Job 3 - Chol: I T’an Dios

Job tsi' ña'ta uts'at machic tsi' q'uele pañimil

¹ Tsa' caji ti t'an Job. Tsi' p'aja i yorajlel che' bʌ tsi' q'uele pañimil.

^2-3 Tsi' yʌlʌ Job: La' chojquic j q'uiñilel che' bʌ tsaj q'uele pañimil yic'ot jini ac'ʌlel che' bʌ tsa' caji' cʌntañon c ña'.

⁴ La' ochic jini q'uin ti ic'ch'ipan bʌ cha'an ma'anix mi' chʌn ña'tan Dios. Mach i tsictesan i sʌclel pañimil.

⁵ La' yajpic ti ic'ch'ipan bʌ ti' yʌxñʌlel chʌmel. La' tilic tocal i mʌc. La' puts'ic ti bʌq'uen. La' junyajlel sajtic.

⁶ Jixcu jini ac'ʌlel, la' yajpic. Mach ochic ti tsic yic'ot yan tac bʌ q'uin ti jab yic'ot ti uw.

⁷ La' cʌlec ti' bajñel. Mach yomic mi' chʌn ña'tintel ti tijicña bʌ t'an.

⁸ La' i p'ajob jini winicob yujilo' bʌ p'ajoñel mu' bʌ i yutsesʌbeñob i pusic'al jini jontolo' bʌ chʌy ti colem ñajb.

⁹ La' yajpic i c'ʌc'al ec' ti' bʌjlibal q'uin. La' i lon pijtan i sʌclel pañimil.

¹⁰ Come uts'at tsa'ic i ñusayon c ña' che' cʌntʌbilon i cha'an, pero tsi' yʌc'ʌyon ti pañimil cha'an mi cubin wocol.

¹¹ ¿Chucoch ma'anic tsa' sʌc jiliyon ti' ñʌc' c ña'? ¿Chucoch ma'anic tsa' chʌmiyon che' bʌ tsaj q'uele pañimil?

¹² ¿Chucoch toca tsi' lotoyon j co'? ¿Chucoch tsi' lon tsu'sayon c ña'?

¹³ Tsa'ic i cʌyʌyoñob cha'an mic chʌmel ñʌch'ʌlonix. Tsa'ic chʌmiyon wʌyʌlonix

¹⁴ yic'ot jini reyob yic'ot jini xcʌntesajob wen chumulo' bʌ ti oñiyi,

¹⁵ yic'ot i yalobilob reyob tsa' bʌ i but'uyob i yotot ti chubʌ'añʌl letsem bʌ i tojol.

¹⁶ ¿Chuchoch ma'anic tsac choco c bʌ ti' tojlel c ña' che' maxto i yorajlelic? Che'ic jini, lajalon bajche' alʌlob mach bʌ anic mi' q'uelob i sʌclel pañimil.

¹⁷ Jini chʌmeño' bʌ ma'anix mi' chʌn tic'lʌntelob cha'an jontolo' bʌ. Jini lujbeñobix bʌ mi' c'ajob i yo.

¹⁸ Jini ñup'ulo' bʌ ja'el mi' c'ajob i yo che' mi' chʌmelob. Ma'anix mi' chʌn ubibeñob i t'an i yumob.

¹⁹ Temel añob ch'o'ch'oco' bʌ yic'ot ñuco' bʌ. Jini x'e'tel colbilix ti' p'ʌtʌlel i yum.

²⁰ ¿Chucoch ma' chʌn aq'uen i cuxtilel jini ch'ijiyem bʌ i pusic'al? ¿Chucoch ma' chʌn aq'uen i cuxtilel che' ma'anix i wenlel ti pañimil?

²¹ Yom chʌmel pero ma'anic mi' mejlel. Lajalʌch bajche' jini mu' bʌ i lon top' lum cha'an mi' taj jini letsem tac bʌ i tojol.

²² Tijicña i pusic'al mi tsa' mejli ti chʌmel. Wen tijicñayix jini mucul bʌ ti lum.

²³ ¿Chucoch mi la cʌq'uentel laj cuxtilel che' mʌcʌl lac bijlel? Lon cuxulonla, joy ñet'elonla yubil i cha'an Dios.

²⁴ Che' comix c'ux c waj, mach mejlicon cha'an jesuñayon. Che' comix c cha'len t'an, muc'on jach ti ajcʌn.

²⁵ Jini wocol tsa' bʌ c bʌc'ña tsi' tajayon. Wolix c p'ulben wocol yic'ot bʌq'uen.

²⁶ Che' yʌxʌlix co, che' wolic wen cʌntan c bʌ, tsi' tajayon wocol. Tsa' ujti ti t'an Job.