Jeremias 20 - Chol: I T’an Dios

Pasur mi caj i toj i mul

¹ Jini motomaj Pasur i yalobil Imer, ñuc bʌ i ye'tel ti' yotot lac Yum, tsi' yubibe i t'an Jeremías.

² Jini cha'an mich' Pasur. Tsi' bajbe ti te' jini x'alt'an Jeremías. Tsi' net'be i yoc ti te' ya' ti' ti' i yotot lac Yum, jiñʌch i ti' am bʌ ti norte, i c'aba' Benjamín.

³ Jump'ejl q'uin yic'ot jump'ejl ac'ʌlel ya' chucul. Ti' yijc'ʌlal Pasur tsi' colo. Jeremías tsi' sube: Lac Yum ma'anix mi caj i chʌn pejcañet ti Pasur. Tsa'ix i yotsʌbeyet yambʌ a c'aba', jiñʌch Magor Misabib, come tal wocol i joy ñet'et.

⁴ Come lac Yum woli' yʌl: “Joñon mi caj c chocbeñet tilel bʌbʌq'uen tac bʌ mu' bʌ caj i jisañet yic'ot pejtel a cʌñʌyo' bʌ. Mi caj a q'uelob che' mi' chʌmelob ti espada ti' c'ʌbob a contrajob. Mi caj cʌc' ti' wenta a contrajob pejtel jini chumulo' bʌ ti Judá. Jini ch'oyolo' bʌ ti Babilonia mi caj i cʌchob majlel ti' lumal. Mi caj i tsʌnsañob ti espada.

⁵ Joñon mi caj cʌq'uen a contrajob pejtel i bʌl jini tejclum letsem tac bʌ i tojol, pejtel chuqui tac c'uxbibil la' cha'an tsa' bʌ i tempayob jini reyob ti Judá. Mi caj i lu' cuchob majlel ti Babilonia.

⁶ Jatet Pasur, yic'ot pejtel a pi'ʌlob ti a wotot mi caj la' cʌjchel majlel ti Babilonia ba' mi caj la' cha'len to'ol e'tel. Ya' mi caj la' chʌmel la' wic'ot jini tsa' bʌ i ñopoyob a lot cha'an tsa' subeyob mach talic wocol”. Che' woli' yʌl lac Yum, che'en Jeremías.

I yuq'uel Jeremías

⁷ Jatet tsa' pʌyʌyon c Yum. Tsac jac'ʌyet. Ñuquet, mach ñuconic. Tsa' mʌjli a cha'an. Tsa' sujtiyon ti tonto ti' wutob c pi'ʌlob. Mi' tse'tañoñob ti sʌc'an c'ʌlʌl mi' ñumel q'uin. Mi' wajleñoñob.

⁸ Come belel ora che' mic pejcañob, wersa mic subeñob ti c'am bʌ t'an: Tal guerra. Muc'ʌch i jisañonla, cho'on. Che' jini cabʌl mi' p'ojlel c wocol ti' tojlelob cha'an ts'a' mi' yubiñob a t'an c Yum.

⁹ Tsac lon ña'ta ma'anix mi caj c chʌn c'ajtesan Dios. Ma'anix mi caj c chʌn pejcan winicob ti' c'aba', lon cho'on, pero ya' jach tic pusic'al tsa' caji cubin i t'an che' bajche' c'ajc woli bʌ ti lejmel. Che' jini ma'anic tsa' mejliyon ti ñʌjch'el. Wersa tsac subu ti jamʌl.

¹⁰ Woliyon ti bʌq'uen. Ti mojt ti mojt mi' mucul temob i t'an tij contra. Mux caj i toj, che'ob. Jini j cʌñʌyo' bʌ ja'el yomob i tic'on ti t'an ame i yʌcoñob tic t'an jini j contrajob, come woli' yʌlob: Tic'ʌl mi mux caj i cha'len bʌq'uen, che'ob. Che' jini mi caj i mʌjlel lac cha'an, che'ob.

¹¹ Pero wʌ'an c Yum quic'ot. Wen yujil guerra. Mi' bʌc'tesan j contrajob. Jini cha'an mi' cajelob ti yajlel. Mach mʌjlic i cha'añob. Mi caj i yubiñob quisin come mach uts'atic bajche' woli' melob. Ma'anic mi caj i ñusʌbentel i mul ti pejtelel ora.

¹² Jatet i Yumet Panchan yic'ot Pañimil, ma' lu' cʌmbeñob i pusic'al jini tojo' bʌ. A wujil bajche' mi' ña'tañob ti' pusic'al pejtel winicob. Meleyob c Yum. La' i tojob i mul. Come Xmeloñelet c cha'an. Añon ti a wenta.

¹³ C'ʌyinla lac Yum. Subula i ñuclel. Come mi' coltan jini woli bʌ i tic'lʌntelob cha'an mi' loq'uelob ti' c'ʌb xjontolilob.

¹⁴ La' p'ajlec jini q'uin che' bʌ tsaj q'uele pañimil. Lolom jach tsi' cʌntayon c ña'.

¹⁵ La' p'ajlec jini winic tsa' bʌ i lon ñuq'uesʌbe i pusic'al c tat che' bʌ tsa' tili i suben: Anix ch'iton bʌ a walobil, che'en.

¹⁶ Lac Yum tsi' junyajlel jisa Sodoma yic'ot Gomorra. Ma'anic tsi' p'untayob. La' sujtic ili winicob che' bajche'ob. La' i yubiñob c'am bʌ uq'uel che' ti sʌc'ajel. La' i yubibeñob i t'an xguerrajob che' ti xinq'uiñil.

¹⁷ Come ma'anic tsa' tsʌnsʌntiyon che' cʌntʌbilon to. Uts'at tsa'ic chʌmiyon che' cʌntʌbilon to cha'an ma'anic mij q'uel pañimil. Uts'at tsa'ic cʌleyon quic'ot c ña' che' bajche' ti mucoñibʌl.

¹⁸ ¿Chucoch tsac lon q'uele pañimil? Jini jach wocol yic'ot ch'ijiyem bʌ c pusic'al woli cubin yic'ot quisin.