Jeremias 50 - Chol: I T’an Dios

T'an ti' tojlel Babilonia

¹ Tsa' tili i t'an lac Yum ti' contra Babilonia i lumal jini caldeojob. Tsi' sube Jeremías:

² Subu ti pejtelel pañimil. Techela bandera ba' mi' wen q'uelob winicob. Mach mi la' muc. Alʌ: “Jisʌbilix Babilonia. Jembilix i yejtal tac i dios. Woliyob ti quisin jini tsa' bʌ i ch'ujutesayob Bel yic'ot Merodac. Woli' toj sajtelob i pusic'al cha'an ma'anic i coltʌntel ti' dios tac melbil bʌ ti ts'ajc”.

³ Come tsa'ix juliyob jini ch'oyolo' bʌ ti norte. Mi caj i jisañob jini lum. Jochol mi caj i cʌytʌl. Ma'anic majqui mi' caj ti chumtʌl ya'i, mi winic, mi bʌte'el. Mi caj i laj puts'elob.

⁴ Ti jim bʌ ora jini ch'oyolo' bʌ ti Israel yic'ot ti Judá mi caj i temel sujtelob ti' lumal. Ju'ucñayob mi caj i tilelob. Mi caj i sʌclañob i Yum Dios.

⁵ Mi caj i c'ajtiñob majlel i bijlel Sion. “Conla”, che'ob. “La' lac ñochtan lac Yum. La' la cʌq'uen lac bʌ ti trato mach bʌ yujilic jejmel ti pejtelel ora”, che'ob. Che' yom ma' subeñob, che'en lac Yum.

⁶ Sajtemob c winicob x'ixicob che' bajche' tiñʌme'. Ti' caj i mul jini xcʌnta tiñʌme'ob tsa' sajtiyob ya' ti wits tac cha'an tsi' ñopoyob lot. Jini cha'an mach chʌn c'ajalix i cha'añob i bijlel c'aj o.

⁷ I contrajob tsi' tajayob. C'unte' c'unte' tsi' jisayob. Jini xjisayajob tsi' yʌlʌyob: “Ma'anic lac mul, bajñel añob i mul cha'an tsi' cʌyʌyob i Yum, jini toj bʌ i Dios i tatob”, che'ob.

⁸ Loq'uenla ti Babilonia ya' ba' chumuletla. Cʌyʌxla i lumal jini caldeojob. Cucula ti ñaxan che' bajche' tat chivo mu' bʌ i pʌsbeñob i bijlel i pi'ʌlob.

⁹ Woli' temob i t'an cabʌl tejclum tac ti norte. Joñon wolic xic'ob cha'an mi' tilelob ti contra Babilonia. Woli' chajpañob i bʌ. Mi caj i mʌjlel i cha'añob. Wen yujilob julbʌl. Ma'anic mi' to'ol sajtel i te'el i jalʌjb. Ma'anic mi' wis ts'ej i bʌ.

¹⁰ Jini soldadojob mi caj i xujch'iñob majlel i chubʌ'an Caldea i wenta i majtan. Tijicñayob mi' majlelob ti jujuntiquilob yic'ot cabʌl chubʌ'añʌl.

¹¹ Jatetla, caldeojob, tijicña tsa' la' wubi che' bʌ tsa' la' xujch'ibeyob majlel i chubʌ'an c winicob. Chan tsa' la' mele la' bʌ. Lajaletla bajche' alʌ wacax tip'tip'ña bʌ ti jamil yic'ot tat caballo mu' bʌ i taj i ch'oclel.

¹² Pero mi caj a wubin quisin, Babilonia. Mi caj a sujtel ti pec' ti' tojlel yaño' bʌ winicob. Tiquin mi caj i majlel a lum. Mi caj i sajtel i c'ʌjñibal, che'en lac Yum.

¹³ Cha'an mich' lac Yum jini cha'an jochol mi caj i cʌytʌl Babilonia. Ma'anic majqui mi caj i chumtʌl ya'i. Mi caj i toj sajtelob i pusic'al jini xñumelob che' mi' q'uelob i p'ajomal. Mi caj i p'ajob.

¹⁴ Chajpan la' bʌ pejteletla joy chumulet bʌ la. Tujc'an i ch'ajñal a jalʌjb. Julula jini tejclum. Lu' jisanla come añob i mul ti' tojlel lac Yum.

¹⁵ Cha'lenla oñel ti' joytʌlel tejclum. Woli' jambeñetla i ts'ajquil. Jejmenix i xijc'untib jini ts'ajc. Che'ʌch woli' yʌq'uentel i toj i mul cha'an tsi' ñusa i t'an lac Yum. Jini cha'an sutq'uibenla i jontolil. Melbenla che' bajche' tsi' melbeyet.

¹⁶ Jisan xpac'ob ti Babilonia yic'ot xc'ajbalob. Jini ya' bʌ chumulob mi' cajelob ti bʌq'uen. Mi caj i puts'elob majlel ti jujuntiquil, ame jisʌnticob ti espada.

¹⁷ Pam pujquemob israelob che' bajche' tiñʌme' ajñesʌbil ti bajlum. Ñaxan tsi' cha'le jisaya Asiria. Wi'il tsi' cha'le jisaya jini rey Nabucodonosor ti Babilonia.

¹⁸ Lajal woli' majlel lum che' bajche' bac woli bʌ i c'ux ts'i'. Jini cha'an joñon mi caj cʌq'uen i toj i mul jini rey ti Babilonia yic'ot i winicob, che'en i Yum Panchan yic'ot Pañimil, i Dios Israel, che' bajche' tsa cʌq'ue i toj i mul jini rey ti Asiria.

¹⁹ Mi caj c cha' pʌy tilel Israel wʌ' ti' lumal. Cha' tijicña mi caj i chumtʌlob ti Carmel yic'ot ti Basán. Tijicña mi' cajelob ti c'ajbal ti' bujtʌl tac Efraín yic'ot ti Galaad.

²⁰ Ti jim bʌ ora mi caj i wersa sʌclʌntel i mul i colojbal Israel yic'ot Judá, pero ma'anix tsiquil i mul, come joñon mi caj c ñusʌbeñob.

²¹ Cucu ti' contra jini xtejclumob ti Babilonia. Laj jisañob. Melbeñob che' bajche' tsac subeyet cha'an ma'anic chuqui mi' cʌytʌl ti' lumal.

²² Ix tilelob xguerrajob yujilo' bʌ jisaya.

²³ Tsa'ix sujti ti pec' Babilonia ti' tojlel pejtel winicob. Xujlemix jini martillo yilal tsa' bʌ i jats'ʌ yaño' bʌ.

²⁴ Tsac chucuyet ti yac Babilonia, come mach yʌxʌlic a wo. Tsac tajayet. Tsac chucuyet cha'an tsa' xiq'uiyon ti mich'ajel.

²⁵ Lac Yum tsi' jamʌ i yotlel i ye'tijib come mich'. An chuqui mi caj i c'ʌn ti' contra jini caldeojob I Yum Panchan yic'ot Pañimil.

²⁶ La' la, winicob ti pejtelel pañimil, contrajinla ti guerra. Jochtesanla i yotlel i buc'bal i yʌlac'. P'ulchocoben i ts'ajquil i tejclum che' bajche' i sic'bal ixim. Laj jisanla Babilonia jinto che' ma'anix chuqui mi' cʌytʌl.

²⁷ Tsʌnsanla pejtelel winicob. Obolob i bʌ, come i yorajlelix mi' tojob i mul.

²⁸ Ubinla. Woli' puts'elob loq'uel ti Babilonia jini israelob. Woli' sujtelob ti Sion. Ya' ti Templo mi caj i subob bajche' tsi' wersa tojoyob i mul i contrajob.

²⁹ Pʌyʌla tilel jini yujil bʌ julbʌl cha'an mi' contrajin Babilonia. Wa'i'la ti' joytʌlel. Laj chucula jini yomo' bʌ puts'el. Jisanla Babilonia che' bajche' tsi' jisayet, come wen chan tsi' mele i bʌ ti' tojlel lac Yum, jini Ch'ujul Bʌ ti Israel.

³⁰ Jini cha'an mi caj i chʌmelob jini ch'iton winicob ti' bijlel tac Babilonia. Pejtel i soldadojob mi caj i tsʌnsʌntelob, che'en lac Yum.

³¹ Wolij contrajiñet cha'an chan a pusic'al, che'en Dios, i Yum Panchan yic'ot Pañimil, come tsa'ix juli i yorajlel cha'an mic melet. Mi caj c jultesʌbeñet a pusic'al.

³² Jini chan bʌ mi' mel i bʌ mi' caj ti yajlel. Ma'anic majqui mi caj i cha' tech letsel. Mi caj c tsuc' c'ajc ti tejclum. Mi caj i lu' pulel ti c'ajc.

³³ I Yum Panchan yic'ot Pañimil woli' yʌl: Temelob jini israelob yic'ot judíojob, woli' tic'lʌntelob. Tsʌts chuculob i cha'an i yumob, ame loq'uicob ti' wenta.

³⁴ Wen p'ʌtʌl i yaj coltaya, i Yumʌch Panchan yic'ot Pañimil. Che'ʌch i c'aba'. Mi caj i coltañob cha'an mi' loq'uelob ti' p'ʌtʌlel i yumob, cha'an mi' cha' ñʌjch'el pañimil, pero jini caldeojob mi caj i yubiñob wocol.

³⁵ Talob mu' bʌ caj i jisañob ti espada jini caldeojob yic'ot jini chumulo' bʌ ti Babilonia, yic'ot año' bʌ i ye'tel yic'ot año' bʌ i ña'tʌbal.

³⁶ Jini espada mi caj i jec' jini xwujtob cha'an mi' sojquel i jol. Mi caj i jec' jini soldadojob. Mi' cajelob ti bʌq'uen.

³⁷ Jini espada mi caj i jisan jini caballo tac yic'ot i carreta yic'ot pejtelel jini soldadojob parte ba' ch'oyolob. Mi caj i sujtelob che' bajche' x'ixicob. Mi caj i xujch'intel jini chubʌ'añʌl letsem tac bʌ i tojol.

³⁸ Mi caj i tiquin ja'. Jini colem ja' mi caj i sujtel ti tiquin pa' cha'an ti' caj dioste' tac, cha'an woli' ch'ujutesañob ejtalʌl tac. Woli' bajñel socob i jol.

³⁹ Talob ti chumtʌl bʌte'el. Jini jontol bʌ ts'i' mi caj i yajñel ya'i yic'ot xja'al pech chan bʌ i yoc. Ma'anix mi caj i chʌn chumtʌlob winicob x'ixicob ti ili lum ti pejtelel ora.

⁴⁰ Dios mi caj i jisan Babilonia che' bajche' tsi' jisa Sodoma yic'ot Gomorra yic'ot jini xchumtʌl tac ti' joytʌlel, che'en lac Yum. Ma'anix majqui mi caj i chumtʌl ya'i ti pejtelel ora.

⁴¹ Q'uele. Ix tilelob winicob ch'oyolo' bʌ ti norte, bajc'ʌl winicob yic'ot i yumob chumulo' bʌ ti' ñajtʌlel pañimil.

⁴² Chuculob i cha'an jalʌjb yic'ot i te'el. Jontolob jax. Mach yujilobic p'untaya. Ju'ucñayob ti t'an che' bajche' i t'an colem ñajb. C'ʌchʌlob woli' tilelob, chajpʌbilob cha'an guerra, cha'an mi' contrajiñet Babilonia.

⁴³ Woli ti bʌq'uen i yum Babilonia cha'an talob i contra. Jini cha'an c'unix i c'ʌb. Woli ti wocol che' bajche' x'ixic woli' bʌ ti bajq'uel.

⁴⁴ Q'uele ix tilelob i contra che' bajche' bajlum ti mate'el ya' ti' ti' Jordán. Talob i jisan jini xuc'ul bʌ tejclum. Mi caj c choc loq'uel i yumob. Mi caj c wa'chocon c winic yajcʌbil bʌ c cha'an. Come ¿am ba yam bʌ bajche' joñon? ¿Majqui mi' subeñon chuqui yom mic mel? ¿Am ba juntiquil xq'uelojel mu' bʌ mejlel i mʌctañon? che'en lac Yum.

⁴⁵ Ubin chuqui wʌn ña'tʌbil i cha'an lac Yum. Mi caj i mel Babilonia ya' ti' lumal jini caldeojob. Mi caj i wersa pʌyob majlel ti to'ol e'tel yic'ot jini alʌlo' bʌ i cha'añob. Obolob i bʌ cha'an ili bʌbʌq'uen bʌ mu' bʌ caj i tajob.

⁴⁶ Tsiltsilña pañimil yubil cha'an tsa' yajli Babilonia. Mi caj i c'ʌlʌl c'otel i yuq'uel ti ñajt bʌ lum tac.