Jeremias 8 - Chol: I T’an Dios

¹ Ti jim bʌ ora jini la' contrajob mi caj i jamob mucoñibʌl ba' muculob i yumob Judá yic'ot i yalobilob yic'ot motomajob yic'ot x'alt'añob yic'ot i pi'ʌlob.

² Mi caj i q'uiyibeñob i bʌquel ti pam lum ti' c'ʌc'al jini q'uin yic'ot uw yic'ot ec', come jiñobʌch i diosob. Mi' c'uxbiñob, mi' ch'ujutesañob. Mi' pulbeñob pom. Mi' cha'leñob q'uiñijel. Pam pujquem mi caj i cʌytʌl i bʌquel ili winicob che' bajche' ta' ti pam lum. Ma'anix majqui mi caj i much'quiñob cha'an mi' cha' mucob.

³ I colojbal winicob ts'a' mi caj i q'uelob i cuxtʌlel che' ti' yorajlel wocol. Mi caj c pucob majlel ti ñajtʌl, che'en i Yum Panchan yic'ot Pañimil.

Mulil yic'ot meloñel

⁴ Mi caj a subeñob ja'el: Lac Yum woli' yʌl: Che' mi' yajlel winic, ¿mach ba anic mi' cha' ch'ojyel? Che' mi' ñajtʌ majlel, ¿mach ba anic mi' cha' sujtel?

⁵ Pero mach che'ic mi' melob jini chumulo' bʌ ti Jerusalén. Tsi' junyajlel tʌts'ʌyob i bʌ tic tojlel. Ñajt mi' majlelob. Mi' mulañob jontolil, mi' wen mulañob lot. Mach yomobic sujtel.

⁶ Tsac wen q'ueleyob, tsac ñich'tʌbeyob i t'an pero mach uts'atic i t'an. Ma'anic majqui mi' cʌy i mul. Ma'anic mi' tsicob i pusic'al cha'an jontol i melbal. Ti pejtelelob mi' yajcañob majlel i bijlel jontolil che' bajche' caballo mu' bʌ i choc ochel i bʌ ba' woliyob ti guerra.

⁷ Jini ja'al pech mi' ña'tan che' i yorajlelix mi' sujtel ti' c'u'. Che' ja'el jini xmucuy yic'ot x'ajlum yic'ot jojmay yujilob che' i yorajlelix mi' cha' tilelob, pero tontojob c winicob x'ixicob. Mach yomobic i jac'ob c mandar.

⁸ Mi la' wʌl: “Cabʌl lac ña'tʌbal. Cʌntesʌbilonla ti' mandar Dios”, lon che'etla, pero mach tojic mi' subob c mandar la' waj cʌntesajob. Tsi' q'uextʌbeyob i sujmlel.

⁹ Jini xcʌntesajob woli' yʌjq'uelob ti quisin. Mʌcʌlob i yej. Cʌchʌlob mi caj i majlelob ti yambʌ lum cha'an tsi' juch'teq'ueyob i t'an lac Yum. Tsiquil che' jini ma'anic i ña'tʌbal.

¹⁰ Jini cha'an mi caj cʌc' ti tic'lʌntel i yijñamob ti' tojlel i contrajob. Mi caj i chilbeñob i lum cha'an i mul, come wen yujilob lot pejtel winicob x'ixicob, jini ñuco' bʌ yic'ot jini ch'o'ch'oco' bʌ, jini x'alt'añob yic'ot motomajob.

¹¹ Lolom jach tsi' yʌc'ʌyob ti ñʌjp'el i lojwel c pi'ʌlob che' oc'ben i mal. Tsi' yʌlʌyob: “Yom ñʌch'ʌletla come mach talic wocol”, che'ob. Pero mach isujmic i t'an come ma'anic ba' ñʌch'ʌl.

¹² ¿Tsa' ba i yubiyob quisin che' bʌ tsi' ch'ujutesayob i diosob? Ma'anic. Mach yujilobic quisin. Mach yujilic chʌc'an i wut. Jini cha'an mi caj i yajlelob yic'ot jini tsʌnsʌbilo' bʌ. Che' i yorajlelix wocol mi caj i yʌjq'uelob ti chʌmel, che'en lac Yum.

¹³ Mi caj i sʌc jilel ts'usubil yic'ot higo. Mi caj i tiquin i yopol te'. Mach i chʌn tajayobix jini uts'at tac bʌ tsa' bʌ c chajpʌbeyob, che'en lac Yum.

¹⁴ ¿Chuqui woli lac pijtan? ¿Chucoch buchulonla? Tempan la' bʌ. Conla ti chʌmel ya' ba' ts'ajquibil tejclum. Come lac Yum tsi' wʌn ña'ta i yʌc'onla ti chʌmel. Tsi' yʌq'ueyonla lac jap veneno cha'an ti' caj lac mul.

¹⁵ Tsa' la cʌlʌ tal i ñʌch'tʌlel lac lumal, pero ¿bacan tsa' tili? Tsa' la cʌlʌ tal i yorajlel lajmesaya, pero talob i jisañonla laj contrajob.

¹⁶ Ju'ucñayob i t'an i c'ʌchlibob ch'oyolo' bʌ ti norte. Talob ti guerra. Mi' ñijcan i bʌ lum. Talob i jisan lac lum yic'ot pejtelel laj c'ajbal, jini tejclum tac yic'ot jini chumulo' bʌ ti tejclum.

¹⁷ Lac Yum woli' yʌl: Wolic chocbeñetla tilel soldadojob lajalo' bʌ bajche' lucum yujil bʌ tsʌnsa mach bʌ yujilic uts'an. Mi caj i c'uxet, che'en lac Yum.

Uq'uel cha'an Judá yic'ot Jerusalén

¹⁸ Wen ch'ijiyem c pusic'al. Mach yujilic lajmel c ch'ijiyemlel. Mi' yʌc'on ti uq'uel.

¹⁹ Ubinla, woliyob ti uq'uel jini c'uxbibilo' bʌ c pi'ʌlob ti ñajt bʌ lum. ¿Baqui an lac Yum? ¿Tsa' ba i cʌyʌ i cha'len yumʌl ti lac tojlel? che'ob. Lac Yum woli' yʌl: ¿Chucoch tsi' yʌc'ʌyoñob ti mich'? ¿Chucoch tsi' ch'ujutesayob jini dios tac, i melbal tac jini ch'oyolo' bʌ ti ñajtʌl? che'en lac Yum.

²⁰ Tsa'ix ñumi i yorajlel c'ajbal. Tsa'ix ñumi i yorajlel ticwal, pero mach coltʌbilonic la.

²¹ C'unix pañimil mi cubin cha'an woliyob ti wocol c pi'ʌlob. Wocol mi cubin ja'el. Mic cha'len uq'uel. C'ux c pusic'al cha'an wen ch'ijiyemon.

²² ¿Mach ba anic ts'ac ti Galaad? ¿Mach ba anic sts'ʌcaya? ¿Chucoch ma'anic mi' lajmelob jini c'uxbibilo' bʌ c pi'ʌlob?