Job 23 - Chol: I T’an Dios

Job yom i pejcan Dios ti wocol t'an

^1-2 Tsa' caji ti t'an Job: Cha' wulwulña c pusic'al, mach chʌn cujchix c cha'an wocol. Wen wocol i c'ʌb Dios tic tojlel. Jini cha'an woliyon ti ajcʌn.

³ Tijicñayon muq'uic c taj Dios cha'an mic mel c bʌ ti' tojlel.

⁴ Com c pejcan ti wocol t'an. Com c suben bajche' añon.

⁵ Com cubin bajche' mi' jac'. Com c ch'ʌmben isujm.

⁶ Ma'anic mi caj i yʌ'leñon. Anquese cabʌl i p'ʌtʌlel ma'anic mi caj i c'ʌn tij contra. Muc'ʌch i p'ison ti' wenta.

⁷ Muc'ʌch c mel c bʌ ti' tojlel come tojon. Uts'at mi caj c loq'uel ti' tojlel c juez.

⁸ Mi tsa' majliyon ti' tojel c wut, mach ya'ic an. Mi tsa' majliyon tic pat, mach j q'ueleyic.

⁹ Mic majlel tic ts'ej ba' mi' pʌs i c'ʌc'al ñoj ec'. Mach c tajayic. Mach tsiquilic ja'el tic ñoj.

¹⁰ Pero yujil Dios baqui mic majlel. Che' bʌ tsa'ix ujti i q'uelbeñon c pusic'al, mi caj c loq'uel che' bajche' oro.

¹¹ Xuc'ul to coc ti' bijlel ba' tsi' yʌc'ʌyon. Ma'anic tsac wis cʌyʌ ti pejtelel ora.

¹² Ma'anic mic ñusʌben i mandar. Tsa'ix c wen lotbe i t'an tic pusic'al.

¹³ Xuc'ul lac Yum. Ma'anic majch mi' xoyben i bijlel. Mi' mel bajche' jach yom i pusic'al.

¹⁴ Ts'ʌcʌl mi' mel che' bajche' tsi' wʌn ña'ta i mel. Anto cabʌl chuqui mi' ña'tan i mel.

¹⁵ Jini cha'an an c bʌq'uen ti' tojlel. Che' mij c'ajtesan tic pusic'al tsiltsilñayon ti' tojlel cha'an bʌq'uen.

¹⁶ Jini P'ʌtʌl Bʌ mi' bʌc'tesañon. Jini cha'an c'un pañimil mi cubin.

¹⁷ Joyolon ti ic'ch'ipan bʌ pañimil. Jini cha'an mach j q'ueleyic.