Jeremias 18 - Chol: I T’an Dios

Xmel p'ejt

¹ Tsa' tili i t'an lac Yum ba'an Jeremías:

² Ch'ojyen. Cucu ti' yotot jini xmel p'ejt. Ya' mi caj cʌq'ueñet a ch'ʌmben isujm, che'en.

³ Jini cha'an tsajniyon ti' yotot xmel p'ejt. Awilan woli' mel p'ejt ya' ti selel bʌ ña'atun woli bʌ ti wijlel.

⁴ Pero mach wenic tsa' loq'ui p'ejt ti' c'ʌb xmel p'ejt. Jini cha'an tsi' cha' mele ti tsijib che' bajche' yom i pusic'al.

⁵ Tsa' tili i t'an lac Yum ba' añon:

⁶ Ubinla, israelet bʌ la, ¿mach ba mejlic c mel che' bajche' jini xmel p'ejt? che'en lac Yum. Q'uelela bajche' mi' yajñel oc'ol ti' c'ʌb. Che'ʌch añetla tij c'ʌb, israelet bʌ la.

⁷ Mi mejlel c bʌc' ac' c t'an cha'an mi' sʌc jilel jump'ejl colem tejclum, cha'an mi' bojquel, cha'an mi' t'uchtʌntel che' bajche' pimel.

⁸ Mi tsi' meleyob i pusic'al jini winicob x'ixicob, mi tsi' cʌyʌyob i mul, mux c ñusʌbeñob i mul. Che' jini mach muq'uic c jisañob che' bajche' tsac ña'ta c mel.

⁹ Mi tsac bʌc' ac'ʌ c t'an cha'an mi' wa'chocontel i yumʌntel jump'ejl colem tejclum mu' bʌ caj j coltan,

¹⁰ mi jontol mi' melob tic tojlel, mi ma'anic mi' ñich'tañob c t'an, che' jini mi caj j q'uex c t'an. Ma'anic mi caj j coltanob che' bajche' tsac ña'ta c mel.

¹¹ Jini cha'an, subeñob jini chumulo' bʌ ti Judá yic'ot ti Jerusalén: “Awilan, wolic chajpʌbeñetla ñuc bʌ wocol. Mi caj j contrajiñetla. Wolic subeñetla ti wocol t'an, sutq'uin la' bʌ. Cʌyʌx la' mul. Ñopoxla chuqui uts'at. Melexla chuqui wen, che'en lac Yum”.

¹² Pero mi' yʌlob: “Lolom jach ma' pejcañon lojon. Wersa com c mel lojon bajche' wolic ña'tan lojon. Wersa com c mel lojon jontolil bajche' jach yom lojon c pusic'al”, che'ob.

¹³ Jini cha'an lac Yum woli' yʌl: Ti pejtelel pañimil ma'anic ba' mi' yujtel che' bajche' jini. Leco jax bajche' woli' mel Israel, jini yajcʌbil bʌ c cha'an.

¹⁴ Ti pejtelel ora ma'anic mi' yulmʌl i ña'al tsʌñal ya' ti' pam Líbano wits. Ti pejtelel ora ma'anic mi' tiquin ja' ya' ba' mi' pasel ti lech'el bʌ xajlel ti chan.

¹⁵ Pero ma'anic i xuc'tʌlel c tejclumob. Tsa'ix i cʌyʌyoñob. Woli' pulbeñob pom jini mach bʌ Diosic. Mach uts'atic tsi' q'ueleyob jini toj bʌ bij tsa' bʌ c pʌsbeyob c'ʌlʌl ti oñiyi. Tsi' xoyoyob i bijlel. Woliyob ti xʌmbal ti yambʌ bij tac cha'an yomob mulil.

¹⁶ Jini cha'an jochol mi caj i junyajlel cʌytʌl i lum. Mi caj i toj sajtelob i pusic'al jini xñumelob che' jochol mi' q'uelob.

¹⁷ Mi caj c puc majlel c cha'año' bʌ ti' tojlel i contrajob che' bajche' ts'ubejn mu' bʌ i wejlan ticʌw bʌ ic'. Che' woliyob ti wocol, mi caj c mʌy c wut cha'an ma'anic mij q'uelob, che'en lac Yum.

I yoración Jeremías cha'an ti' caj tem t'an

¹⁸ Tsa' caji i temob i t'an c pi'ʌlob: ¿Chuqui yom mi lac tumben Jeremías? che'ob. An lac cha'an motomajob yic'ot x'alt'añob yic'ot winicob cabʌl bʌ i ña'tʌbal. Ma'anic i ye'tel jini Jeremías. La' lac jop'ben i mul cha'an mi' cʌjchel. Mach yomic mi lac chʌn ñich'tʌben i t'an, che'ob.

¹⁹ C Yum, q'ueleyon. Ubibeñob i t'an j contrajob.

²⁰ Jini tsa' bʌ i mele chuqui uts'at, ¿yom ba mi' sutq'uibentel jontolil? Woli' chajpañob yac cha'an mi' tsʌnsañoñob. Pero ña'tañon c Yum. Tsac ñopo j coltañob che' bʌ tsac xin otsa c bʌ cha'an mic mʌctan a mich'ajel.

²¹ Jini cha'an, la' tsʌnsʌnticob ti espada. La' jilicob ti wi'ñal i yalobilob. La' sujticob ti meba' i yijñamob. La' jilic pejtel i yalobilob. La' chʌmicob jini winicob ti leco bʌ c'amʌjel. La' chʌmicob ti guerra jini ch'iton winicob.

²² La' ubintic ti ñajtʌl i yoñel che' mi' bʌc' tilelob i contrajob cha'an mi' jisañob. Come tsi' piquiyob lum cha'an mic yajlel ochel. Tsi' yʌc'ʌyob yac tic bijlel.

²³ C Yum, a wujil bajche' woli' contrajiñoñob cha'an yomob i tsʌnsañon. Mach a ñusʌbeñob i mul. Mʌctʌbeñob i bijlel. Ac'ʌyob ti toj mulil ti' yorajlel a mich'ajel.