Jeremias 19 - Chol: I T’an Dios

Tojp'em uc'um

¹ Lac Yum tsi' yʌlʌ: Cucu, mʌñʌ uc'um. Pʌyʌ majlel xñoxob yic'ot motomajob.

² Loq'uen ti tejclum. Yom majliquet ti joctʌl Ben Hinom lʌc'ʌl ti' ti' tejclum am bʌ ti' pasibal q'uin. Ya' yom ma' sub pejtelel ili t'an woli bʌ c subeñet.

³ Subeñob: “Ubinla i t'an lac Yum, pejtel reyob ti Judá yic'ot pejtel chumulo' bʌ ti Jerusalén. I Yum Panchan yic'ot Pañimil, i Dios Israel, woli' yʌl: P'isi ti la' wenta chuqui wolic mel cha'an la' mul. Wolic chocbeñetla tilel wocol. Ch'inlaw i chiquin mu' bʌ caj i yubiñob.

⁴ Tsa' la' cʌyʌyon. Tsa' la' bib'esa ti mulil ili lum. Woli la' pulbeñob pom yambʌ dios tac mach bʌ la' cʌñʌyic, mi jatetla mi la' tatob mi la' reyob. Baqui jach mi la' ñumel ti ili lum an i ña'tʌntel la' mul cha'an tsa' la' tsʌnsa jini mach bʌ añobic i mul.

⁵ Tsa' la' wa'chocobe i pulʌntib i majtan Baal ba' mi la' pul ti c'ajc la' walobilob. Mach c mandaric. Ma'anic tsac wis ña'ta j c'ajtibeñet.

⁶ Jini cha'an tal jini q'uin che' mi caj la' tsʌnsʌntel ila ti joctʌl Ben Hinom. Mi caj i yotsʌbentel i c'aba' ili joctʌl Tsʌnsa, che'en lac Yum.

⁷ Joñon mi caj j contrajin Judá yic'ot Jerusalén ti guerra. Mi caj c jisañetla ti espada ti' c'ʌb la' contrajob. Talob i tsʌnsañetla. Joñon mi caj j coltañob. Jini te'lemut yic'ot bʌte'el mi caj i c'uxetla.

⁸ Mi caj i toj sajtel i pusic'al majqui jach mi' q'uel ili tejclum che' jisʌbilix c cha'an ti ñuc bʌ wocol.

⁹ Ili wʌ' bʌ chumulob mi caj i c'uxob i yalobilob, ch'itoñob yic'ot xch'ocob, yic'ot i pi'ʌlob cha'an cabʌl jax i wocol ti' tojlel i contrajob”. Che' yom ma' subeñob, che'en lac Yum.

¹⁰ Che' ma' wujtel ti t'an, Jeremías, mi caj a top' jini uc'um che' woli' q'uelob a pi'ʌlob tsa' bʌ a pʌyʌ majlel ti joctʌl.

¹¹ Mi caj a subeñob: “I Yum Panchan yic'ot Pañimil woli' yʌl: Che' bajche' wolic junyajlel top' jini uc'um i melbal bʌ xmel p'ejt cha'an ma'anix mi' cha' mejlel, che' ja'el mi caj i junyajlel jisañetla Dios yic'ot pejtel jini chumulo' bʌ ti ili tejclum. Jini chʌmeño' bʌ mi caj i mujquelob ti Tofet, come but'ulix campo santo”. Che' yom ma' subeñob.

¹² Che'ʌch mi caj c melben Jerusalén yic'ot pejtelel wʌ' bʌ chumulob. Mi caj i sujtel ili tejclum ti' yajñib c'ajc che' bajche' Tofet.

¹³ Bibi' che' bajche' Tofet mi caj j q'uel jini otot tac ti Jerusalén yic'ot i yotot tac reyob ti Judá, come tsa' letsiyob i yum ti' jol i yotot cha'an mi' pulbeñob pom jini q'uin yic'ot uw yic'ot ec' am bʌ ti panchan. Ya' tsi' yʌq'ueyob japbil bʌ i majtan yambʌ diosob tilem bʌ ti yan tac bʌ lum, che'en lac Yum.

¹⁴ Jeremías tsa' ujti i sub ili t'an ti Tofet ya' ba' tsi' choco majlel lac Yum. Tsa' cha' sujti ti tejclum. Tsa' wa'le ti' pat i yotot lac Yum. Tsi' subeyob pejtel i pi'ʌlob:

¹⁵ I Yum Panchan yic'ot Pañimil, i Dios Israel woli' yʌl: “Wolic chocbeñetla tilel ñuc bʌ wocol pejtel chumulet bʌ la ti ili tejclum yic'ot ti xchumtʌl tac, che' bajche' tsac subeyetla, pero tsa' la' mʌyʌ la' wut come mach la' womic la' wubin c t'an”. Che' woli' yʌl lac Yum, che'en.