Jeremias 29 - Chol: I T’an Dios

Jeremías tsi' choco majlel jun ba'an xcʌjchelob

¹ Jini x'alt'an Jeremías tsi' chocbeyob majlel ts'ijb jini xñoxo' bʌ, yic'ot motomajob, yic'ot x'alt'añob, yic'ot pejtel winicob tsa' bʌ cʌjchiyob majlel ti' wenta Nabucodonosor rey bʌ ti Babilonia.

² Come lu' majlemobix jini rey Jeconías yic'ot i ña' yic'ot eunucojob yic'ot yumʌlob ti Judá yic'ot ti Jerusalén, yic'ot yujilo' bʌ e'tel ti pʌchi, yic'ot ti taq'uin, yic'ot xmel pisilob yic'ot xjuc'te'ob. Tsa' lu' pʌjyiyob majlel ti Babilonia.

³ Jeremías tsi' yʌq'ueyob jun Elasa (i yalobil Safán) yic'ot Gemarías (i yalobil Hilcías), come chocbilob majlel ti Babilonia cha'an Sedequías rey bʌ ti Judá, cha'an mi' pejcañob jini rey Nabucodonosor.

⁴ I Yum Panchan yic'ot Pañimil, i Dios Israel woli' subeñob pejtel jini cʌchʌlo' bʌ ti Babilonia: Joñon tsac chocoyetla loq'uel ti Jerusalén.

⁵ Wa'chocon la' wotot. Cha'lenla chumtʌl ya'i. Cha'lenla pac' yic'ot c'ajbal. C'uxbenla i wut la' pʌc'ʌb.

⁶ Pʌyʌla la' wijñam. La' p'ojlicob la' walobilob. Sijinla xch'ocob la' cha'an, cha'an mi' p'ojlelob, ame jiliquetla.

⁷ Cha'lenla e'tel. Melela chuqui mi caj i coltan jini tejclum ya' ba' añetla. C'ajtibenla Dios cha'an mi' coltan ja'el, come tijicñayetla che' tijicña la' tejclum, che'en lac Yum.

⁸ I Yum Panchan yic'ot Pañimil, i Dios Israel woli' yʌl: Mach yomic mi la' jac'beñob i t'an jini x'alt'añob yic'ot xwujtob año' bʌ ti la' tojlel mu' bʌ i cha'leñob lot. Mach la' ñich'tʌbeñob i t'an xñajal.

⁹ Come lot jach chuqui woli' subob tij c'aba'. Mach chocbilobic tilel c cha'an, che'en lac Yum.

¹⁰ Ubinla i t'an lac Yum: Che' ñumenix lujump'ejl i chʌnc'al (70) jab che' ya' chumuletla ti Babilonia, cha' talon c pʌyetla loq'uel che' bajche' tsac subeyetla. Mi caj la' sujtel ti la' lumal.

¹¹ Come cujil chuqui com c melbeñetla, che'en lac Yum. Com ñʌch'ʌletla. Mach comic mi' tajetla wocol. Com cʌq'ueñetla chuqui uts'at woli bʌ la' pijtan.

¹² Che' jini mi caj la' pejcañon. Mi caj la' tilel la' pejcañon ti oración. Joñon mi caj cubibeñetla la' t'an.

¹³ Mi caj la' sʌclañon. Che' mi la' sʌclañon ti pejtelel la' pusic'al, mi caj la' tajon.

¹⁴ Mi caj cʌc' c bʌ ti cʌjñel ti la' tojlel, che'en lac Yum. Mi caj c cha' sutq'uibeñetla la' lum yic'ot i tijicñʌyel la' pusic'al che' mic pʌyetla loq'uel ti jujump'ej lum ba' tsac wets'eyetla majlel, che'en lac Yum. Joñon mi caj c cha' pʌyetla ochel ti la' lum ba' tsac chocoyetla loq'uel.

¹⁵ Pero wolix la' puc lot. Woli la' wʌl: “Añob x'alt'añob lac cha'an ti Babilonia wa'chocobilo' bʌ i cha'an lac Yum”, lon che'etla.

¹⁶ Jini cha'an mi caj c chocben tilel wocol jini rey am bʌ ti' buchlib David yic'ot pejtelel la' pi'ʌlob chumulo' bʌ ti ili tejclum, tsa' bʌ cʌleyob che' majlemetixla ti Babilonia.

¹⁷ La' wila to, che'en lac Yum. Wolic chocbeñob tilel uxchajp wocol. Mi caj i chʌmelob ti espada yic'ot ti wi'ñal yic'ot ti c'amʌjel. Lajal mi caj i sujtelob che' bajche' higo tac woli bʌ ti oc'mʌl. Lecojix, mach mʌc'bilix.

¹⁸ Mi caj c pam pucob ti pañimil. Baqui jach mic chocob mi caj i ts'a'lentelob, mi caj i p'ajtʌlob

¹⁹ cha'an ti' caj tsi' ñusayob c t'an. Ma'anic tsi' ñich'tayob c t'an che' bʌ tsac chocbeyob tilel x'alt'añob cha'an mic pejcañob ti oñiyi c'ʌlʌl wʌle. Mach yomic i jac'ob, che'en lac Yum.

²⁰ Jini cha'an ubinla i t'an lac Yum, pejteletla ti Babilonia, chocbiletla loq'uel ti Jerusalén.

²¹ I Yum Panchan yic'ot Pañimil, i Dios Israel, woli' yʌl: Q'uelel c cha'an jini cha'tiquil x'alt'añob mu' bʌ i cha'leñob lot tij c'aba, Acab i yalobil Colaías yic'ot Sedequías i yalobil Maasías. Woli cʌc'ob ti' c'ʌb jini rey Nabucodonosor ya' ti Babilonia mu' bʌ caj i tsʌnsañob ti' tojel la' wut.

²² Cha'an ti' caj i lot ili cha'tiquil mi' cajelob ti p'ajoñel pejtel i pi'ʌlob año' bʌ ti ñajt bʌ lum tsa' bʌ cʌjchiyob loq'uel ti Judá. Mi caj i yʌlob: “La' i melet che' bajche' Sedequías yic'ot Acab tsa' bʌ ajq'uiyob ti pojpontel ti c'ajc cha'an jini rey ti Babilonia”. Che'ʌch mi' cajelob ti p'ajoñel.

²³ Quisintic jax chuqui tsi' meleyob. Tsi' cha'leyob i ts'i'lel yic'ot x'ixicob año' bʌ i ñoxi'al. Tsi' cha'leyob subt'an tij c'aba', pero mach isujmic. I lot, come ma'anic tsac pejcayob. Cujil bajche' woli' melob, come lu' q'uelel c cha'an i melbalob, che'en lac Yum.

²⁴ Suben Semaías ch'oyol bʌ ti Nehelam:

²⁵ “I Yum Panchan yic'ot Pañimil, i Dios Israel, woli' yʌl: Tsa' chocbeyob majlel jun jini chumulo' bʌ ti Jerusalén yic'ot jini motomaj Sofonías (i yalobil Maasías) yic'ot pejtel i pi'ʌlob ti motomajil. Tsa' ts'ijba t'an loq'uem bʌ ti a bajñel pusic'al. Tsa' sube Sofonías:

²⁶ Lac Yum tsi' wa'chocoyet ti motomajil i q'uexol jini motomaj Joiada. Tsi' yotsa ti a wenta cha'an ma' wʌc' ti mʌjquibʌl majqui jach sojquem i jol mu' bʌ i sub i bʌ ti x'alt'an.

²⁷ ¿Chucoch ma'anic tsa' chucu jini xlot Jeremías ch'oyol bʌ ti Anatot, mu' bʌ i sub i bʌ ti x'alt'an?

²⁸ Come jini Jeremías tsi' chocbeyon lojon tilel jun wʌ' ba' cʌchʌlon lojon ti Babilonia. Jal abi mi caj j cʌytʌl ilayi. Uts'at abi mic mel lojon cotot cha'an wʌ'to mi cajñel cabʌl jab. Muc' abi c mʌc' lojon i wut te' pʌc'bil c cha'an lojon, lon che'et”. Che'ʌch mi caj a suben Semaías, che'en lac Yum.

²⁹ Jini motomaj Sofonías tsi' q'uele jun ti' tojlel jini x'alt'an Jeremías.

³⁰ Tsa' tili i t'an lac Yum ba'an Jeremías:

³¹ Chocbeñob majlel ili t'an jini cʌchʌlo' bʌ ti ñajtʌl. Subeñob: “Lac Yum woli' yʌl: Jini Semaías ch'oyol bʌ ti Nehelam tsi' subu i bʌ ti x'alt'an. Mach chocbilic tilel c cha'an. Tsi' xiq'uiyetla ti lot cha'an mi la' ñop chuqui mach isujmic.

³² Jini cha'an lac Yum woli' yʌl: Awilan mi caj cʌq'uen i toj i mul Semaías ch'oyol bʌ ti Nehelam yic'ot i p'olbal. Ma'anic mi caj i q'uel che' mij coltan c cha'año' bʌ, che'en lac Yum. Ma'anic mi caj i yajñel mi juntiquilic i p'olbal ti' tojlel c cha'año' bʌ cha'an ti' caj tsi' contrajiyon. Che'ʌch tsi' cʌntesa c winicob. Jini cha'an mux caj i toj”. Che' yom ma' subeñob, che'en lac Yum.