¹ Pʌsʌ a bʌ ti mich' cha'an mi' ch'ujbiñetob jini chaño' bʌ. Ju'sʌbeñob i pusic'al.

¹² Q'uele jini chaño' bʌ i pusic'al. Chocoyob jubel. Jisan xjontolilob ya' ba' wa'alob.

¹³ Laj mucuyob ti ts'ubejn. Ñup'uyob ba'an chʌmeño' bʌ.

¹⁴ Mi awujil melol che' bajche' jini, mux c sub ñuquet, come che' jini mi mejlel a bajñel coltan a bʌ.

¹⁵ Q'uele jini colem bʌte'el am bʌ ti ja'. C melbalʌch che' bajche' jatet. Mi' c'ux pimel lajal bajche' wacax.

¹⁶ Q'uele i ya' yic'ot i pat ba' chucul tac i bʌc'tal.

¹⁷ Che' mi' sʌts' i ñej che'ʌch yilal bajche' ch'ujte'. Jalbil tac i chijil i bʌc'tal i ya'.

¹⁸ Lajal i bʌquel bajche' tubo tac melbil bʌ ti tsucu taq'uin. Lajal i yoc bajche' barrilla tac melbil bʌ ti fierro.

¹⁹ Wen jontol jax, ñumen bajche' yan tac bʌ bʌte'el tsa' bʌ i mele Dios. Jini yom bʌ i yuts'esan, la' i ch'ʌm tilel espada.

²⁰ Jini mate'el mi' yʌq'uen chuqui tac jach yom i c'ux ya' ba' mi' tilelob ti xʌmbal pejtel bʌte'el.

²¹ Mi' cottʌl ti amuyol ti' ti' ja', mucul ti yebal colem tac bʌ i yopol.

²² Jini te' am bʌ colem bʌ i yopol mi' mʌc ti' yʌxñilel. Jini tsu'um am bʌ ti' t'ejl pa' mi' joye'.

²³ Che' mi' bujt'el ja' mach yujilic bʌq'uen, come wen ajñel mi' majlel. Mi tsi' wets'e jini Jordán ja' ti' tojel i wut, xuc'ul i pusic'al.

²⁴ Ti pejtelel ora yʌxʌl i yo che' mi' tajob winicob. ¿Mejl ba i chucob ti yac? ¿Mejl ba i cʌchbenob i ni' cha'an mi' pʌyob majlel?