Jeremias 28 - Chol: I T’an Dios

I payxo t'an Hananías

¹ Ti jini jach bʌ jab che' chʌmp'ejlix jab yic'ot jo'p'ejl uw i yumʌntel Sedequías, rey bʌ ti Judá, tsa' tili ba' añon jini x'alt'an Hananías (i yalobil Azur) chumul bʌ ti Gabaón. Tsi' pejcayon ti' yotot lac Yum ti' tojlel jini motomajob yic'ot ti' tojlel pejtel winicob.

² Tsi' yʌlʌ: I Yum Panchan yic'ot Pañimil, i Dios Israel woli' yʌl: “Tsa'ix c jisʌbe i p'ʌtʌlel jini rey ti Babilonia. C'ʌscujemix jini te'el. Ts'ojquemix i tajbal.

³ Che' maxto ñumenic cha'p'ejl jab mi caj c cha' sutq'uin ti ili otot pejtel jini latu tac tsa' bʌ i cuchuyob majlel ti Babilonia.

⁴ Mi caj c cha' pʌy tilel Jeconías (i yalobil Joacim) rey bʌ ti Judá yic'ot pejtel jini cʌchbilo' bʌ tsa' bʌ pʌjyiyob majlel ti Babilonia. Mi caj c jisʌben i p'ʌtʌlel jini rey ti Babilonia cha'an mi' yʌc'ob ti colel”. Che' tsi' yʌlʌ lac Yum, che'en Hananías.

⁵ Jini cha'an jini x'alt'an Jeremías tsi' pejca Hananías ti' tojlel jini motomajob yic'ot ti' tojlel pejtel winicob wa'alo' bʌ ti' yotot lac Yum.

⁶ Jini x'alt'an Jeremías tsi' yʌlʌ: Uts'atax muq'uic i mel che' bajche' wola' wʌl. La' i mel lac Yum. La' i sut'quin jini latu tac yic'ot pejtel jini cʌchʌlo' bʌ año' bʌ ti Babilonia.

⁷ Pero mach che'ic mi caj i mel. Jini cha'an mij c'ajtibeñet ti wocol t'an, ña'tan isujm jini c t'an woli bʌ c subeñet ti' tojlel pejtel ili winicob.

⁸ Jini x'alt'añob tsa' bʌ i cha'leyob subt'an ti oñiyi c'ʌlʌl wʌle tsi' wʌn subuyob jini ñuc tac bʌ wocol tsa' bʌ tili i jisan cabʌl tejclum tac.

⁹ Jini x'alt'an mu' bʌ i sub chuqui tac jach tijicña cha'an ñʌch'ʌl mi la cajñel, mach cʌmbilic mi isujm i t'an jinto mi' ts'ʌctiyel. Che' bajche' jini mi caj i cʌjñel mi mero x'alt'añʌch chocbil bʌ tilel ti Dios, che'en Jeremías.

¹⁰ Jini cha'an jini x'alt'an Hananías tsi' loc'sʌbe i yugo Jeremías ya' ba' cʌchʌl te'el ti' bic'. Tsi' choco jubel. Tsa' c'ʌscuyi.

¹¹ Hananías tsi' yʌlʌ ti' tojlel pejtel winicob: Woli' yʌl lac Yum: “Che'ʌch mi caj c jisʌben i p'ʌtʌlel Nabucodonosor rey bʌ ti Babilonia che' maxto ts'ʌctiyemic cha'p'ejl jab. Mi caj i colelob pejtel tejclum”, che'en. Pero Jeremías tsa' jach majli ti' yotot.

¹² Ñumenix semana che' bʌ tsi' jeme jini te' Hananías, tsa' tili i t'an lac Yum ba'an Jeremías. Tsi' sube:

¹³ Cucu suben Hananías: “Lac Yum woli' yʌl: Tsa'ix a c'ʌsʌ jini barate' pero mi caj c mel bara ti tsucul ta q'uin,

¹⁴ che'en i Yum Panchan yic'ot Pañimil, i Dios Israel. Tsa'ix j c'ʌcchoco jini bara ti' bic' pejtel winicob x'ixicob. Mi caj i yochelob ti to'ol e'tel ti tojlel Nabucodonosor, rey ti Babilonia. Mi caj i wersa yumañob. I cha'anix ja'el jini bʌte'el. Tsa'ix c laj aq'ue”, che'en lac Yum.

¹⁵ Jini x'alt'an Jeremías tsi' chʌn pejca jini x'alt'an Hananías: Ubin Hananías. Mach chocbiletic tilel cha'an lac Yum. Wola' subeñob lot ili winicob.

¹⁶ Jini cha'an lac Yum woli' yʌl: “Awila to, mi caj c jisañet. Ti jini jach bʌ jab mi caj a chʌmel come tsa' cʌntesa c winicob cha'an mi' cʌyoñob”. Che' woli' yʌl lac Yum, che'en Jeremías.

¹⁷ Ti jini jach bʌ jab che' ti' wucp'ejlel uw tsa' chʌmi jini x'alt'an Hananías.