Job 39 - Chol: I T’an Dios

¹ ¿Awujil ba che' mi' tojp'el jini chivo am bʌ ti wits? ¿Tsa' ba a q'uele ña' me' ti bajq'uel?

² ¿Jayp'ejl uw cʌntʌbil i yal? ¿Awujil ba baqui ora mi' tilel ti pañimil? Mi' lutschocon i bʌ,

³ mi' yʌc' i yal. Mi' cha' wen'an.

⁴ P'ʌtʌl tac i yal. Mi' colelob ti jamil. Mi' majlelob. Ma'anix mi' chʌn sujtelob.

⁵ ¿Majqui tsi' cʌntesa jini burro mach bʌ anic i yum? Yilol jach mi' ñumel baqui jach yom.

⁶ Tsac pʌsbe ba' jaxʌl mi' majlel ti tiquin lum. Ya' mi' yajñel ti ja'lumil am bʌ i yʌts'mil.

⁷ Mi' puts'tan xchumtʌl. Ts'a' mi' yubiben i t'an xwets'oñel.

⁸ Mi' ñumel i sʌclan jam ti wits. Mi' majlel baqui jach mi' taj pimel.

⁹ ¿Yom ba i coltañet jini jontol bʌ wacax? ¿Mu' ba i jal'an jump'ejl ac'ʌlel mi tsa' pʌsbe i bʌl i ñʌc' ti buc'ujib?

¹⁰ ¿Mejl ba a cʌch ti te' cha'an mi' pic majlel lum? ¿Mejl ba a cʌntesan cha'an mi' top' lum ya' ba' a wom?

¹¹ ¿Ñuc ba ti a pusic'al cha'an cabʌl i p'ʌtʌlel? ¿Mu' ba caj a pijtan jinto mi' ch'ʌmbeñet tilel a c'ajbal?

¹² ¿Mu' ba caj i cuchbeñet tilel trigo cha'an mi' tempʌbeñet ya' ba' mi' jajts'el?

¹³ Tsʌts mi' les i wich' jini ja'al pech avestruz. Pero mach cha'anic i yutslel i pusic'al.

¹⁴ Mi' cʌy i tun cha'an mi' tojp'el ba' tiquin ji'.

¹⁵ Mi' junyajlel cʌy ba' bʌbʌq'uen mi' t'uchtʌntel. Mi tsa' ñumi bʌte'el bʌbʌq'uen mi' pets' t'uchtan.

¹⁶ I ña'al mut ma'anic mi' p'untan i tun. Mach i cha'anic i yal yubil. Ma'anic mi' wis ña'tan mi lolom jach i ye'tel.

¹⁷ Dios tsi' chilbe i ña'tibal. Ma'anic tsi' yʌq'ue i pusic'al.

¹⁸ Che' mi' les i wich', numen ora mi' majlel bajche' winic c'ʌchʌl bʌ ti caballo.

¹⁹ ¿Mu' ba a wʌq'uen i p'ʌtʌlel jini caballo yujil bʌ guerra? ¿Mu' ba a wʌq'uen i tijcan i tsutsel i bic'?

²⁰ ¿Mu' ba a suben tijp'el che' bajche' sajc'? Mi' bʌc'tesan winicob che' pusiña i ni'.

²¹ Mi' jats' i yoc ti lum cha'an yomix majlel ti guerra. Tijicña i pusic'al cha'an cabʌl i p'ʌtʌlel. Mach yujilic bʌq'uen.

²² Mi' tse'tan jini bʌbʌq'uen jax bʌ. Ma'anic mi' mel i pusic'al. Ma'anic mi' xoy i bijlel che' mi' q'uel espada. Chec'law i yotot jalʌjb am bʌ ti' t'ejl.

²³ Mi' ñijcuyel i yotot jalʌjb ti' t'ejl i contra. Sʌcleman i ñi'il espada yic'ot jec'oñib.

²⁴ Woli ti lujt'el i bʌc'tal cha'an yom jax majlel. Yomix majlel ti ajñel cha'an tsa'ix i yubibe i t'an trompeta.

²⁵ Che' mi' wustʌl trompeta tijicña mi' cajel ti t'an. Mi sic' jini guerra che' ñajt to woli' tilel. Mi' yubibeñob i t'an capitañob yic'ot soldadojob.

²⁶ Che' mi' letsel ti chan jini gavilán cha'an mi' majlel ti sur, ¿cha'an ba a ñatibal mi' toj'esan majlel i bʌ?

²⁷ Jixcu jini xiye' mu' bʌ i mel i c'u' ti chan, ¿cha'an ba a mandar mi' mel?

²⁸ Mi' cottʌl ti pam xajlel ti' chanlel colem wits. Mi' chumtʌl ti' jajp xajlel ba' mach i tajayic i contra.

²⁹ Mi' chijtan i bʌl i ñʌc'. Ti ñajtʌl mi' q'uel.

³⁰ Wo'atax i yal, mi' mʌsan i ch'ich'el i we'el. Ya' ba' mi' tsʌnsʌntel i colojm ya'ix an i tat, che'en lac Yum.