Job 20 - Chol: I T’an Dios

Mi caj i yubiñob wocol jontolo' bʌ

¹ Tsa' caji ti t'an Zofar ch'oyol bʌ ti Naama.

² Cujil bajche' yom mic jac'beñet. Xic'bilon ti t'an.

³ Tsa'ix cubi a t'an che' bʌ tsa' tiq'uiyon ti t'an cha'an tsa cʌlʌ an a mul, pero ma'anic mi' tic'on ti t'an c pusic'al.

⁴ Ña'tan ti isujm, c'ʌlʌl che' bʌ tsi' yʌc'ʌ Dios jini ñaxan bʌ winic ti pañimil c'ʌlʌl wʌle

⁵ ma'anic mi' jal'an i ñuclel xjontolil. Anquese poj jumuc' mi' mʌjlel i cha'an, mi' bʌc' jilel i tijicñʌyel i pusic'al jini mach bʌ anic mi' bʌc'ñan Dios.

⁶ Anquese wen chan i pusic'al che' bajche' panchan, anquese muc'ʌch i laj taj chuqui tac yom i pusic'al yubil,

⁷ mi' caj ti jilel che' bajche' misujelʌl. Lajal mi' caj ti jilel che' bajche' i ta'il. Mach i ña'tayobic i pi'ʌlob baqui tsa' majli. ¿Baqui an? lon che'ob.

⁸ Mi' cajel ti ñajʌyel che' bajche' ñajal. Che' bajche' jini q'uelel bʌ lac cha'an ti ñajal, mach lac chʌn q'ueleyix ti pejtelel ora.

⁹ Mach i cha' q'ueleyobix i pi'ʌlob año' bʌ ti' yotot.

¹⁰ I yalobilob mi caj i c'ajtiñob i coltʌntel ti' tojlel jini mach bʌ añobic i chubʌ'an. Mi caj i lu' jisʌbeñob i chubʌ'an i tat. Mi caj i sutq'uibeñob i xujch' i tat.

¹¹ Che' ch'iton to mux i yajñel i bʌc'tal jini winic ti ts'ubejn.

¹² Tsa' ñuc'a i pusic'al cha'an i jontolil

¹³ che' bajche' winicob mu' bʌ i majts'añob jini yʌcʌcña bʌ ti' yej cha'an jal mi' jilel i tsajel.

¹⁴ Pero mux caj i bʌc' paj'an ti' ñʌc'. Mi' sujtel ti' venenojlel lucum.

¹⁵ Mux caj i xejtan i xujch'. Dios mi' yʌq'uen i xejtan.

¹⁶ Mi caj i ñuc' i venenojlel lucum. Mi caj i chʌmel.

¹⁷ Ma'anic mi caj i ñuc'an i pusic'al cha'an i xujch'. Lolom jach i taq'uin. Mach i tajayic lech mi chab.

¹⁸ Anquese mi' p'ojlel i taq'uin cha'an i ye'tel, wersa mi' junyajlel cʌy chuqui tac tsi' ganari. Ma'anic mi' yʌq'uen i tijicñʌyel i pusic'al.

¹⁹ Come tsi' teñe jini pobrejo' bʌ. Ma'anic tsi' coltayob. Tsi' chilbeyob i yotot tsa' bʌ i wa'chocoyob.

²⁰ Ma'anic tsi' wis tiq'ui i bʌ cha'an chuqui yom i pusic'al. Anquese wo'atax i pusic'al, ma'anic chuqui mi' lot. Mi' laj jilel.

²¹ Che' ñajix ma'anic i colobal cha'an mi' c'ux ti yambʌ ora. Mach jal'ac ti wen chumtʌl ti' tijicñʌyel i pusic'al.

²² Mi caj i yubin wocol come mach mejlic i coltan i chubʌ'an. Pejtel xjontolilob mi caj i p'ump'un tic'lañob.

²³ Che' mi' lon ña'tan jal to mi caj i yubin tijicña bʌ, Dios mi caj i choc tilel i mich'ajel che' bajche' ja'al.

²⁴ Talob ti ajñel mu' bʌ caj i julob. Che' mi' puts'tan junchajp wocol, mi' lojwel cha'an yambʌ.

²⁵ I te'el jalʌjb mi caj i sʌl jec' i bʌc'tal. Mi' loq'uel i ñi' te' ti' pat ba'an i ch'aj. Mi' cajel ti tsiltsilñʌyel cha'an bʌq'uen.

²⁶ Che' mi' tam ochel ti ic'ch'ipan bʌ, ma'anix tsiquil i chubʌ'an. Mi caj i pulel ti c'ajc mach bʌ ts'ʌbʌlic ti c'ʌbʌl, yic'ot pejtel chuqui tac tsa' cʌle ti' yotot.

²⁷ Jini panchan mi' tsictesʌben i mul. Jini pañimil mi' tejchel ti' contra.

²⁸ Mi' caj ti jejmel i yotot yic'ot pejtel i bʌl. Mi caj i wejts'el majlel che' bajche' but'ja' ti' yorajlel i mich'lel Dios.

²⁹ Che'ʌch mi' caj ti jilel xjontolil. Wʌn ña'tibil ti Dios chuqui mi caj i tumben jini mach bʌ anic mi' jac'. Tsa' ujti ti t'an Zofar.