Jeremias 25 - Chol: I T’an Dios

70 jab wocol ti Babilonia

¹ Jiñʌch i t'an lac Yum tsa' bʌ tili ba'an Jeremías. Che' chʌmp'ejlix jab woli ti rey Joacim (i yalobil Josías), Nabucodonosor rey bʌ ti Babilonia tsi' teche i ye'tel.

² Jeremías tsi' cha' subeyob pejtel año' bʌ ti Judá yic'ot pejtel chumulo' bʌ ti Jerusalén:

³ Uxp'ejl i cha'c'al jab (23) woli' tilel i t'an Dios ba' añon. Tsa' caji che' i yuxlujump'ejlix (13) jab i yumʌntel Josías (i yalobil Amón) rey bʌ ti Judá. C'ʌlʌl wʌle wolic lu' subenetla ti' xuc'tʌlel c pusic'al, pero ma'anic tsa' la' ñich'ta.

⁴ C'ʌlʌl ti oñiyi lac Yum woli' chocbeñetla tilel pejtel jini x'alt'añob i cha'an, pero woli la' mʌc la' chiquin cha'an mach la' womic la' jac'.

⁵ Tsi' yʌlʌyob: “Sutq'uin la' bʌ ya' ba' samiyetla. Cʌyʌx la' mel jontolil cha'an mi la' chʌn chumtʌl wʌ' ti' lumal la' tatob, ili lum tsa' bʌ aq'uentiyetla ti lac Yum ba' yom mi la' wajñel ti pejtelel ora.

⁶ Mach yomic mi la' ñop jini dios tac. Mach la' ch'ujutesan. Mach yomic mi la' wʌc' ti mich'ajel lac Yum, ame muq'uic i chocbeñetla tilel ñuc bʌ wocol”, che'ob.

⁷ Pero, ma'anic tsa' la' ñich'tayon, che'en lac Yum. Tsa' la' wʌc'ʌyon ti mich'ajel ti' caj i melbal la' c'ʌb, cha'an wersa la' wom jini wocol.

⁸ Jini cha'an mi caj c chocbeñetla tilel wocol cha'an ma'anic tsa' la' jac'beyon c t'an, che'en i Yum Panchan yic'ot Pañimil.

⁹ Mi caj c pʌy tilel pejtel jini winicob chumulo' bʌ ti norte ti mojt ti mojt yic'ot c winic Nabucodonosor, rey bʌ ti Babilonia. Talob i contrajin ili lum yic'ot jini tejclumob yic'ot jini xchumtʌlob yic'ot yan tac bʌ lum. Mi caj c lu' jisañob. Mi caj cʌc'ob ti ts'a'lentel. Mi caj cʌc'ob ti wajlentel. Mi caj cʌc'ob ti quisin ti pejtelel ora.

¹⁰ Che' jini majlemobix jini yujilo' bʌ alas. Ma'anix mi caj i yubintel tijicña bʌ t'an mi i t'anic xñujpuñijelob mi i t'anic juch'bal. Mi caj c yʌpben i c'ajc.

¹¹ Pujch'emix mi' majlel ili lum. Jini cʌchbilo' bʌ loq'uel ti' lumal mi caj i yumañob Nabucodonosor rey ti Babilonia. Lujump'ejl i chʌnc'al jab (70) mi caj i jac'ob.

¹² Che' ts'ʌcʌlix ili lujump'ejl i chʌnc'al (70) jab, mi caj cʌq'uen i toj i mul jini rey ti Babilonia yic'ot i lum caldeojob yic'ot jini ya' bʌ chumulob. Come cabʌl i mul, che'en lac Yum. Mi caj c junyajlel jisʌben i lumal.

¹³ Mi caj c ts'ʌctesan pejtel c t'an che' bajche' tsa cʌlʌ, yic'ot pejtel chuqui tac ts'ijbubil cha'an c winic Jeremías ti ili jun. Mi caj c chocbeñob tilel pejtelel ili wocol jujunmojt winicob che' bajche' tsa cʌlʌ.

¹⁴ Come cabʌl reyob mi caj i c'ʌñob c winicob ti to'ol e'tel ti cabʌl lum tac. Mi caj c cha' sutq'uibeñob wocol cha'an i jontolil. Mi caj i tojob i mul cha'an tsi' tic'layob c winicob, che'en lac Yum.

Lac Yum mi caj i mich'len tejclum tac

¹⁵ Lac Yum tsi' subeyon: Ch'ʌmʌ ili taza woli bʌ cʌq'ueñet. But'ulix tic mich'ajel. Aq'ueñob i jap pejtel winicob ti mojt ti mojt baqui jach mic choquet majlel.

¹⁶ Che' tsa'ix i japʌyob, tʌclaw bexlaw mi' cajelob ti xʌmbal. Mi caj i toj sajtelob i pusic'al che' mic jisañob ti espada, che'en.

¹⁷ Jini cha'an tsac ch'ʌmʌ jini taza tsa' bʌ i yʌq'ueyon lac Yum. Tsa cʌq'ueyob i jap pejtel winicob ti jujump'ejl lum baqui jach tsi' chocoyon majlel lac Yum.

¹⁸ Bʌbʌq'uen jax jini wocol tsa' bʌ tili ti' tojlelob. Tsa' jili Jerusalén yic'ot i tejclum tac Judá yic'ot i reyob yic'ot ñuco' bʌ i ye'tel. C'ʌlʌl wʌle woli' ts'a'lentelob, woli' wajlentelob, woli' p'ajtʌlob.

^19-20 Tsa cʌq'ue i jap ja'el Faraón rey bʌ ti Egipto yic'ot i winicob yic'ot año' bʌ i ye'tel yic'ot pejtel jini ya' bʌ chumulob, jini ch'oyolo' bʌ ti ñajtʌl ja'el yic'ot jini reyob ti Uz, yic'ot i reyob filisteojob chumulo' bʌ ti Ascalón, ti Gaza, ti Ecrón, yic'ot ti Asdod.

²¹ Tsa cʌq'ueyob i jap ja'el Edom, yic'ot Moab, yic'ot jini ya' bʌ chumulob,

²² yic'ot jini reyob ti Tiro, yic'ot ti Sidón, yic'ot ti' ti' colem ñajb

²³ ya' ti Dedán, yic'ot ti Tema, yic'ot ti Buz, yic'ot yaño' bʌ mach bʌ i cʌñʌyobic Dios,

²⁴ yic'ot pejtel jini reyob ti Arabia, yic'ot i reyob jini chumulo' bʌ ti colem bʌ tiquiñal pañimil tsa' bʌ i xʌbʌyob i bʌ,

²⁵ yic'ot jini reyob ti Zimri, yic'ot ti Elam, yic'ot ti Media,

²⁶ yic'ot pejtel jini reyob tilemo' bʌ ti norte, jini ñajt bʌ ch'oyolob yic'ot lʌc'ʌl bʌ chumulob, yic'ot pejtel yumʌlob ti pejtelel pañimil. Ti wi'il mi caj i jap ja'el jini rey ti Babilonia.

²⁷ Mi caj a subeñob: “Japʌla jinto mi la' yʌc'an, jinto mi la' xejtan. Mi caj la' yajlel. Ma'anix mi caj la' chʌn ch'ojyel come mi caj la' jilel ti espada. Che' woli' yʌl i Yum Panchan yic'ot Pañimil, i Dios Israel”. Che' yom ma' subeñob.

²⁸ Mi mach yomobic i ch'ʌmob jini taza am bʌ ti a c'ʌb mu' bʌ a wʌq'ueñob, subeñob: “Wersa mi caj la' jap. Mach mejliquetla ti puts'el, che'en i Yum Panchan yic'ot Pañimil.

²⁹ ¿Mu' ba caj la' colel mi la' wʌl, che' wolix cʌc' ti ñuc bʌ wocol jini c winicob x'ixicob? Ma'anic. Mach loq'uiquetla. Mux caj la' toj la' mul, come wolic pʌy tilel winicob chumulo' bʌ ti pejtelel pañimil mu' bʌ caj i tsʌnsañetla ti espada, che'en i Yum Panchan yic'ot Pañimil”.

³⁰ Jini cha'an mi caj a cha'len subt'an cha'an ma' tsictesʌbeñob ili wocol mu' bʌ caj i jisañob che' bajche' wolic subeñet. Subeñob: “Lac Yum mi' cajel ti c'am bʌ t'an che' bajche' bajlum. Ya' ba' chumul ti chan ti ch'ujul bʌ i chumlib mi caj i yʌc' i t'an ti' contra Judá. Mi' caj ti oñel che' bajche' winicob mu' bʌ i pets'ob loq'uel i ya'lel ts'usub. C'am i t'an ti' contra pejtel chumulo' bʌ ti pañimil.

³¹ Ti ñajt bʌ pañimil mi caj i yubintel i t'an guerra. Come añob i mul pejtel tejclum tac ti pañimil. Lac Yum woli' pʌyob ti meloñel. Mi caj i yʌc'ob ti tsʌnsʌntel jini xjontolilob.

³² I Yum Panchan yic'ot Pañimil woli' yʌl: Awilan wolix ti pam ñumel wocol ti jujump'ejl tejclum. Tal p'ʌtʌl bʌ ic' ch'oyol bʌ ti junwejl pañimil.

³³ Jini tsʌnsʌbilo' bʌ cha'an lac Yum mi caj i yajlelob ti petol pañimil. Ma'anic majqui mi caj i yuc'tañob. Ma'anic mi caj i much'quiñob cha'an mi' mucob. Ya' jach ti pam lum mi caj i yoc'mʌl che' bajche' ta'”. Che'ʌch yom ma' subeñob, che'en lac Yum.

³⁴ Cha'lenla uq'uel, xcʌnta tiñʌme'ob. Ñolq'uin la' bʌ ti' tʌñil c'ajc, yumʌlob ñuc bʌ la' we'tel, come i yorajlelix mi la' tsʌnsʌntel. Mi caj la' chojquel jubel. C'unix mi caj la' sujtel che' bajche' x'ixicob.

³⁵ Ma'anic i puts'ib jini yumʌlob ba' mi mejlel i coltañob i bʌ. Ma'anic ba' mi caj i colelob i yumob alʌc'ʌl.

³⁶ Ubinla i t'an jini xcʌnta tiñʌme'ob. Woliyobix ti uq'uel yic'ot jini yumʌlob. Come lac Yum woli' jisʌbeñob i lum.

³⁷ Ya' ba' ñʌch'ʌlob winicob x'ixicob mi' cajelob ti tsʌnsʌntel cha'an mich' lac Yum.

³⁸ Tsa'ix loq'ui i sʌclan i buc'bal che' bajche' bajlum. Jocholix i lumal Judá. Cha'an mich' lac Yum tsa' jisʌntiyob ti espada jini ya' bʌ chumulob.