Jeremias 17 - Chol: I T’an Dios

Ts'ijbubilix i mul Judá

¹ Ts'ijbubilix i mul Judá yic'ot pluma melbil bʌ ti fierro. Tsʌtsatax i ñi' pluma melbil bʌ ti diamante. Ts'ijbubilix i mul ti' pusic'alob yic'ot ya' ti' xulub tac pulʌntib.

² Jini ch'itoñob ti Judá mi' yesmañob mulil. Mi' c'uxbiñob i yejtal Asera ti' yʌxñʌlel te' ya' ti' chañelal wits,

³ yic'ot ti jamil ti yebal wits. Jini cha'an mi caj cʌc' ti' wenta a contrajob pejtel a chubʌ'an letsem tac bʌ i tojol ti pejtelel a lumal. Che' jini mi caj a toj a mul.

⁴ Mi caj a len cʌy a chumlib yic'ot a lum tsa' bʌ cʌq'ueyet. Mi caj cʌq'uet ti to'ol e'tel ti' wenta a contrajob ya' ti yambʌ lum ti' wenta yumʌlob mach bʌ a cʌñʌyobic. Tsa'ix a wʌc'ʌyon ti mich'ajel. Bʌc'ñʌbil c mich'ajel che' bajche' c'ajc yujil bʌ lejmel ti pejtel ora.

⁵ Lac Yum tsi' yʌlʌ: Chocbil ti Dios jini winic mu' bʌ i lon ña'tan i taj i coltʌntel ti winicob, jini mu' bʌ i cʌy i Yum.

⁶ Lajalʌch bajche' te' am bʌ ti colem bʌ i tiquiñal pañimil ba' mach mejlic ti wen colel. Ma'anic mi caj i c'oc'an, come mach i tajayic i ya'lel ya' ba' woli' colel ti colem xajlelol. Ma'anic i c'ʌjñibal jini lum.

⁷ Tijicña jini winic mu' bʌ i ña'tan i taj i coltʌntel ti lac Yum, mu' bʌ i ñop lac Yum.

⁸ Lajalʌch bajche' te' pʌc'bil bʌ ti' ti' ja', chucbil bʌ i wi' ti lum. Ma'anic mi' bʌc'ñan ticwal, come mach tiquic i yopol. Che' tal wocol, che' ma'anic ja'al, ma'anic mi' mel i pusic'al, come mi' chʌn ac' i wut.

⁹ Wen yujilob lot i pusic'al winicob. Cabʌl i sajtemal. ¿Majqui mi' lu' c'ʌn?

¹⁰ Joñon a Yumon. Mic chʌcʌ q'uel a pusic'al cha'an mic lu' cʌn. Q'uelel c cha'an bajche' wola' ña'tan yic'ot bajche' wola' mel. Che' jini mi cʌq'ueñob winicob i chobejtʌbal ti chajp ti chajp bajche' an i melbal ti jujuntiquil.

¹¹ Jini winic mu' bʌ i tempan taq'uin yic'ot chubʌ'añʌl che' mach tojic bajche' tsi' ganari, tonto mi' caj ti q'uejlel. Lajalʌch bajche' chʌcmut mu' bʌ i tempan alʌ mut mach bʌ i yalic. Che' mach yujilic, mi' bʌc' majlel. I bajñel mi caj i cʌytʌl che' ti' jilibal.

¹² Buchulet ti chan, c Yum. Wen ñuc a yumʌntel c'ʌlʌl ti' cajibal. Ch'ujul bʌ cajñibet lojon, c Yum.

¹³ Jatet i yaj pijtayajet Israel. Pejtel mu' bʌ i cʌyetob mi' cajelob ti quisin. Chucul i c'aba' ti pañimil, mach ya'ic chucul ti chan, cha'an tsi' cʌyʌyet. Jatet jach i loq'uibet jini Cuxul bʌ Ja'.

¹⁴ Lajmesañon, c Yum. Wen a wujil lajmesaya. Coltañon. Wen a wujil coltaya. Ñuquet tic tojlel.

¹⁵ C pi'ʌlob woliyob ti wajal. Mi' yʌlob: La' tilic wocol. ¿Bacan tsiquil mi tal? Mach i t'anic lac Yum woli bʌ a wʌl. Jini cha'an ma'anic mi' ts'ʌctiyel a t'an, che'ob.

¹⁶ A wujil, c Yum. Ma'anic tsaj c'ajtibeyet jini ñuc bʌ wocol. Mach comic mi' jisʌntelob a cha'año' bʌ. Jatet a wujil baqui tilem pejtel c t'an tsa' bʌ cʌlʌ.

¹⁷ Mach ma' bʌc'tesañon. C puts'ibet ti' yorajlel c tic'lʌntel.

¹⁸ Ac'ʌyob ti quisin jini woli bʌ i tic'lañoñob. Pero mach ma' wʌc'on ti quisin. La' toj sajticob i pusic'al, pero mach yomic mi' toj sajtel c pusic'al. La' i tajob jini ñuc bʌ wocol che' ti' q'uiñilel. Yom cha'yajl ma' jisañob.

Ch'ujul yom i yorajlel c'aj o

¹⁹ Lac Yum tsi' subeyon: Cucu ti wa'tʌl ti' ti' tejclum, i c'aba' Benjamín, ba' mi' loq'uelob i reyob Judá. Ti wi'il yom ma' wa'tʌl ti jujump'ejl i ti' Jerusalén. Subeñob:

²⁰ “Ubinla i t'an lac Yum, pejteletla mu bʌ la' wochel ilayi, jini reyob ti Judá yic'ot pejtel winicob x'ixicob ti Judá yic'ot jini chumulo' bʌ ti Jerusalén.

²¹ Lac Yum woli' yʌl: Majqui jach c'ux mi' yubin i cuxtʌlel, la' i p'is ti' wenta ili t'an. Mach a cha'len cuchijel ti' yorajlel c'aj o. Mach a ch'ʌm ñumel a cuch ti' ti' tac Jerusalén.

²² Mach a ch'ʌm loq'uel a cuch ti a wotot che' ti' yorajlel c'aj o. Mach a cha'len e'tel. Yom ch'ujul ti a wut ili q'uin che' bajche' tsac subeyob a tatob.

²³ Pero ma'anic tsi' yubiyob. Ma'anic tsi' jac'ʌyob. Tsi' mʌyʌyob i wut come mach yomobic i yubin c t'an. Ma'anic tsi' jac'ʌyob i cʌntesʌntel.

²⁴ Pero mach che'ic yom mi la' mel jatetla. Ubinla c t'an, che'en lac Yum. Mach mi la' ch'ʌm ochel a cuch ti' ti' tac ili tejclum che' ti' yorajlel c'aj o. Yom ch'ujul mi la' q'uel jini q'uin. Mach yomic mi la' cha'len e'tel ti ili q'uin.

²⁵ Mi uts'at mi la' jac', mach jilic i yumʌntel David ti pejtelel ora. Che' jini mux i buchtʌlob i yalobilob David ti' yumʌntel wʌ' ti Jerusalén ti pejtelel ora. C'ʌchʌlob mi caj i cha'leñob xʌmbal ti la' tojlel jini reyob yic'ot i yalobilob. Che' jini cabʌl i ñuclel. Mi caj i chumtʌlob winicob x'ixicob ti ili tejclum ti pejtelel ora.

²⁶ Che' jini mux i tilelob ti Jerusalén winicob loq'uemo' bʌ ti pejtelel tejclum tac ti Judá yic'ot ti Benjamín yic'ot ti jini joctʌl Sefela ya' ba' mi' bʌjlel q'uin yic'ot ti Neguev. Mux i ch'ʌmob tilel pom yic'ot cotol bʌ i majtan Dios cha'an mi' pulbeñob ti' yotot lac Yum. Che' jini mi caj i q'uelob ti ñuc.

²⁷ Pero mi mach la' womic la' jac'beñon, mi mach ch'ujulic i yorajlel c'aj o ti la' wut, mi mux caj la' wersa ch'ʌm ochel la' cuch ti' ti' Jerusalén che' bajche' ti yan tac bʌ q'uin ti semana, che' jini mi caj c tsuc' c'ajc ti' ti' tac tejclum. Mux i pam ñumel cha'an mi' lu' jisan jini otot tac yic'ot ja'el i yotot tac reyob. Mach yajpic jini c'ajc”. Che' yom mi la' subeñob, che'en lac Yum.