Jeremias 23 - Chol: I T’an Dios

Mi caj i cha' tilel i colojbal

¹ Obol i bʌ jini xcʌnta tiñʌme' mu' bʌ i yʌc' ti pam pujquel c tiñʌme'. Mi caj i tojob i mul cha'an tsi' yʌc'ʌyob ti jisʌntel c cha'año' bʌ, che'en lac Yum.

² Jini cha'an lac Yum, i Dios Israel, woli' yʌl: Jatetla am bʌ la' we'tel, an la' mul, come an ti la' wenta cha'an mi la' we'san c winicob x'ixicob, pero tsa' la' wʌc'ʌyob ti pam pujquel. Tsa' la' wets'eyob majlel. Ma'anic tsa' la' wen q'ueleyob. La' wilan joñon mi caj c sutq'uibeñet wocol cha'an a jontolil.

³ Joñon mi caj c cha' tempan tilel i colojbal c tiñʌme' baqui jach añob. Tsac wets'eyob majlel ti cabʌl lum tac, pero mi caj c cha' pʌyob tilel ti' yajñib. Mi' cajelob ti colel. Mi' cajelob ti p'ojlel.

⁴ Mi caj cʌq'ueñob xcʌnta tiñʌme' mu' bʌ caj i wen cʌntañob. Ma'anix mi' cajelob ti chʌn bʌq'uen. Ma'anix mi' cajelob ti quisin. Ma'anic sajtem bʌ. Ts'ʌcʌl añob.

⁵ Tal jini q'uin tac, che'en lac Yum, che' mi caj c techben i p'olbal c winic David. I wentajʌch junts'ijt i c'ʌb te' mu' bʌ caj i yochel ti rey. Wen toj i pusic'al ili rey. Cabʌl i ña'tʌbal. Mi caj i mel chuqui uts'at. Toj mi caj i cha'len meloñel ti jini lum.

⁶ Che' woli ti yumʌntel, mi caj i coltʌntel Judá. Mi' caj ti wen chumtʌl Israel. Mi caj i pejcʌntel ili rey ti lac Yum, jini Toj Bʌ mu' bʌ i yʌq'ueñonla lac tojel.

⁷ Ti jim bʌ q'uin ma'anix mi caj i yʌlob: “Cuxul lac Yum tsa' bʌ i pʌyʌ loq'uel Israel ti Egipto”, mach che'icob.

⁸ Mi caj i yʌlob: “Cuxul lac Yum tsa' bʌ i cha' pʌyʌ loq'uel Israel ti pejtelel lum baqui wets'bilob majlel cha'an mi' pʌyob tilel ti' lumal”. Che' mi caj i yʌlob, che'en lac Yum.

Payxo x'alt'an

⁹ Ch'ijiyem c pusic'al cha'an tal bʌbʌq'uen bʌ cha'an mi' jisan jini payxo x'alt'añob yujilo' bʌ lotiya. Tʌclaw bexlaw mic cha'len xʌmbal che' bajche' xyʌc'ajel cha'an chuqui tsi' pʌsbeyon Dios ti ch'ujul bʌ i t'an.

¹⁰ Come but'ul ili lum ti xmulilob mu' bʌ i cʌyob i pi'ʌlob cha'an i ts'i'lel. Jini cha'an ch'ijiyem ili lum. Tiquinix i buc'ujib alʌc'ʌl. Mi' yesmañob jontolil. Mach tojic bajche' mi' cha'leñob ganar.

¹¹ Bibi'ob tic wut jini x'alt'añob yic'ot jini motomajob. Bibi'ix c Templo cha'an i jontolil, che'en lac Yum.

¹² Ac'ʌlelix ba' woliyob ti xʌmbal. Bojyatax jini bij ba' woli' wejts'elob majlel. Jini cha'an mi caj i yajlelob ti jump'ej jab. Come joñon mi caj c chocbeñob tilel wocol. Ts'ʌcʌl mi' caj i tojob i mul, che'en lac Yum.

¹³ Cujil cabʌl jax i jontolil jini x'alt'añob ti Samaria, come tsi' cha'leyob subt'an ti' c'aba' Baal cha'an mi' socbeñob i bijlel c winicob.

¹⁴ Pero ñumen cabʌl i jontolil jini x'alt'añob ti Jerusalén. Mi' cha'leñob ts'i'lel. Mi' mulañob lot. Mi' xic'ob ti mulil jini xmulilob cha'an mach mi' cʌyob i jontolil. Tsa' laj sujtiyob tic wut che' bajche' Sodoma yic'ot Gomorra. Jini cha'an ts'a' mij q'uelob.

¹⁵ Jini cha'an, q'uele chuqui mi caj c tumbeñob jini x'alt'añob. Mi caj cʌq'ueñob i jap ch'aj bʌ ja' am bʌ i venenojlel, che'en i Yum Panchan yic'ot Pañimil, come ti' caj i mul jini x'alt'añob ti Jerusalén but'ul ili lum ti jontolil.

¹⁶ I Yum Panchan yic'ot Pañimil woli' yʌl: Mach la' ñich'tʌbeñob i t'an jini x'alt'añob che' mi' subeñetla chuqui tac tal. Mi' lon ñʌch'tesʌbeñet la' pusic'al ti lot. Tilem i t'an ti' bajñel pusic'al, mach tilemic ti lac Yum.

¹⁷ Mi' chʌn pejcañob ti uts bʌ t'an jini tsʌtso' bʌ i pusic'al, mu' bʌ i ts'a'leñob i t'an lac Yum: “Ñʌch'ʌl mi caj la' wajñel. Mach talic wocol ti la' tojlel”, lon che'ob.

¹⁸ ¿Am ba juntiquil tsa' bʌ poj wa'le tic tojlel cha'an mi' yubin c t'an, cha'an mi' ch'ʌmben isujm? ¿Majqui tsi' ñich'ta c t'an? ¿Majqui tsi' jac'ʌ? Ma'anic mi juntiquilic, che'en lac Yum.

¹⁹ Q'uele jini p'ʌtʌl bʌ ic' chocbil bʌ tilel i cha'an lac Yum. Cabʌlix i mich'ajel. Mi caj i bʌc' tilel i jats' jini xjontolilob che' bajche' sutujt ic'.

²⁰ Mach lajmix i mich'ajel lac Yum jinto mi' yujtel ti meloñel che' bajche' tsi' wʌn ña'ta ti' pusic'al. Ti cojix bʌ q'uin tac mi caj la' ch'ʌmben isujm.

²¹ Jini x'alt'añob tsa' majliyob ti ajñel cha'an mi' cha'leñob subt'an, pero mach chocbilobic majlel c cha'an, che'en lac Yum. Ma'anic tsac pejcayob, pero tsi' cha'leyob t'an tij c'aba'.

²² Tsa'ic i tem ñich'tʌbeyob c t'an yic'ot c winicob, tsa' mejli i cʌntesan c tejclum tic t'an cha'an mi' cʌyob i mul, cha'an mi' tsajcañoñob.

²³ Um ba' añon ti lʌc'ʌl, che'en lac Yum. ¿Mach ba ya'ic añon ja'el ti ñajtʌl?

²⁴ ¿Mach ba lu' q'uelelic c cha'an ti pejtelel pañimil? Ma'anic majqui mi mejlel i muc i bʌ ba' ma'anic mij q'uel, che'en lac Yum. Ma'anic ba' jochol panchan mi pañimil. Laj c chumlibʌch, che'en lac Yum.

²⁵ Tsa cubibeyob i lot jini x'alt'añob mu' bʌ i lon jop'ob t'an tij c'aba'. Mi' yʌlob: “Tsac ñajle jini, tsac ñajle yambʌ”, lon che'ob.

²⁶ ¿Jala to ba mi caj i chʌn techob lot ti' bajñel pusic'al jini x'alt'añob? Lot jach chuqui mi' subob. Ñuc mi' q'uelob i bʌ. Mi' subob bajche' mi' bajñel ña'tañob ti' pusic'al.

²⁷ Mi' subob chuqui tsi' ñajleyob cha'an mi' yʌc'oñob ti ñajʌyel ti' pusic'al c winicob x'ixicob. Lajal mi' melob che' bajche' i tatob tsa' bʌ i cʌyʌyoñob cha'an mi' tsajcañob Baal.

²⁸ Jini x'alt'an mu' bʌ i cha'len ñajal, la' i sub chuqui tsi' ñajle. ¿Chuqui i ye'tel ñajal? Pero jini yujil bʌ c t'an la' i sub c t'an ti' xuc'tʌlel i pusic'al. Come cabʌlʌch i c'ʌjñibal. Mach mejlic i lajintel jini mero ixim yic'ot tiquinix bʌ jam, che'en lac Yum.

²⁹ Jini c t'an, ¿mach ba lajalic bajche' c'ajc? che'en lac Yum. ¿Mach ba lajalic bajche' martillo mu' bʌ i bic'ti top' jini xajlel?

³⁰ Ts'a' mij q'uel jini x'alt'añob mu' bʌ i bajñel subob i bʌ ti x'alt'an. Mi' xujch'iñob c t'an tsa'ix bʌ i yubiyob ti' tojlel c winicob.

³¹ Ts'a' mij q'uel jini x'alt'añob mu' bʌ i yʌlob chuqui tilem jach ti' bajñel pusic'al. Mi' yʌlob: “Che' tsi' yʌlʌ lac Yum”, che'ob, pero i lot jach.

³² Awilan ts'a' mij q'uel jini x'alt'an mu' bʌ i bajñel al: “Jiñʌch i t'an Dios”, che'en, pero i lot. Mi' yʌc' ti sajtel c winicob x'ixicob cha'an leco i cʌntesʌbal. Mi' chañ'esan i bʌ. Ma'anic tsac choco majlel ti subt'an. Ma'anic mi' wis coltan c winicob x'ixicob, che'en lac Yum.

³³ Che' an majqui mi' tilel, mi x'alt'an o mi motomaj o yambʌ, che' mi' c'ajtibeñet: “¿Chuqui jini ch'ijiyem bʌ t'an woli bʌ i cuch lac Yum wʌle?” mi che'en, yom ma' suben: “¿Ch'ijiyem ba i t'an? Mach ch'ijiyemic i t'an, pero an cu i cuch. Jatetla i cuchetla pero mi caj i choquetla jubel”. Che'ʌch yom ma' suben, che'en lac Yum.

³⁴ Mi caj cʌq'uen i toj i mul jini winic mu' bʌ i lon suben i pi'ʌlob: “Ubinla c t'an, jiñʌch i cuch lac Yum”. Majqui jach mi' sub, mi motomaj o mi yambʌ, mi caj i toj yic'ot pejtel año' bʌ ti' yotot.

³⁵ Yom mi la' c'ajtiben la' pi'ʌlob: “¿Bajche' tsi' jac'ʌ lac Yum? ¿Chuqui tsi' yʌlʌ?” Che'ʌch yom mi la' wʌl.

³⁶ Pero mach yomix mi la' chʌn sub: “Ubinla c t'an, jiñʌch i cuch lac Yum”. Come ti jujuntiquilob mi caj i bajñel cuchob i t'an chuqui tac jach mi' subob. Come an la' mul cha'an woli la' socben i t'an jini cuxul bʌ Dios, i Yum Panchan yic'ot Pañimil, jiñʌch lac Dios.

³⁷ Uts'at mi la' c'ajtiben jini x'alt'an Jeremías: “¿Chuqui i t'an lac Yum wʌle? ¿Chuqui tsi' subeyet?” Che'ʌch yom mi la' wʌl.

³⁸ Pero mi tsa' la' c'ajtibe: “¿Chuqui jini ch'ijiyem bʌ t'an woli bʌ i cuch lac Yum wʌle?” mi che'ʌch mi la' chʌn cha'len wajal, mux caj la' toj, come tsa'ix c tiq'uiyetla ame a chʌn sub: “Jiñʌch ch'ijiyem bʌ t'an tilem bʌ ti Dios”.

³⁹ Ma'anix mi caj c chʌn cuchetla. Mi caj c choquetla jubel. Mi caj c jisañetla tic tojlel yic'ot ili tejclum tsa' bʌ cʌq'ue la' tatob.

⁴⁰ Mi caj cʌq'uetla ti a'lentel ti pejtelel ora. Mux caj la' wubin quisin ti pejtelel ora.