Job 4 - Chol: I T’an Dios

Elifaz tsi' tiq'ui Job

¹ Tsa' caji ti t'an Elifaz, jini ch'oyol bʌ ti Teman. Tsi' yʌlʌ:

² ¿Ch'ijiyem ba mi caj a wubin mi tsac pejcayet? Wersa com c cha'len t'an. Mach mejlic c tic' c bʌ.

³ Ti yambʌ ora jatet tsa' cʌntesa cabʌlob. Tsa' p'ʌtesʌbeyob i c'ʌb jini c'uño' bʌ.

⁴ Ti a t'an tsa' colta ti wa'tʌl jini wolix bʌ ti yajlel. Tsa' ch'ejl'esa jini mach bʌ wenic i pix.

⁵ Wʌle tsa'ix tili wocol ti a tojlel. Mach cujchic a cha'an. Woli' tajet wocol. Ch'ijiyem a pusic'al.

⁶ Wʌle che' an a wocol, ¿mach ba anic a pijtaya ti Dios? Dios mi' cʌntan jini tojo' bʌ. ¿Mach ba yomic ma' chʌn ñop Dios ti' xuctilel a pusic'al?

⁷ Yom ma' wen ña'tan, ma'anic mi' lon jilel jini toj bʌ mi juntiquilic. ¿A cʌñʌ ba juntiquil toj bʌ tsa' bʌ chojqui ti wocol?

⁸ Cujil chuqui tac mi lac pʌc' mi lac wersa c'aj. Jini mu' bʌ i pʌc'ob jontolil, mu' bʌ i cha'leñob tic'laya, jini jach mi caj i c'ajob.

⁹ Dios mi' yʌ'leñob. Jini cha'an mi' jilelob. Lajal i t'an bajche' p'ʌtʌl bʌ ic' mu' bʌ i jisañob.

¹⁰ Dios mi' tic'ben i t'an bajlum yujil bʌ jontolil. Mi' c'ʌsben i bʌquel i yej i yal bajlum.

¹¹ Mi' chʌmel ti wi'ñal tat bajlum yic'ot ña' bajlum. Mi' pam pujquel i yal.

^12-13 An chuqui tsa cubi ti mucul. Tsa' caji c ñich'tan che' wen wʌyʌlob c pi'ʌlob. An chuqui tsa' caji j q'uel, che' cañal to c wut woliyon ti tsic pusic'al.

¹⁴ Tsa' cajiyon ti bʌq'uen. Tsiltsilña c bʌc'tal.

^15-16 Che' bajche' an chuqui wa'al tic tojlel tsa cubi, pero ma'anic tsiquil tsaj q'uele. Tsi' wejlubeyon c wut che' bajche' ic'. Mulucña c pʌchilel. Ñʌch'ʌlon tsa cubibe i t'an.

¹⁷ ¿Am ba toj bʌ winic ti' tojlel Dios? ¿Am ba sʌc bʌ winic ti' tojlel xMel winicob?

¹⁸ Dios ma'anic tsa' mejli i yʌc' ti ñuc ti' pusic'al jini ángelob. Tsi' tajayob ti mulil jini x'e'telob i cha'an.

¹⁹ ¿Mach ba ñumen anic i mul winicob? Melbilob i bʌc'tal yic'ot i ts'ubeñal lum. Lajal mi' jejmelob che' bajche' i c'u' mut.

²⁰ Ti sʌc'an c'oc'ob to, ti ic'an ma'añobix. Mi bʌc' chʌmelob, ma'anix mi' cha' sujtelob, pero ma'anic majqui mi' p'is ti' wenta.

²¹ Ti ora mi' chʌmelob che' maxto anic i ña'tibal.