Job 18 - Chol: I T’an Dios

Jini jontolo' bʌ mi caj i tojob i mul

^1-2 Tsa' caji ti t'an Bildad ch'oyol bʌ ti Suha: ¿Jayp'ejl to ora ma' lon ña'tan a yʌcon lojon ti a t'an? ¿Maxto ba anic a pusic'al? Subu a bʌ mi a wom mic jac'.

³ ¿Lajal ba ma' q'uelon lojon bajche' wacax mach bʌ anic i pusic'al?

⁴ Wola' tic'lan a bʌ cha'an mich'et. ¿A wom ba mi' laj chʌmelob winicob ti' caj a mul? ¿A wom ba mi' c'ajlel tac xajlel ti' yajñib cha'an ma' q'uejlel ti toj?

⁵ Mi' caj ti jilel i wenlel jini jontolo' bʌ. Mi' caj ti junyajlel yajpel i c'ʌc'al ba' mi' q'uixñesañob i bʌ.

⁶ Mi' caj ti jilel i yotot tac jini jontolo' bʌ ti ic'ch'ipan bʌ.

⁷ Jini xjontolil mi' caj ti xʌmbal che' bajche' xyʌc'ajel. Mi' caj ti yajlel cha'an tsi' ñusa t'an. I mul mi' yʌc' ti yajlel.

⁸ Bʌjʌch i bʌ mi caj i yochel ti yac. Ti ajñel mi' choc i bʌ ti' ch'eñal lum.

⁹ Mi' ñejt'el i tun'oc ti yac. Chucul cʌlem ba' mach mejlic ti loq'uel.

¹⁰ Mucbil ti lum an lazo mu' bʌ caj i jich'. Mucbil ti' bijlel an yac mu' bʌ caj i ñup'.

¹¹ Ya' ti' pat yic'ot ti' tojel i wut yic'ot ti' t'ejl an bʌbʌq'uen bʌ. Ti ajñel mi' majlel ame chujquic i yoc.

¹² Jini wocol woli' pijtan. Muq'uix i jisan ti ora che' mi' yochel i yoc.

¹³ Anix i chʌmel i pʌchilel. Mi' wʌlʌc ac' ti jilel i c'ʌb i yoc. P'ump'unix mi' chʌmel.

¹⁴ Mi caj i wersa pʌjyel loq'uel ti' yotot ba' yom cʌytʌl. Ya' ba' bʌbʌq'uen jax mi' chʌmel mi caj i wersa pʌjyel majlel.

¹⁵ Ma'anic mi' wis cʌytʌl i chubʌ'an ti' yotot mi ts'ita'ic. Mi' pulel i yotot che' bajche' mujlʌbil ti azufre.

¹⁶ Lajal che' bajche' te' mi' chʌmel. Tiquinix i wi' ti yebal. Tiquinix i yopol ti pam.

¹⁷ Ma'anix majqui mi' chʌn c'ajtesan ti pañimil. Ma'anix mi' pejcʌntel i c'aba ti bij.

¹⁸ Mi' chojquel loq'uel ti' sʌclel pañimil. Mi' yochel ti ic'ch'ipan bʌ. Ti ajñel mi' chojquel loq'uel ti' tojlel winicob ti pañimil.

¹⁹ Ma'anic i yalobil mi i buts. Jochol mi' cʌytʌl i yotot.

²⁰ Mi' toj sajtel i pusic'al jini ñoxobix bʌ che' mi' q'uelob. Mi' cajelob ti bʌq'uen jini ch'itoñob.

²¹ Lajal mi caj i yujtel i chumlib pejtel winicob mach bʌ anic mi' bʌc'ñañob Dios. Junlajal mi' cajelob ti jilel. Tsa' ujti ti t'an Bildad.