Job 15 - Chol: I T’an Dios

Elifaz tsi' cha' tiq'ui Job

^1-3 Tsa' caji ti t'an Elifaz ch'oyol bʌ ti Teman: ¿Che'ʌch ba yom mi' cha'len t'an jini am bʌ i ña'tibal? ¿Chuqui ma' taj che' ma' p'ojlesan t'an mach bʌ anic i c'ʌjñibal? Mu' jach a but' a tajn ti ic'.

⁴ Ma'anic wola' bʌc'ñan Dios. Ma' lon pejcan Dios che' jini.

⁵ Come woli jach a muc a mul che' muq'uet ti t'an. Wen a wujil lotiya.

⁶ Mach wersajic mic sub a mul. A t'an mu' bʌ i loq'uel ti a wej mi' tsictesañet.

⁷ ¿Tsa' ba a q'uele pañimil ñaxan che' maxto anic winic? ¿Wʌ' ba añet ti pañimil ti oñiyi che' maxto melbilic wits?

⁸ ¿Tsa' ba i pejcayet Dios che' bʌ tsi' ña'ta i mel pañimil? ¿Lu' cʌñʌl ba a cha'an jini an tac bʌ ti pañimil?

⁹ ¿Chuqui a wujil mach bʌ cujilic lojon? ¿Chuqui tsa' wubi mach bʌ ubibilic c cha'an lojon?

¹⁰ Tic tojlel lojon an ñoxobix bʌ ja'el, sʌcobix i jol, ñumeñobix bʌ i jabilel che' bajche' a tat.

¹¹ ¿Mach ba ñuquic ti a pusic'al i yutslel Dios? ¿Mach ba a womic a wubin uts bʌ t'an?

¹² ¿Chucoch cʌlʌx jax ma' cha'len mich'ajel? ¿Chucoch chan ma' pʌs a bʌ tic tojlel lojon?

¹³ Wola' wʌc' a ch'ujlel cha'an ma' contrajin Dios che' ma' cha'len t'an che' bajche' jini.

¹⁴ Winicon jachla. Mi lac lon ña'tan sʌconla. X'ixicob jach lac ña'. Mi lac lon ña'tan tojonla.

¹⁵ Mach ñuquic ti' pusic'al Dios jini ch'ujulo' bʌ i cha'an. Mach sʌquic jini panchan ti' tojel i wut.

¹⁶ Jixcu jatet tuw a tsoy. Ts'a'lebilet ti winicob. ¿Sʌquet ba? Che' bajche' mi' chʌy ja' esponja, che'ʌch mi' toyet a mul.

^17-18 Ñich'tañon. Mi caj j cʌntesañet. Ma'anic chuqui mi caj c wis muc. Mi caj c subeñet jini q'uelel bʌ c cha'an. Jiñʌch ña'tibil bʌ i cha'an lac tat ti oñiyi. Tsi' cʌntesayob lac tat tsa' bʌ aq'uentiyob jini lum ti ñaxan.

¹⁹ Jini lum i bajñel cha'añob jach yic'ot i pi'ʌlob. Ma'anic tsa' aq'uentiyob yaño' bʌ mach bʌ i pi'ʌlobic.

²⁰ Jini xjontolil mi' wersa cha'len tsic pusic'al pejtel i jabilel. Jini mu' bʌ i bajñel otsan i bʌ ti yumʌl mi caj i tic'lʌntel c'ʌlʌl mi' chʌmel.

²¹ Pejtel ora woli' yubin t'an mu' bʌ i bʌc'tesan. Anquese ñʌch'ʌl pañimil, tsiltsilña ti bʌq'uen ame chʌmic.

²² Mach loq'uix ba' woli' cʌntan i bʌ, come yujil talix espada i jec'.

²³ Mi' lon sʌclan i bʌl i ñʌc'. ¿Baqui mi caj i taj? Wolix i lʌc'tiyel i yorajlel wocol che' mi' cajel ti ochel ti ic'ch'ipan bʌ pañimil.

²⁴ Talix ch'ijiyem bʌ yic'ot tsic pusic'al. Mi caj i yʌq'uen tsiltsilña bʌ i pusic'al. Lajalʌch bajche' rey mu' bʌ caj i chujquel ti guerra.

²⁵ Tsi' sʌts'ʌ i c'ʌb i contrajin Dios. Tsi' ts'a'le jini mach bʌ p'isbilic i p'ʌtʌlel.

²⁶ Tsʌts tsi' yʌc'ʌ i bic'. Chucul i cha'an i mʌctijib, tsi' choco i bʌ ti' contra Dios.

²⁷ Mich' i wut, jujp'en i bʌc'tal. Tsi' ch'ʌmbeyob i tejclum yaño' bʌ che' bʌ tsi' jisayob ti guerra. Tsa' poj chumle ti' yototob.

²⁸ Pero mach jalix mi' caj ti jilel yic'ot tejclum. Jochol mi caj i cʌytʌl i yotot. Mi caj i bʌc' jejmel.

²⁹ Poj jumuc' jach mi' toy i bʌ. Mach muq'uic i jalijel i chubʌ'an. Mach muq'uic i p'ojlel.

³⁰ Sajtem ti ic'ch'ipan bʌ pañimil. Mux caj i tiquin i wi' ti c'ajc. Che'ʌch i t'ojlʌwel che' bajche' i nich pimel mu' bʌ i wejlan majlel ic'.

³¹ Mi' lon ñop jini lolom bʌ, come chan i pusic'al. Lolom jach pejtel i ye'tel.

³² Muq'uix i seb jilel che' maxto i yorajlelic. Mach mʌjlic i cha'an.

³³ Lajalʌch bajche' ac' mu' bʌ i yʌsan i yojl, che' bajche' olivote' mu' bʌ i choc i nich.

³⁴ Che'ʌch añob jini mach bʌ anic mi' c'uxbiñob Dios. Ma'anic mi' yʌc'ob i wut. Anquese ch'ʌlbil i yotot ti majtañʌl tsa' bʌ i ch'ʌmʌyob ti mucul, mi' caj ti jisʌntel.

³⁵ Jini jach mi' techob jontolil. Mi' p'ojlesañob wocol. Wen yujilob lotiya ti' pusic'al. Tsa' ujti ti t'an Elifaz.