Job 34 - Chol: I T’an Dios

Eliú mi' tsictesan tojʌch Dios

^1-2 Eliú woli' to i chʌn sub: Ubinla c t'an winicob cabʌl bʌ la' pusic'al. Mi añʌch la' pusic'al ñich'tañon.

³ Come lac chiquin mi' cha'len probar che' mi la cubin t'an. Che' ja'el la quej mi' majts'an i bʌl lac ñʌc'.

⁴ La' lac yajcan chuqui uts'at ti jujuntiquilonla. La' lac tem ña'tan chuqui toj.

⁵ Come Job tsi' subu i bʌ ti toj. Tsi' lon alʌ tsa'ix i chilbe meloñel Dios.

⁶ Anquese toj mi' bajñel q'uel i bʌ Job, pero xlot ti lac wut. Woli' q'uel i bʌ ti uts'at, pero añʌch i lojwel mach bʌ yujilic lajmel.

⁷ ¿Am ba yambʌ winic lajal bʌ i mul bajche' Job? Mi' cha'len p'ajoñel che' bajche' mi' jap ja'.

⁸ Mi' pi'len ti mulil xjontolilob. Temel mi' majlel yic'otob.

⁹ Tsi' yʌlʌ mach lac tajayic lac wenlel ti Dios.

¹⁰ Jini cha'an ubinla c t'an, winicob año' bʌ la' pusic'al. Ti pejtelel ora ma'anic mi' wis cha'len mulil Dios. Jini P'ʌtʌl bʌ Mach bʌ Anic i P'isol i P'ʌtʌlel mach yujilic jontolil.

¹¹ Bajche' jach mi' mel winic, mi caj i yʌq'uentel i chobejtʌbal ti Dios. Che' bajche' yom lac melbal che'ʌch mi caj la' cʌq'uentel.

¹² Isujm, mach yujilic jontolil Dios. Jini P'ʌtʌl bʌ Mach bʌ Anic i P'isol i P'ʌtʌlel mi' melonla ti toj.

¹³ ¿Majqui tsi' yʌq'ue i ye'tel ti pañimil? I bajñel tsi' wa'choco pejtel pañimil.

^14-15 Tsa'ic i chilbeyonla i yEspíritu, tsa' laj chʌmiyonla ti pejtelonla. Tsa'ic i cha' ch'ʌmʌ i yEspíritu yic'ot i yiq'uilel i yej, tsa' sujtiyonla ti ts'ubejn.

¹⁶ Mi an a ña'tibal ubin jini. Ñich'tan chuqui wolic sub.

¹⁷ Jini Yujil bʌ Meloñel, ¿mu' ba caj i ts'a'len chuqui toj? ¿Mach ba ñuquic ti a pusic'al jini mero Toj Bʌ?

¹⁸ Jiñʌch mu' bʌ i yʌ'len jini ñuco' bʌ año' bʌ i ye'tel ti pañimil. Mi' subeñob i mul. Mach yujilic bʌq'uen.

¹⁹ Mach jejchoquic jach mi' q'uel winicob. Junlajal mi' pʌsbeñob i yutslel jini pobrejob yic'ot jini wen chumulo' bʌ. Junlajal i melbalonla.

²⁰ Ti jujumuc' an bʌq'uen mi lac chʌmel ti q'uiñil yic'ot ti ac'ʌlel. Jini chano' bʌ yic'ot jini pec'o' bʌ mi' ñijcuyelob, mi' jilelob. Jini año' bʌ i ye'tel mi' loq'uelob ti' ye'tel che' bajche' wʌn ña'tibil ti Dios.

²¹ Dios mi' laj cʌmben i bijlel winicob. Mi' p'is ti wenta pejtel chuqui mi lac cha'len.

²² Ma'anic ic'ch'ipan bʌ pañimil ba' mach c'otic i wut. Ma'anic ba' mi mejlel i mucob i bʌ xjontolilob.

²³ Ma'anic mi' wʌn subeñonla Dios baqui ora mi caj i pʌyonla ti meloñel. I bajñel yujil chuqui woli' mel.

²⁴ Ma'anic mi' wʌn sub che' mi caj i jisan jini p'ʌtʌlo' bʌ. Mi' chilbeñob i ye'tel. Mi' yʌq'uen yaño' bʌ.

²⁵ Wen cʌñʌl ti Dios pejtel i ye'tel ili yumʌlob. Mi' chocob loq'uel ti' ye'tel ti jump'ejl jach ac'ʌlel mach bʌ wʌn ña'tibilic i cha'añob. Mi' jisañob.

²⁶ Mi' jats' jini xjontolilob ti' wutob i pi'ʌlob.

²⁷ Come tsi' cʌyʌyob i tsajcan Dios. Mach ñuquic ti' pusic'alob i bijlel Dios.

²⁸ Pero Dios tsi' yubibeyob i yuq'uel jini p'ump'uño' bʌ. Tsi' yubibeyob i t'an jini tic'lʌbilo' bʌ.

²⁹ Mi ñʌch'ʌl jach Dios, ¿yom ba mi lac jop'ben i mul? Mi tsi' mʌyʌ i wut, ¿bajche' mi caj laj q'uel? Dios mi' chʌcʌ q'uelonla ti jujuntiquilonla. Mi' q'uel pejtel winicob ti mojt ti mojt.

³⁰ Mi caj i loc'sañob ti' wenta jini yumʌl mach bʌ anic mi' bʌc'ñan Dios cha'an mi' yʌc'ob ti colel ba' tsʌts chuculob che' bajche' ti yac.

³¹ Jatet, Job, yom ma' suben a mul Dios. Suben che' bajche' jini: “Tsa'ix cubi wocol. Tsa'ix a ju'sʌbeyon c pusic'al. Mach chʌn comix c cha'len mulil”. Che'ʌch yom ma' suben.

³² C'ajtiben Dios a cʌntesʌntel cha'an mi' tsictesʌbeñet a mul maxto bʌ a ña'ta.

³³ Che' jini mux i subeñet bajche' c'amel yom ma' toj a mul. ¿Mach ba che'ic yom? Cha'len yajcaya jatet. An ti a wenta. Subeñon bajche' wola' ña'tan.

^34-35 Winicob año' bʌ i pusic'al mi caj i subeñon sojquem i jol Job. Majqui jach mi' ch'ʌmben isujm mi caj i yʌl mach cu anic i pusic'al.

³⁶ Joñon mi cʌl: La'to i yubin wocol Job. La' i toj i mul. Come lajal mi' cha'len t'an bajche' xjontolilob.

³⁷ Chan mi' mel i bʌ. Mi' contrajiñonla. Mi yutsi p'ojlesan i t'an ti' contra Dios, che'en Eliú.