Job 26 - Chol: I T’an Dios

Dios mi' mel chuqui jach yom

^1-2 Job tsa' caji ti t'an: ¿Che' ba yom ma' coltan jini c'uño' bʌ? ¿Che' ba ma' q'uechben majlel i c'ʌb jini mach bʌ anix i p'ʌtʌlel?

³ ¿Che' ba yom i cʌntesʌntel jini mach bʌ anic i pusic'al? ¿Che' ba ma' wʌq'uen i ch'ʌmben isujm?

⁴ ¿Majqui tsi' yʌq'ueyet a ña'tibal? ¿Baqui ch'oyol jini espíritu mu' bʌ i ñijcañet ti a t'an?

⁵ Tsiltsilña ti bʌq'uen jini chʌmeño' bʌ ti' yebal pañimil yic'ot i chʌñil ja' am bʌ ti colem ñajb.

⁶ Lu' jamʌl ti' wut Dios. Ma'anic chuqui mʌcʌl ti' tojlel. Mi' c'ʌlʌl c'otel i wut ti' yajñib chʌmeño' bʌ.

⁷ Dios mi' lich' panchan che' bajche' pisil ya' ba' ma'anic chuqui an. Che jach mi' ts'uychocon pañimil ya' ba' ma'anic chucul.

⁸ Anquese alatax ja'al, ya jach lotol ti tocal. Ma'anic mi' tojmel tocal anquese cabʌl i yalel.

⁹ Mi' mʌcben i wut jini uw che' mi' yʌc' ti ñumel tocal ti' tojel i wut.

¹⁰ Mi' tsictesan ya' ba' jaxʌl colem ja' ti' pasibal q'uin yic'ot ti' bʌjlibal q'uin. Ya' ba' mi' c'ʌlʌl c'otel lac wut ma'anic mi' xʌb i bʌ i sʌclel pañimil yic'ot i yic'lel.

¹¹ Mi' bujchel i yoyel panchan, mi' cha'len bʌq'uen che' mi' cajel ti a'leya i Yum.

¹² Ti' p'ʌtʌlel Dios mi' ñʌjch'el colem ja'. Ti cabʌl i ña'tibal mi' ju'sʌben i pusic'al i bʌl ja' chan bʌ mi' mel i bʌ.

¹³ Cha'an ti' yiq'uilel i yej mi' yʌc' ti jajmel pañimil. I c'ʌb mi' yʌc' ti jilel p'ʌtʌl bʌ lucum am bʌ ti ja'.

¹⁴ Jiñobʌch i tejchibal jach i p'ʌtʌlel. I sajl tac jach mi laj q'uel. Che' mi' tsictesan i p'ʌtʌlel lajalʌch bajche' i t'an chajc. ¿Majqui mi mejlel i p'is? che'en Job.