Jeremias 9 - Chol: I T’an Dios

¹ La' c cha'len uq'uel. Mach ma' tic'on. La' tilic i ya'lel c wut ti q'uiñil yic'ot ti ac'ʌlel che' bajche' i loq'uib ja' cha'an woli' tsʌnsʌntelob jini c'uxbibilo' bʌ c pi'ʌlob.

² Uts'at anic c cha'an otot cha'an mic majlel ti chumtʌl ya' ti tiquin bʌ lum. Comix j cʌy c pi'ʌlob come laj sojquemob ti' ts'i'lel. Laj yujilob lotiya.

³ Ñʌmʌlob ti lot. Lajal yujil jec'ol i t'an che' bajche' i te'el jalʌjb. Mi' yutsi p'ojlel i jontolil. Jini cha'an mach i cʌñʌyoñobic, che'en lac Yum.

⁴ Chʌcʌ q'uele a bʌ ti' tojlel a pi'ʌlob. Mach ma' ñopben i t'an jini lʌc'ʌl bʌ ti chumtʌl. Come woli' chijtañob i pi'ʌlob. Woliyob ti u'ya t'an jini lʌc'ʌl bʌ i chumlibob.

⁵ Ti jujuntiquilob mi' lotiñob i pi'ʌlob. Ma'anic majqui mi' sub chuqui isujm. Tsi' ñʌmtesayob i bʌ ti lot. Mi' socbeñob i sujmlel. Mi' chʌn cha'leñob lot yic'ot jontolil jinto che' lujbobix.

⁶ Ti jujump'ejl q'uin woli' tempañob i mul yic'ot i lot. Jini cha'an mach yomobic i ñopoñ, che'en lac Yum.

⁷ Lac Yum woli' yʌl: P'isi ti a wenta. Mi caj cʌc'ob ti wocol che' bajche' mi la' wʌc' ti c'ajc jini tsucu taq'uin che' mi la' wulmesan cha'an mi la' loc'sʌben i ta'. Che'ʌch mi caj c melbeñob. ¿Mach ba che'ic yom?

⁸ Come jontol jax i yac' che' bajche' i te'el jalʌjb. Wen yujil lotiya. Jujuntiquil mi' pejcan i pi'ʌl ti uts bʌ t'an che' woli' chijtan cha'an mi' tsʌnsan.

⁹ ¿Mach ba yomic mi cʌc'ob ti wocol cha'an cabʌl i mul c tejclum? ¿Mach ba yomic mic sutq'uibeñob wocol cha'an che'ʌch woli' melob? che'en lac Yum.

¹⁰ P'ump'un jini wits yic'ot jamil. Ajacñayob ti uq'uel come pulemix ti q'uin. Ma'anix majqui mi' ñumel ti lum mi winic mi alʌc'ʌl. Majlemix bʌte'el yic'ot te'lemut.

¹¹ Joñon mi caj cʌc' ti jejmel jini tejclum cha'an p'ulul ti lum mi' cʌytʌl. Ya' mi caj i yajñelob jontol bʌ ts'i'. Mi caj c jochtesan jini tejclum tac ti Judá cha'an ma'anix majch mi' chʌn ajñel ya'i.

Mi caj i cʌjchelob majlel

¹² ¿Majqui an i ña'tʌbal cha'an mi' ch'ʌmben isujm chuqui woli' yujtel? ¿Majqui tsi' yubibe i t'an lac Yum cha'an mi' cha' sub? ¿Chucoch pujch'emix jini lum? Tsa'ix sujti ti tiquin bʌ lum ba' ma'anix winicob. Mi' bʌc'ñañob ñumel.

¹³ Lac Yum woli' yʌl: Cha'an tsi' cʌyʌyob c mandar tsa' bʌ cʌq'ueyob, jini cha'an tsa' asiyi jini lum. Ma'anic tsi' jac'ʌyob c t'an. Ma'anic tsi' meleyob che' bajche' tsac subeyob.

¹⁴ Tsʌtsob i pusic'al. Tsi' bajñel yajcayob i bijlel che' bajche' yom i pusic'al. Tsi' ch'ujutesayob jini Baalob che' bajche' tsi' cʌntesayob i tatob.

¹⁵ Jini cha'an mi caj cʌq'ueñob i cuch wocol mach bʌ cuchbilic. Mi caj cʌq'ueñob i jap ja' am bʌ i venenojlel, che'en i Yum Panchan yic'ot Pañimil, i Dios Israel.

¹⁶ Mi caj c pam pucob ti yan tac bʌ tejclum mach bʌ i cʌñʌyobic, mach bʌ i cʌñʌyobic i tatob. Ya'ix mi caj cajñesañob yic'ot espada jinto mic laj jisañob.

^17-18 I Yum Panchan yic'ot Pañimil woli' yʌl: Pʌyʌ tilel ti ora jini x'uq'uelob. Yom ma' bʌc' cajel ti uq'uel. La' loq'uic i ya'lel a wut. Pʌyʌ ti uq'uel pejtel a pi'ʌlob.

¹⁹ Wen ch'ijiyem i pusic'al jini año' bʌ ti Sion. Woli' yʌlob: “Ma'anix lac pijtaya. Junyajlel jisʌbilonla. Wersa mi laj cʌy lac lum yic'ot la cotot”, che'ob.

²⁰ Ubibeñob i t'an lac Yum, x'uq'uelob. Cʌntesanla xch'oc bʌ la' walobilob yic'ot jini lʌc'ʌlo' bʌ ti chumtʌl cha'an mi' yuc'tañob i lumal.

²¹ Come ochemix laj contra ti la cotot. Tsa'ix ochi ti ventana cha'an mi' tsʌnsan la calobilob, jini i t'ojolob jax bʌ. Ma'anix alp'eñelob ti bij. Ma'anix mi' cha'leñob alas. Ma'anix mi' tempañob i bʌ ch'iton winicob ti plaza.

²² Subeñob: Jini xchʌmelob mi caj i yajlelob ti lum che' bajche' i ta' wacax ti jamil, che' bajche' i bʌc' trigo, ujtemix ti tujq'uel. Ma'anix majch mi caj i lotob, che'en lac Yum.

I ñuclel winic jiñʌch che' mi' cʌn Dios

²³ Lac Yum woli' yʌl: Jini cabʌl bʌ i pusic'al mach i chañ'esan i bʌ cha'an cabʌl i pusic'al. Jini p'ʌtʌl bʌ winic mach i chañ'esan i bʌ cha'an i p'ʌtʌlel. Jini wen chumul bʌ winic mach i chañ'esan i bʌ cha'an cabʌl i chubʌ'an.

²⁴ Jini mu' bʌ i chañ'esan i bʌ, la' i ña'tan an i ñuclel cha'an woli' ch'ʌmben isujm yic'ot cha'an woli' cʌñon i Yumon. Wolic pʌsben i yutslel c pusic'al. Mic cha'len chuqui toj. Mic mel winicob x'ixicob ti toj ila ti pañimil. Come tijicñayon che' bajche' jini.

²⁵ Talob jini q'uin tac, che'en lac Yum, che' mi caj cʌc'ob ti toj mulil pejtel jini tsepbilo' bʌ i pʌchʌlel mach bʌ tsepbilobic i pusic'al.

²⁶ Egipto, Edom, i yalobilob Amón yic'ot Moab yic'ot jini arabob chumulo' bʌ ti tiquin bʌ lum yic'ot ja'el jini año' bʌ ti Judá. Come junlajalob pejtelel ili tejclum tac mach bʌ anic mi' tsepob i pʌchʌlel. Pero jatet Judá, ma'anic ma' tsep a pusic'al cha'an ma' c'uxbiñon. Lolom jach ma' tsep a pʌchʌlel.