Job 10 - Chol: I T’an Dios

Job tsa' c'ojyi

¹ Tsa'ix c'ojyiyon. Comix chʌmel. Mux caj c sub pejtel c wocol yic'ot jini ch'aj bʌ mu' bʌ cubin.

² Com c suben Dios: Mach a wʌc'on ti toj mulil. La' c ña'tan chucoch wola' wʌc'on ti wocol.

³ ¿I t'ojol ba ti a wut che' ma' tic'lañon, che' ma' ts'a'len jini winic tsa' bʌ a mele? ¿I t'ojol ba ma' coltan jini jontolo' bʌ mu' bʌ i cha'leñob jontolil?

⁴ ¿Lajal ba ma' cha'len meloñel che' bajche' winicob mach bʌ anic i ña'tibal? Mach cu lajaletic, come an a ña'tibal.

⁵ ¿Lajal ba a jabilel bajche' c jabilel lojon?

⁶ ¿Chucoch ma' wersa sʌclan c jontolil? Ma' wersa sʌclan c mul.

⁷ A wujil mach jontolonic. Ma'anic majch mi' coltañon loq'uel ti a c'ʌb.

⁸ Jatet tsa' meleyon. ¿Mu' ba caj a jisañon?

⁹ Ña'tan melbilon ti ts'ubejn. ¿A womix ba a sutq'uiñon ti ts'ubejn? ¿Chuqui wola' tumbeñon? Winicob mi' jebob loq'uel lech cha'an mi' melob quesu.

¹⁰ ¿Mach ba lajalonic ti a c'ʌb bajche' lech?

¹¹ Tsa' wʌq'ueyon c pʌchilel yic'ot c bʌc'tal. Tsa' ñut'beyon c bʌquel ya' tic p'aquel.

¹² Tsa' wʌq'ueyon j cuxtʌlel. Tsa' cʌntayon ti' yutslel a pusic'al.

¹³ Pero lotol ti a pusic'al pejtel chuqui ña'tibil bʌ a cha'an. Woli a jisañon che' bajche' tsa' wʌn ña'ta. Cujil jiñʌch woli bʌ a mel tic tojlel.

¹⁴ Mi tsac cha'le mulil q'uelel a cha'an. Ma'anic mi caj a ñusʌbeñon.

¹⁵ Mi jontolon p'ump'un c bʌ, ma'anic j coltʌntel. Anquese mi tojon wersa mic mʌy c wut ti a tojlel. But'ul c pusic'al ti ic'ch'ipan bʌ yic'ot quisin.

¹⁶ Che' lon comix ch'ojyel ila ba' añon ti lum, ma' cha' xitchocon jubel che' bajche' bajlum mu' bʌ i cha' jats' jubel i colojm. Ma' contrajiñon ti cabʌl a p'ʌtʌlel.

¹⁷ Ma' chʌn ac' a t'an cha'an mic taj wocol. Mi' yutsi p'ojlel a mich'lel. Motocña mi' tilel wocol tic tojlel.

¹⁸ Mi che'ʌch mi caj cujtel, ¿chucoch tsa' wʌc'ʌyon quilan pañimil? Uts'at tsa'ic chʌmiyon che' cʌntʌbilon to.

¹⁹ Che'ic jini mach wʌ'ic añon wʌle. Che'ic jini tsa jach bʌc' mujquiyon che' bʌ tsi' lotoyon j co'.

²⁰ Ma'anix jayp'ejl q'uin c cha'an. A wocolic cʌyʌyon cha'an mic poj c'aj co,

²¹ jinto mic majlel ba' ma'anix mic chʌn sujtel.

²² Ya' ba'an ic'ch'ipan pañimil ti pejtelel ora, ya' ba' ma'anic i sʌclel ti jini lum, mach yulilobic chuqui woli' yujtel. Lajal ti xinq'uinil che' bajche' xin ac'ʌlel. Mi' yochelob ti axñal pejtel muc'o' bʌ ti chʌmel. Tsa' ujti ti t'an Job.