Jeremias 21 - Chol: I T’an Dios

Mi caj i jisʌntel Jerusalén

¹ Tsa' tili i t'an lac Yum ba'an Jeremías. Jini rey Sedequías tsi' choco tilel Pasur, i yalobil Malquías yic'ot Sofonías i yalobil Maasías cha'an mi' subeñon:

² A wocolic c'ajtiben lac Yum cha'an mi' coltañonla, come wolix i contrajiñonla Nabucodonosor jini rey ti Babilonia. Tic'ʌl mi mux caj i pʌsbeñonla ñuc bʌ i melbal lac Yum che' bajche' ti oñiyi cha'an mi' wersa sujtel laj contrajob ya' ti' lumal, che'ob.

³ Pero Jeremías tsi' subeyob:

⁴ Yom mi la' suben Sedequías: “Woli' yʌl lac Yum, i Dios Israel: Awilan, mi caj c mʌctan ti guerra jini e'tijibʌl la' cha'an am bʌ ti la' c'ʌb ame mi' taj jini rey am bʌ ti Babilonia yic'ot i winicob woli bʌ i joyetla wʌ' ti pat ili ts'ajc. Joñon tic bajñel p'ʌtʌlel mi caj c pʌyob ochel ti ili tejclum.

⁵ Tic bajñel p'ʌtʌlel mi caj j contrajiñetla. Mi caj c jats'etla ti cabʌl c mich'ajel cha'an wen mich'on.

⁶ Mi caj c choc tilel bʌbʌq'uen bʌ c'amʌjel ti ili tejclum cha'an mi' chʌmelob winicob x'ixicob yic'ot i yʌlac'.

⁷ I colojbal winicob x'ixicob mach bʌ anic tsa' chʌmiyob wʌ' ti tejclum mi caj c tem ac'ob ti' c'ʌb Nabucodonosor jini rey ti Babilonia yic'ot Sedequías rey bʌ ti Judá yic'ot i winicob. Mi caj i chʌmelob ti' c'ʌb i contrajob mach bʌ yujilobic p'untaya. Che' woli' yʌl lac Yum”. Che'ʌch yom mi la' suben.

⁸ Subeñob ili tejclumob ja'el: “Lac Yum woli yʌl: La' wilan, tsa'ix cʌc'ʌyetla wʌ' ba' mi' rusiñob i bʌ i bijlel la' cuxtʌlel yic'ot i bijlel la' chʌmel.

⁹ Jini mu' bʌ i cʌytʌl ti tejclum mi' caj ti chʌmel ti espada yic'ot ti wi'ñal yic'ot ti c'amʌjel. Pero jini mu' bʌ i loq'uel ti tejclum cha'an mi' yʌc' i bʌ ti' wenta la' contrajob cuxul mi caj i yajñel ti' wenta caldeojob. Mi caj i yʌq'uentel i cuxtʌlel ti' majtan jach cha'an mi caj i p'untʌntel ti' yum.

¹⁰ Come joñon wolij contrajin ili tejclum. Mach uts'atic mij q'uel. Mi caj cʌc' ti wocol. Mi caj cʌc' ti' c'ʌb jini rey ti Babilonia. Jini mi caj i jisan ti c'ajc, che'en lac Yum”. Che' yom mi la' subeñob.

T'an ti' contra reyob ti Judá

¹¹ Subenla jini rey ti Judá yic'ot i pi'ʌlob: “Lac Yum woli' yʌl:

¹² I p'olbalet David, ubin i t'an lac Yum: Cha'len meloñel ti toj. Se'ñun mecu. Coltan loq'uel ti' wenta xujch' jini tsa' bʌ chilbenti i chubʌ'an, ame tilic wocol i tajet che' bajche' c'ajc mach bʌ yujilic yajpel, come mich'on cha'an jontol a melbal.

¹³ Awilan wolij contrajiñet anquese yumʌlet ti' tojlel jini xchumtʌlob ti joctʌl. Chañet che' bajche' chan bʌ xajlel ti' wutob. Ma' lon al ma'anic majch mi' mejlel ti ochel cha'an mi' contrajiñet. Mach mejlic i chilbeñoñob c chubʌ'an, lon che'et.

¹⁴ Joñon mi caj cʌq'ueñet a toj pejtel a melbal. Mi caj c tsuc' c'ajc ti mate'el mu' bʌ caj i pul jini xchumtʌl tac ti a joytʌlel. Che' woli' yʌl lac Yum”. Che'ʌch yom mi la' suben rey, che'en Jeremías.