Job 32 - Chol: I T’an Dios

Eliú mi' yʌl an ti' wenta cha'an mi' jac'ben Job

¹ Jini cha'an ma'anix tsi' chʌn jac'beyob i t'an Job jini uxtiquil, come tsi' q'ueleyob woli' q'uel i bʌ ti toj Job.

² Pero wen mich'ix juntiquil wa'al bʌ ti' t'ejl, i c'aba' Eliú (i yalobil Baraquel ch'oyol bʌ ti Buz ti' yotot Ram). Cʌlʌx jax i mich'ajel, come Job woli' q'uel i bʌ ti toj, pero woli' yʌl mach tojic Dios.

³ Eliú tsi' mich'le ja'el jini uxtiquil i pi'ʌlob, come tsi' yʌlʌyob an i mul Job, pero ma'anic tsi' wen jac'beyon bajche' yom.

⁴ Ñʌch'ʌl tsa' cʌle Eliú che' ti ñaxan, come ch'iton to. Maxto cabʌlic i jabilel che' bajche' i pi'ʌlob.

⁵ Pero tsa' mich'a che' bʌ tsi' q'uele mach yujilobic jac'ol jini uxtiquil.

⁶ Eliú (i yalobil Baraquel, ch'oyol bʌ ti Buz) tsa caji' yʌl: Ch'itoñon to ti la' tojlel. Ñoxetixla. Jini cha'an tsac tiq'ui c bʌ ti t'an cha'an bʌq'uen. Ma'anic tsac subeyetla bajche' wolic ña'tan.

⁷ Tsa cʌlʌ: La' i yʌlob jini ñoxo' bʌ, come cabʌl i jabilel, cabʌl ja'el i ña'tʌbal, cho'on.

⁸ Pero jiñʌch i yespíritu winic mu' bʌ i yʌq'uen i ch'ʌmben isujm, yic'ot i yEspíritu Dios jini P'ʌtʌl Bʌ.

⁹ Mach cha'anic lac jabilel mi lac taj lac ña'tʌbal. Mach jinic jach jini ñoxobix bʌ mi' ch'ʌmbeñob isujm toj bʌ meloñel.

¹⁰ Jini cha'an ñich'tʌbeñon c t'an. Joñon ja'el mi caj c sub bajche' wolic ña'tan.

¹¹ La' wilan, tsa'ix c pijta la' t'an. Tsa'ix c wen ñich'ta che' bʌ tsa' la' wʌlʌ pejtel woli bʌ la' ña'tan, che' bʌ tsa' la' tsictesa la' pusic'al.

¹² Ma'anic tsaj cʌyʌ c ñich'tañetla. Pero ubinla. Ma'anic tsa' la' jac'be i t'an Job. Mach la' wujilic bajche' yom jac'ol, mi juntiquileticla.

¹³ Mach yomic mi la' lon al: “Anix lac ña'tibal joñonla. Jini jach Dios mi mejlel i ju'sʌben i pusic'al”.

¹⁴ Job ma'anic tsi' p'isiyon ti wenta che' bʌ tsi' pejcayetla. Mach lajalic mi caj c pejcan che' bajche' jatetla.

¹⁵ Mi' toj sajtel la' pusic'al. Mach la' wujilic bajche' yom jac'ol. Ñʌch'ʌletixla.

¹⁶ ¿Yom ba mic chʌn pijtan la t'an? ¿Yom ba mic ñʌjch'el che' bajche'etla?

¹⁷ Joñon ja'el mi caj c jac'. Mi caj c subeñetla chuqui cujil.

¹⁸ But'ulix c pusic'al. Mach mejlix c tic' c bʌ ti t'an.

¹⁹ Che'ʌch añon bajche' tsiji' bʌ pʌchi but'ul ti vino. Yomix tojmel cha'an ma'anic i ti'.

²⁰ Wersa mi caj c pejcañetla.

²¹ Mach jelchojquic jach mij q'uel winicob. Ma'anic mic lotiñob ti uts bʌ t'an.

²² Mach mejlic c sub ti ñuc jini mach bʌ ñuquic. Mi tsac mele bajche' jini, bʌbʌq'uen mi' jisañon Dios tsa' bʌ i meleyon.