Job 27 - Chol: I T’an Dios

Chuqui mi caj i taj xjontolilob

^1-2 Tsa' cha' caji ti t'an Job: Añonla ti' tojlel Dios tsa'ix bʌ i contrajiyon. Wolic pejcañetla ti' tojlel jini P'ʌtʌl Bʌ tsa'ix bʌ i yʌq'ueyon ch'aj bʌ.

^3-4 Che' cuxulon to, che' woli to c jap ic', ma'anic mi caj c cha'len lot. Ma'anic mi caj c sub chuqui tac mach isujmic.

⁵ Muq'uic c sub isujm bajche' wola' wʌl, che' jini mach tojonic. C'ʌlʌl to mic chʌmel mux c sub ma'anic c mul.

⁶ Mach xmulilonic, cha' cho'on. Ñʌch'ʌl c pusic'al. Ma'anic mu' ti t'an.

⁷ Jontolob jini mu' bʌ i p'ajoñob. La' i tojob i mul jini j contrajob.

⁸ Che' mi' chʌmel jini mach bʌ anic mi' bʌc'ñan Dios, che' mi' pʌjyel ti meloñel ti Dios, ¿chuqui mi caj i taj?

⁹ Che' mi' cajel ti oñel cha'an wocol, ¿mu' ba i yubin Dios?

¹⁰ ¿Tijicña ba ti' tojlel jini mach bʌ anic i p'isol i p'ʌtʌlel? ¿Mu' ba caj i pejcan ti pejtelel ora?

¹¹ Mi caj j cʌntesañet bajche' mi' mel Dios ti' p'ʌtʌlel. Mi caj c sub chuqui mi' ña'tan. Mach c mucuyic.

¹² Tsa'ix la' q'uele jatetla. ¿Chucoch che' jini mi la' sub jini lolom jach bʌ?

¹³ ¿Chuqui woli' pijtan xjontolil ti' tojlel Dios? Jiñʌch i chobejtʌbal jini xtic'laya mu' bʌ i yʌq'uen jini P'ʌtʌl bʌ Mach bʌ Anic i P'isol i P'ʌtʌlel.

¹⁴ Mi' p'ojlel i yalobilob, pero cha'an jach mi' jilelob ti espada. Mi' yubiñob wi'ñal i p'olbalob.

¹⁵ I colobal i yalobilob mi' cajelob ti chʌmel cha'an c'amʌjel. Anquese mi' cʌytʌl ti meba' i yijñam, ma'anic mi' yuc'tan.

¹⁶ Mi tsi' tempa cabʌl i taq'uin che' bajche' ts'ubejn, mi tsa' tempʌyi cabʌl i pislel,

¹⁷ mi caj i cʌy. Jini tojo' bʌ mi caj i lʌpob. Jini mach bʌ añobic i mul mi caj i t'oxbentelob i taq'uin.

¹⁸ Mi' caj ti jilel i yotot tsa' bʌ i wa'choco xjontolil. Lajal mi' jilel che' bajche' i puyil am yic'ot i yotlel xq'ueloñel ti ts'usubil.

¹⁹ Mach jalic jini wen chumul bʌ mi' majlel ti wʌyel. Mi' ch'ojyel. Ma'anix tsiquil i chubʌ'an.

^20-21 Che' bajche' mi' bʌc' tilel but'ja' che' ja'el mi' tilel bʌbʌq'uen bʌ ti' tojlel. Ti ac'ʌlel tal sutujt ic' loq'uem bʌ ti' pasibal q'uin. Muc'ʌch i ch'uy majlel. Ñajt mi' cʌytʌl i yotot cha'an ticʌw bʌ ic'.

²² Ma'anic i p'untʌntel. Wen p'ump'un jini winic. Ti pejtelel i pusic'al yom puts'el.

²³ Winicob mi' jats'ob i c'ʌb, tijicñayob i pusic'al che' mach sujtix i yum otot mu' bʌ i ts'a'leñob. I cha'añobix mi' cʌytʌl i yotot.