Isaias 9 - Chol: I T’an Dios

Mi caj i yilan pañimil Mesías

¹ Pero mi caj i lajmel jini wocol. Anto lac pijtaya. Isujm, Dios mi caj i choc tilel castigo ba'an Galilea, i lum Zabulón yic'ot i lum Neftalí, pero ti wi'il bʌ q'uin tac mi caj i ñuc'an jini lum Galilea ti junwejl Jordán ja' c'ʌlʌl ti' ti' colem ñajb.

² Jini winicob tsa' bʌ ajniyob ti ic'yoch'an bʌ pañimil mi caj i q'uelob colem c'ajc. Mi caj i c'ʌlʌl c'otel i c'ʌc'al ba' chumulob winicob woliyo' bʌ ti bʌq'uen ame chʌmicob ti ic'yoch'an bʌ pañimil.

³ C Yum lojon, mi caj a cha' otsan Israel ti ñuc. Mi caj a cha' aq'ueñob i tijicñʌyel i pusic'al. Tijicña mi caj i yubiñob che' bajche' winicob ti' yorajlel c'ajbal, che' bajche' winicob mu' bʌ i t'oxbentelob chubʌ'añʌl che' mi' mʌlob ti guerra.

^4-5 Come Dios mi caj i ts'oc jini cadena tac mu' bʌ i cʌch i cha'año' bʌ. Mi caj i c'ʌs jini asiyal mu' bʌ i jats'ob che' bajche' tsi' jisʌbe i p'ʌtʌlel Madián ti' tojlel Gedeón. Come wen tijicña mi caj i yajñel pañimil ba' ora mi' lajmel guerra. Mi caj i laj jilel ti c'ajc pejtelel e'tijibʌl cha'an guerra, yic'ot pejtelel i pislelob pʌjq'uenticax ti ch'ich'.

⁶ Come mi caj i yilan pañimil alʌ ch'iton cha'an mi' coltañonla. Dios mi caj i yʌq'ueñonla i yalobil. Mi caj i yotsʌbentel i c'aba': C'ax Ñuc Bʌ, Caj Cʌntesa, P'ʌtʌl bʌ Dios, Lac Tat Am Bʌ ti Pejtelel Ora, Xlajmesaleto mu' bʌ i cha'len yumʌl.

⁷ Mi caj i ñuc'an i yumʌntel David. Mach jilic i yumʌntel ti pejtelel ora. Ñoj ñʌch'ʌl i yumʌntel. Xuc'ul mi caj i yajñel come uts'at mi caj i cha'len yumʌl ti pejtelel ora. Mi caj i p'ojlesan chuqui uts'at yic'ot chuqui toj ti pejtelel pañimil. I Yum Panchan yic'ot Pañimil mi caj i jolotesan che' bajche' tsi' yʌlʌ.

Mi caj i jisʌntel Samaria

^8-10 Lac Yum tsa'ix i choco majlel i t'an ti' tojlel israelob. Tsa' c'oti i taj jini chumulo' bʌ ti Samaria, jiñʌch Efraín. Mi caj i jultesʌbeñob i pusic'al cha'an ti' caj tsi' chañ'esayob i bʌ. Woli' lon alob: Anquese tsa'ix yajli jini otot tac, anquese jisʌbilix lac lumal, ñumen uts'at mi caj lac cha' wa'chocon. Tsa'ix sejq'ui jini sicómoro te', pero mi caj lac cha' pʌc' puru ch'ujte' ti' q'uexol sicómoro, lon che'ob.

^11-12 Jini cha'an lac Yum mi caj i pʌy tilel siriajob ch'oyolo' bʌ ba' mi' pasel q'uin, yic'ot filisteojob ch'oyolo' bʌ ba' mi' bʌjlel q'uin. Mi caj i jisañob israelob. Anquese cabʌl mi caj i yubiñob wocol jini israelob, maxto lajmic i mich'ajel Dios. Sʌts'ʌl to i c'ʌb cha'an mi' contrajiñob.

¹³ Anquese cabʌl i wocol, ma'anic mi caj i peq'uesañob i bʌ cha'an mi' sutq'uiñob i bʌ ba'an i Yum Panchan yic'ot Pañimil.

^14-15 Jini cha'an ti jump'ejl jach q'uin lac Yum mi caj i jisan jini año' bʌ i ye'tel ti Israel yic'ot jini payxo bʌ x'alt'añob che' bajche' mi' sejq'uel te' yic'ot pejtel i c'ʌb.

¹⁶ Come jini yumʌlob cabʌl mi' socob winicob x'ixicob. Mi' yʌc'ob ti asiyel jini gobierno.

¹⁷ Jini cha'an lac Yum ma'anic mi' p'untan jini ch'iton winicob. Ma'anic mi' p'untan meba' x'ixicob yic'ot meba' alʌlob, come ti pejtelelob mi' cha'leñob lot. Leco jax i t'an. Jini cha'an maxto lajmic i mich'ajel lac Yum. Sʌts'ʌl to i c'ʌb cha'an mi' contrajiñob.

¹⁸ Lac Yum mi caj i jisan ti c'ajc pejtelel jontolil che' bajche' mi' pulel ch'ixol yic'ot stsajatuñol yic'ot mate'el. Bʌbʌq'uen i buts'il jini c'ajc.

^19-20 Jini pañimil mi caj i yic'an cha'an i mich'ajel i Yum Panchan yic'ot Pañimil. Mi caj i jilelob ti c'ajc winicob x'ixicob. Ma'anic majch mi' p'untan i pi'ʌl. Ti pejtelelob mi' contrajiñob i bʌ. Mi' chilbeñob i bʌ i waj, pero mach ñaj'acob. Mi caj i c'uxbeñob i bʌc'tal i yalobilob cha'an wi'ñayob.

²¹ Manasés yic'ot Efraín mi caj i contrajiñob i bʌ. Ti cha'mojtlel mi caj i contrajiñob Judá. Anquese cabʌl mi' p'ojlel i wocol, mach lajmic i mich'ajel lac Yum. Sʌts'ʌl to i c'ʌb cha'an mi' tic'lañob.