Jeremias 34 - Chol: I T’an Dios

Jeremías tsi' tiq'ui Sedequías

¹ Jiñʌch i t'an lac Yum tsa' bʌ tili ba'an Jeremías che' woli ti guerra Nabucodonosor, rey bʌ ti Babilonia, yic'ot pejtel i winicob yic'ot yaño' bʌ loq'uemo' bʌ ti jujump'ejl tejclum. Woliyob ti guerra ti' contra Jerusalén yic'ot ti' contra pejtelel i tejclum tac Judá.

² Lac Yum, i Dios Israel, woli' yʌl: Cucu pejcan Sedequías rey bʌ ti Judá. Suben: “Lac Yum woli' yʌl: Awila to mi caj cʌc' ili tejclum ti' c'ʌb jini rey ti Babilonia. Mi caj i pul yic'ot c'ajc.

³ Mach loq'uiquet ti' c'ʌb. Mi caj a cʌjchel majlel ti Babilonia. Mi caj a q'uelben i wut jini rey ti Babilonia. Mi caj i pejcañet che' ma' pʌjyel majlel ti' tojlel.

⁴ Ubiben i t'an lac Yum, Sedequías, reyet bʌ ti Judá. Ma'anic mi caj a chʌmel ti espada.

⁵ Ñʌch'ʌl a pusic'al mi caj a chʌmel. Mi caj i yuc'tañet a pi'ʌlob mu' bʌ i p'untañet. Che' mi' muquetob mi caj i pulob pom che' bajche' tsi' melbeyob a tatob. Tsa'ix cʌc'ʌ c t'an”. Che' yom ma' suben Sedequías, che'en lac Yum.

⁶ Jini x'alt'an Jeremías tsi' lu' sube Sedequías, rey bʌ ti Judá ya' ti Jerusalén

⁷ che' woliyob ti guerra jini ch'oyolo' bʌ ti Babilonia ti' contra Jerusalén yic'ot pejtelel i tejclum tac Judá. Ti pejtelel jini ts'ajquibil bʌ tejclum ti Judá tsa' jach cʌle cha'p'ejl, jini jach Laquis yic'ot Azeca.

Hebreojob ti majtan e'tel

⁸ Jiñʌch i t'an lac Yum tsa' bʌ tili ba'an Jeremías che' ujtel to i mel trato jini rey Sedequías yic'ot pejtel chumulo' bʌ ti Jerusalén cha'an mi' yajñel ti libre pejtel judíojob.

⁹ Tsi' subeyob hebreojob cha'an mi' yʌc'ob ti colel pejtel i pi'ʌlob woliyo' bʌ ti majtan e'tel, winicob yic'ot x'ixicob. Tsi' subeyob mach yomic mi' yotsañob i pi'ʌlob ti majtan e'tel.

¹⁰ Jini yumʌlob yic'ot yaño' bʌ tsa' bʌ i jac'ʌyob jini trato tsi' yʌc'ʌyob ti colel pejtel woliyo' bʌ ti majtan e'tel, winicob yic'ot x'ixicob cha'an mi' yajñelob ti libre. Tsi' jac'ʌyob. Tsi' yʌc'ʌyob ti colel.

¹¹ Pero ti wi'il tsi' cha' q'uextayob i t'an. Tsi' cha' chucuyob jini loq'uemobix bʌ ti' wenta.

¹² Tsa' tili i t'an lac Yum ba'an Jeremías.

¹³ I Dios Israel, jiñʌch lac Yum, tsi' yʌlʌ: Joñon tsac mele xuc'ul bʌ t'an yic'ot la' tatob che' bʌ tsac pʌyʌyob loq'uel ti Egipto ba' chuculob ti majtan e'tel. Tsac subeyob:

¹⁴ Che' mi' joloñel wʌcp'ejl jab wersa mi caj a wʌc' ti colel pejtel hebreo tsa' bʌ a mʌñʌ tsa' bʌ i melbeyet a we'tel wʌcp'ejl jab. Wersa mi caj a wʌc' ti colel cha'an libre mi' yajñel. Che'ʌch tsac subeyob la' tatob, pero tsʌtsob i pusic'al. Ma'anic tsi' jac'ʌyob. Tsi' ñusayob c t'an.

¹⁵ Jatetla tsa' la' poj mele la' pusic'al. Tsa' la' mele chuqui toj tic wut che' bʌ tsa' la' wʌc'ʌ ti libre la' pi'ʌlob. Tsa' la' mele trato tic tojlel ya' tic Templo ba' mic tsictesan c ñuclel.

¹⁶ Pero tsa' la' cha' q'uexta la' t'an. Tsa' la' bib'esa j c'aba' che' bʌ tsa' la' cha' chucu ti la' wenta jini yomo' bʌ ajñel ti libre. Tsa' la' cha' cʌchʌyob cha'an mi' wersa melob la' we'tel.

¹⁷ Jini cha'an lac Yum woli' yʌl: Ma'anic tsa' la' jac'ʌ c t'an cha'an mi la' wʌc' ti colel la' pi'ʌlob woliyo' bʌ ti majtan e'tel. La' wila to, woli cʌq'uetla ti libre cha'an mi la' chʌmel ti espada yic'ot ti c'amʌjel yic'ot ti wi'ñal, che'en lac Yum. Mi caj i toj sajtelob i pusic'al pejtel winicob ti pañimil che' mi' q'ueletla.

¹⁸ Mi caj cʌc' ti' c'ʌbob i contrajob pejtel winicob tsa' bʌ i jemeyob xuc'ul bʌ c t'an, tsa' bʌ i ñusayob c t'an. Che' bʌ tsac melbeyob xuc'ul bʌ t'an, tsi' jawʌyob ti ojlil jini alʌ tat wacax. Tsi' c'ʌcchocoyob ti jujunwejl. Tsa' ñumiyob ti ojlil.

¹⁹ Che'ʌch tsi' meleyob pejtel i yumob Judá yic'ot i yumob Jerusalén yic'ot eunucojob, yic'ot motomajob yic'ot pejtel winicob tsa' bʌ ñumiyob ti ojlil che' t'oxbil jini alʌ wacax.

²⁰ Mi caj cʌc'ob ti chʌmel ti' c'ʌb i contrajob. Jini te'lemut yic'ot bʌte'el mi caj i c'uxbeñob i bʌc'tal.

²¹ Mi caj cʌc' Sedequías, rey bʌ ti Judá, yic'ot i yalobilob Sedequías ti' wenta i contrajob yomo' bʌ i tsʌnsañob. Anquese poj majlemob jini soldadojob i cha'an jini rey ti Babilonia, cha' talob.

²² Awila to. Joñon mi caj cʌc' mandar cha'an mi' cha' sujtelob ilayi cha'an mi' cha' techob guerra ti' contra ili tejclum. Mi caj i t'uchtañob. Mi caj i pulob ti c'ajc. Joñon mi caj c jisan pejtel i tejclum tac Judá cha'an jochol mi' cʌytʌl, che'en lac Yum.