Job 12 - Chol: I T’an Dios

Job tsi' yʌlʌ an i p'ʌtʌlel yic'ot i ña'tibal Dios

¹ Job tsa' caji ti t'an:

² Jatet jachla an la' pusic'al yubil. Jatet jachla mi la' ña'tan chuqui toj.

³ Pero an c pusic'al ja'el lajal bajche' jatetla. Mic ña'tan ja'el chuqui toj. Jini woli bʌ la' wʌl mi' pam ña'tintel.

⁴ Wʌle wolix i wajleñonob c pi'ʌlob anquese tojon. Pero ti yambʌ ora Dios tsi' coltayon che' bʌ tsaj c'ajtibe j coltʌntel.

⁵ Jini wen chumul bʌ mach bʌ cʌmbilic i cha'an wocol mi' ts'a'len jini p'ump'uño' bʌ. Mi' tse'tan jini mu' bʌ i yajlelob.

⁶ Jini xujch'ob mi' wen chumtʌlob cha'an i xujch'. Jini mu' bʌ i contrajiñob Dios mi' chʌn cha'leñob bajche' jach yomob i pusic'al. Dios mi' we'sañob, mi' coltañob.

⁷ C'ajtibeñob jini bʌte'el mi mach isujmic. Mux i cʌntesañet. Jini te'lemut mi caj i pʌsbeñet.

⁸ La' i cʌntesañet jini lum yic'ot i chʌyil ja'.

⁹ Laj yujilob jiñʌch i c'ʌb lac Yum tsa' bʌ i meleyob.

¹⁰ Dios mi' yʌq'uen i cuxtilel pejtel cuxul bʌ. Mi' yʌq'ueñob i cuxtilel pejtel winicob.

¹¹ Che' bajche' mi' wen cʌn we'el jini quej, che' ja'el c pusic'al mi' wen cʌn chuqui isujm che' mi cubin.

¹² Añob cabʌl i pusic'al jini ñoxobix bʌ. Mi' wen ch'ʌmbeñob isujm.

¹³ Ch'oyol ti Dios pejtel lac ña'tibal yic'ot pejtel lac p'ʌtʌlel. Cabʌlʌch i pusic'al Dios mu' bʌ i cʌntesañonla.

¹⁴ Che' an chuqui mi' jem, ma'anic majqui mi' cha' mel. Mi tsi' ñup'u winic, ma'anic majqui mi' yʌc' ti loq'uel.

¹⁵ Mi tsi' tiq'ui ja'al, mi' tiquin pejtel cuxul bʌ. Che' mi' choc tilel ja'al, mi' bujt'el tac ja'.

¹⁶ I bajñel an i ña'tibal yic'ot i p'ʌtʌlel. Jini sajtemo' bʌ yic'ot jini tsa' bʌ i yʌc'ʌyob ti sajtel laj añob ti' wenta.

¹⁷ Dios mi' yotsan ti tonto juezob yic'ot xcʌntesajob.

¹⁸ Mi' ts'ocbeñob i cadena tac jini p'ump'uño' bʌ cʌchbilo' bʌ cha'an año' bʌ i ye'tel. Mi' loc'san yumʌlob ti' ye'tel.

¹⁹ Mi' pʌy majlel jini motomajob pits'ilob i yoc. Mi' xitchocon jini p'ʌtʌlo' bʌ.

²⁰ Mi' chilbeñob i c'ʌjñibal jini wen yujilo' bʌ t'an. Mi' yʌc' ti asiyel i ña'tibal jini ñoxobix bʌ.

²¹ Mi' yʌc' ti ts'a'lentel colem yumʌlob. Mi' chilbeñob i p'ʌtʌlel jini p'ʌtʌlo' bʌ.

²² I c'ʌc'al Dios mi' yʌc' ti sʌc jilel jini axñal am bʌ ti' tojlel jini woli bʌ ti chʌmel.

²³ Mi' yʌc' ti p'ojlel winicob ti chajp ti chajp. Mi' cha' jisañob. Mi' pam pucob. Mi' cha' much'quiñob tilel ti' lum.

²⁴ Mi' socben i pensar yumʌlob, presidentejob yic'ot reyob. Mi' yʌc'ob ti sajtel ti mate'el ba' ma'anic bij.

²⁵ Sajtemob ti ic'ch'ipan bʌ pañimil, mi' lon cha'leñob xʌmbal, come ma'anic i c'ʌc'al. Tacamechel mi' cha'leñob xʌmbal che' bajche' xyʌc'ajel.