Jeremias 51 - Chol: I T’an Dios

Lac Yum mi caj i jisan Babilonia

¹ Lac Yum woli' yʌl: P'isi ti a wenta jini yujilo' bʌ jisaya. Mi caj c pʌyob tilel ti contra jini chumulo' bʌ ti Babilonia yic'ot ti' contra pejtel Caldea.

² Mi caj c chocbeñob tilel xwe'ts'oñelob mu' bʌ caj i jats'ob majlel. Che' ti' yorajlel wocol talob jini chumulo' bʌ ti' joytʌlel cha'an mi' chilbeñob pejtel chuqui an i cha'añob.

³ Mi caj i jejq'uelob jini yujilo' bʌ julbʌl ti Babilonia anquese lʌpʌl i cha'añob i pislel cha'an guerra. Mach a p'untan jini ch'iton winicob. Lu' jisañob.

⁴ Mi caj i yajlelob ti bij ya' ti Caldea. Mi caj i chʌmelob.

⁵ Come mach cʌybilobic ti meba' Israel yic'ot Judá anquese cabʌlob i mul ti' tojlel jini Ch'ujul Bʌ ti Israel, jiñʌch i Dios, i Yum Panchan yic'ot Pañimil.

⁶ Loq'uenla ti Babilonia. Puts'enla ti jujuntiquiletla cha'an mi la' coltan la' bʌ. Mach yomic mi la' chʌmel yic'ot jini chumulo' bʌ ti Babilonia, come i yorajlelix mi' tojob i mul. Lac Yum mi caj i yʌq'ueñob i toj i mul.

⁷ Babilonia i wentajʌch taza melbil bʌ ti oro, chucul bʌ i cha'an lac Yum. Tsi' ñusʌbeyob vino winicob ti pejtelel lum. Tsi' lu' japʌyob. Jini cha'an tsa' sojqui i jol.

⁸ Tsa' bʌc' jili i p'ʌtʌlel Babilonia. Junyajlel jejmenix. Uc'tanla. Ch'ʌmʌla tilel ts'ac. Tic'ʌl mi muc'ʌch i ñop.

⁹ Tsac lon ña'ta j coltan ti ts'ac pero mach i coltayic. Cʌyʌla. Conla ti lac lumal ti jujuntiquilonla, come Dios woli' pʌy ti meloñel laj contra. Mux caj i choc jubel wocol ti panchan.

¹⁰ Lac Yum tsi' yʌc'ʌyonla ti colel. Toj mi' q'uelonla. La' lac sub ti Jerusalén pejtelel i melbal lac Yum Dios.

¹¹ Jujchinla i te'el jalʌjb. Lʌpʌla la' pislel cha'an guerra. Lac Yum tsi' xic'beyob i pusic'al jini reyob ti Media cha'an mi' tilelob i jisan Babilonia che' bajche' tsi' wʌn ña'ta, come woli' yʌq'ueñob i toj i mul cha'an tsi' jisʌbeyob i Templo lac Yum.

¹² Letsanla bandera ti' chañelal ts'ajc ya' ti Babilonia. Chʌcʌ q'uele la' bʌ. Subenla soldadojob cha'an mi' wen q'uelob jini tejclum, come lac Yum tsi' yʌc'ʌ ti contrajintel jini chumulo' bʌ ti Babilonia che' bajche' tsi' wʌn ña'ta.

¹³ Anquese wen cabʌl la' chubʌ'an ya' ba' añetla ti' ti' ja', mux caj la' jilel wʌle. Tsa'ix ñumi i yorajlel la' cuxtilel.

¹⁴ Lac Yum tsi' bajñel wa'choco i t'an: Mi caj c pʌyob tilel jomocña bʌ winicob che' bajche' sajc'. Mi caj i mʌjlel i cha'añob, che'en.

¹⁵ Lac Yum jiñʌch tsa' bʌ i mele pañimil ti ñuc bʌ i p'ʌtʌlel. Tsi' xuc'choco pañimil cha'an cabʌl i ña'tʌbal. Tsi' lich'i panchan ja'el. Cabʌl i pusic'al.

¹⁶ Che' mi' cha'len t'an mi' yubintel i jajts ti panchan. Mi yʌc' ti letsel i yowix ja' ti pejtelel pañimil. Mi' mel chajc yic'ot ja'al. Mi' pʌy loq'uel ic' ya' ba' lotol i cha'an.

¹⁷ Che' jini mi' tsictesan i tontojlel winicob mu' bʌ i ñopob dioste'. Jini xmel dios mi' cajel ti quisin, anquese melbil ti oro i dios come lot jach. Ma'anic i ch'ujlel.

¹⁸ Ma'anic i c'ʌjñibal. Mi' lotin winicob. Dios mi caj i jisan.

¹⁹ Pero ma'anic mi caj i jisan Jacob, come yajcʌbil Israel i cha'an Dios tsa' bʌ i mele pejtel chuqui an. Jiñʌch i Yum Panchan yic'ot Pañimil. Che'ʌch i c'aba'.

²⁰ Jatet Ciro i wentajet c machit yic'ot barate' mu' bʌ caj j c'ʌn cha'an mic jisan i yumʌntel winicob ti pejtelel pañimil.

²¹ Mi caj j c'ʌñet cha'an mic jisan jini c'ʌchʌlo' bʌ yic'ot i c'ʌchlib yic'ot jini mu' bʌ i ñijcañob majlel jini carreta.

²² Mi caj j c'ʌñet cha'an mic jisʌbeñob i p'ʌtʌlel winicob yic'ot x'ixicob, jini ñoxo' bʌ yic'ot ch'itoñob.

²³ Mi caj j c'ʌñet cha'an mic puc majlel jini xcʌnta tiñʌme' yic'ot i yʌlac', jini mu' bʌ i pic lum yic'ot tat wacax, jini yumʌlob yic'ot año' bʌ i ye'tel.

²⁴ Mi caj cʌq'uen i tojob i mul pejtel chumulo' bʌ ti Caldea yic'ot Babilonia ti' tojel la' wut, come jontol tsi' melbeyob c cha'año' bʌ ti Sion, che'en lac Yum.

²⁵ Awilan a contrajon cha'an chan tsa' mele a bʌ che' bajche' wits che' bʌ tsa' jisa pejtel pañimil, che'en lac Yum. Mi caj c sʌts' j c'ʌb cha'an mij contrajiñet. Mi caj c choquet jubel ti' chañelal wits. Mi caj c sutq'uiñet che' bajche' pulbil bʌ wits.

²⁶ Junyajlel ch'ijiyem mi caj a cʌytʌl, mi wisilic a c'ʌjñibal. Ma'anix mi caj i cha' c'ʌjñel mi jump'ejlic xajlel ti pejtelel la' wotot, che'en lac Yum.

²⁷ Letsan la' bandera ti pañimil. Wusula jini trompeta ba' mi' yubintel ti pejtelel pañimil cha'an mi' chajpañob i bʌ ti guerra. Pʌyʌla tilel jini chumulo' bʌ ti Ararat ti Mini yic'ot ti Askenaz. Wa'choconla jini yujilo' bʌ guerra. Pʌyʌla tilel cabʌl caballo che' bajche' bajc'ʌlel sajc'.

²⁸ Chajpanla winicob ti Media yic'ot yumʌlob yic'ot año' bʌ i ye'tel yic'ot i pi'ʌlob ti jujump'ejl lum cha'an mi' tilelob ti guerra ti' contra Babilonia.

²⁹ Mi' cha'len yujquel lum. Wen ch'ijiyem jax Babilonia cha'an wocol. Woli' jisʌntel Babilonia come xuc'ul lac Yum. Mi' lu' mel che' bajche' ña'tʌbil i cha'an.

³⁰ Tsa' puts'iyob ti guerra jini p'ʌtʌlo' bʌ winicob ti Babilonia. Woli' mujcuñob i bʌ ti ts'ajquibil bʌ otot tac. Ma'añobix i p'ʌtʌlel. Lajal tsa' sujtiyob che' bajche' x'ixicob. Woli' pulel i chumlib tac. Laj xujlemix i c'ʌclib tac i ti'.

³¹ Tal ti ajñel jini xq'uel tejclum cha'an mi' suben yambʌ cha'an joyolix jini tejclum. Mi' jelob i bʌ ti ajñel jini suboñelob cha'an mi' majlelob i subeñob jini rey ti Babilonia.

³² Woli' t'umob ja' jini xguerrajob cha'an mi' yochelob ti tejclum. Ma'anix majqui mi' mʌctañob. Tsa'ix puts'iyob ti bʌq'uen jini soldadojob ti Babilonia. Woli' pulel tac i ts'ajquil tejclum.

³³ I Yum Panchan yic'ot Pañimil, i Dios Israel, woli' yʌl: Tsa'ix sujti Babilonia che' bajche' i jajts'ib trigo ti' yorajlel c'ajbal. Mach jalix tal i yorajlel c'ajbal ti Babilonia che' mi' chojquel ochel ti c'ajc pejtel i sujl, che'en.

³⁴ Jini israelob woli' yʌlob: Nabucodonosor, rey bʌ ti Babilonia, tsi' jisayonla. Tsi' teñeyonla ti' yoc yubil. Tsi' chilbeyonla pejtelel lac chubʌ'an. Tsi' jisa lac bʌc'tal che' bajche' jontol bʌ ts'i'. Che' jasʌlix i cha'an, tsi' chocoyonla loq'uel ti lac lumal.

³⁵ La' cha' sutq'uibentic che' bajche' tsi' melbeyonla ya' ti Jerusalén. La' i tojob i mul jini chumulo' bʌ ti Caldea, che'ob.

³⁶ Joñon mi caj j coltañet, che'en lac Yum. Mi caj c wersa c'ajtibeñob i tojol. Mi caj c tiquesan jini colem ñajb ti Babilonia yic'ot pejtel i loq'uib ja'.

³⁷ Jejmenix mi caj i cʌytʌl Babilonia. Mi caj i sujtel ti' yotot jontol bʌ ts'i'. Mi caj i bʌc'ñʌntel. Mi caj i p'ajtʌl. Jochol mi caj i cʌytʌl.

³⁸ Mi caj i tem cha'leñob oñel che' bajche' i yal bajlum. Ñajt mi caj i yubintel i t'an.

³⁹ Che' mich'obix, joñon mi caj c melbeñob q'uin cha'an mi' cha'leñob we'el uch'el. Che' jini mi caj i yʌc'añob cha'an tijicñayob i pusic'al. Mi' cajelob ti wʌyel, pero mach chʌn ch'ojyix, che'en lac Yum.

⁴⁰ Mi caj c tsʌnsañob che' bajche' tiñʌme' yic'ot chivo.

⁴¹ Ch'ʌmbilix Babilonia, i tejclum jini rey. Mach chʌn anix jini tejclum tsa' bʌ q'uejli ti ñuc ti pejtelel pañimil. Jisʌbilix Babilonia ti' tojlel pejtelel winicob.

⁴² Tsa'ix ochi ti Babilonia jini colem ñajb. Pam an i ya'lel.

⁴³ Lu' jisʌbilix jini tejclum tac. Tsa'ix sajti i c'ʌjñibal lum. Ma'anix chuqui mi' chʌn colel. Ma'anix majqui mi' ñumel ya'i.

⁴⁴ Mi caj cʌq'ueñob i toj i mul pejtel mu' bʌ i ch'ujutesañob Bel, i dios Babilonia. Mi caj c chilbeñob pejtel chuqui tac tsi' chilbeyob yaño' bʌ. Ma'anix majqui mi caj i chʌn pejcan Bel. Isujm, tsa'ix yajli i ts'ajquil Babilonia, che'en lac Yum.

⁴⁵ C pi'ʌlob, loq'uenla ya'i. Coltan la' bʌ ame jiliquetla che' mi' choc tilel wocol lac Yum come wen mich'.

⁴⁶ Chʌcʌ q'uele la' bʌ ame c'uñ'ac la' pusic'al ti bʌq'uen che' mi la' wubin chuqui tac tal. Ti jujump'ejl jab mi caj la' wubin t'an cha'an muc'ʌch i jisʌntel jini lum. Mi' contrajiñob i bʌ jini yumʌlob ti Babilonia.

⁴⁷ Awilan, tal jini q'uin che' mi caj c jisan jini dioste' tac ti Babilonia. Mi' cajelob ti quisin pejtelel jini mu' bʌ i ñopob. Mi caj i tsʌnsʌntelob.

⁴⁸ Ti jim bʌ ora tijicñayob i pusic'al jini año' bʌ ti panchan yic'ot jini año' bʌ ti pañimil, che' mi' jilel Babilonia. Ix tilelob jini ch'oyolo' bʌ ti norte cha'an mi' jisañob, che'en lac Yum.

⁴⁹ Wersa mi caj i toj i mul Babilonia cha'an tsi' tsʌnsa israelob. Che' bajche' tsi' yʌc'ʌ ti chʌmel yaño' bʌ ti pejtel pañimil che' ja'el mi caj i yʌjq'uel ti chʌmel.

⁵⁰ Jatetla cuxulet to bʌ la mach bʌ anic tsa' yajliyetla ti espada, cucula ti puts'el. Mach yomic che' to'ol wa'alet jach la. Chʌn ña'tanla lac Yum ya' ti ñajtʌl baqui jach mi la' majlel. Chʌn ña'tanla Jerusalén.

⁵¹ Woliyonla ti quisin cha'an cabʌl la cʌ'lentel cha'an lac mul, come jini partejo' bʌ woli' t'uchtañob jini ch'ujul bʌ lum ya' ba' tsa' ajni i yotot lac Yum.

⁵² Jini cha'an ña'tanla tal jini q'uin tac che' mi caj cʌq'ueñob i toj i mul jini mu' bʌ i ch'ujutesañob dioste' tac, che'en lac Yum. Jini jec'bilo' bʌ ti espada mi caj i yajlelob ti lum. Ajacña mi' cajelob ti ajcʌn.

⁵³ Anquese chan mi' mel i bʌ Babilonia, anquese cabʌl jax i p'ʌtʌlel, anquese wen melbil tac i ts'ajquil, pero joñon mi caj c choc tilel jini yujilo' bʌ guerra cha'an mic jisan, che'en lac Yum.

⁵⁴ Ubi. An majqui woli ti oñel ya' ti Babilonia. Woli ti jejmel colem otot tac ti' lumal caldeojob.

⁵⁵ Lac Yum woli' jisan Babilonia. Ñʌch'ʌl mi caj i cʌytʌl jini tejclum. Motocñayob i contrajob mi' pam ñumelob ti lum. Woli' p'ojlel wocol.

⁵⁶ Come woli' jisʌntel Babilonia. Woli' wersa pʌjyelob majlel i soldadojob, jejmenix i te'el jalʌjb. Come lac Yum Dios mi' mel winicob. Wersa mi caj i tojob i mul.

⁵⁷ Mi caj c xic'ob ti yʌc'ajel i yumob Babilonia yic'ot jini año' bʌ i ña'tʌbal yic'ot año' bʌ i ye'tel yic'ot soldadojob yic'ot i capitañob. Mi' cajelob ti wen wʌyel. Mach chʌn ch'ojyix. Che' woli' yʌl jini ñuc bʌ Rey, i Yum Panchan yic'ot Pañimil.

⁵⁸ Jini chan bʌ ts'ajc ti' joytʌlel Babilonia mi caj i chojquel jubel. Mi caj i laj pulel jini chan bʌ i ti' tac. Lolom jach tsi' meleyob jini yujilo' bʌ i wa'chocontel. Ñajt tsa' tiliyob ti e'tel. Pero mi caj i lu' jilel i ye'tel ti c'ajc.

⁵⁹ Che' chʌmp'ejlix jab i yumʌntel Sedequías, tsa' tili i t'an lac Yum ba'an Jeremías cha'an mi' cha' suben Seraías (i yalobil Nerías, i yalobil bʌ Maasías). Jini Seraías tsi' pi'le ti majlel Sedequías rey bʌ ti Judá che' bʌ tsa' wersa pʌjyi majlel ti Babilonia.

⁶⁰ Jeremías tsi' yotsa ti jun pejtel ili wocol mu' bʌ caj i taj Babilonia.

⁶¹ Jeremías tsi' sube Seraías: Che' ma' c'otel ti Babilonia pejcan pejtel ili t'an cha'an bajche' mi caj i yujtel Babilonia.

⁶² Suben lac Yum ti oración: “Jatet, c Yum, tsa' wʌlʌ muc'ʌch i jilel ili lum. Jatet mi caj a jisan. Ma'anix majqui mi caj i chʌn chumtʌl ilayi, mi winic, mi bʌte'el. Jochol mi caj i cʌytʌl ti pejtelel ora”. Che'ʌch yom ma' suben lac Yum.

⁶³ Che' mi' yujtel a pejcan ili jun, cʌchʌ yic'ot xajlel. Choco ochel ti yojlil jini colem ja' Eufrates.

⁶⁴ Subu: “Che'ʌch mi' caj ti jubel Babilonia. Mach chʌn ch'ojyix cha'an woli cʌq'uen i toj i mul, che'en lac Yum. Che' yom ma' sub”, che'en Jeremías. Jiñʌch i t'an Jeremías c'ʌlʌl jach ilayi.