Isaias 66 - Chol: I T’an Dios

Ti' contra jini payxo bʌ ch'ujutesaya

¹ Lac Yum tsi' yʌlʌ: Jini panchan jiñʌch c buchlib. Jini pañimil jiñʌch i yajñib coc. ¿Baqui mi caj la' wa'chocobeñon cotot? ¿Baqui mi caj la' melbeñon c chumlib ba' mij c'aj co?

² Pejtelel iliyi joñon tsac mele yic'ot j c'ʌb. Tsa' jach caji ti ajñel cha'an jach com, che'en lac Yum. Majqui jach uts i pusic'al mi caj j q'uel ti uts'at. Che' ju'sʌbilix i pusic'al mi' bʌc'ñañon, mi' jac'beñon c t'an.

³ Mach uts'atic mij q'uel jini mu' bʌ i bajñel yajcan i bijlel, mu' bʌ i mel bajche' jach yom i bajñel pusic'al. Che' mi' tsʌnsʌbeñon tat wacax lajalʌch tic wut bajche' jini mu' bʌ i tsʌnsan winic. Che' mi' tsʌnsan tiñʌme' lajalʌch bajche' jini mu' bʌ i c'ʌsben i bic' ts'i'. Che' mi' yʌq'ueñon i wut jam tic majtan lajalʌch bajche' i ch'ich'el chitam. Che' mi' pulbeñon pom junlajal mij q'uel yic'ot jini mu' bʌ i ch'ujutesan dioste' tac. Jini mu' bʌ i bajñel yajcañob i bijlel mi' mulañob i mel chuqui tac ts'a'lebil c cha'an.

⁴ Tsa'ix c yajcʌbeyob i wocol mu' bʌ caj c chocbeñob tilel. Chuqui tac mi' bʌc'ñañob mi caj c chocbeñob. Come ma'anic tsi' jac'beyoñob che' bʌ tsac pʌyʌyob. Che' bʌ tsac cha'le t'an ma'anic tsi' ñich'tayob. Tsi' cha'leyob jontolil ti' tojel c wut. Tsi' yajcayob i mel chuqui tac mic ts'a'len.

I coltʌntel jini mu' bʌ i ñopob

⁵ Ubinla c t'an pejteleletla mu' bʌ la' bʌc'ñañon, mu' bʌ la' jac'beñon c t'an. La' pi'ʌlob mi' ts'a'leñetla. Mi' choquetla loq'uel ti' tojlelob cha'an c'ux mi la' wubin j c'aba'. Mi' wajleñetla: “La' i pʌs i ñuclel lac Yum. La' ñuc'ac la' pusic'al ti lac Yum”, che'ob. Pero mi caj i yʌjq'uelob ti quisin, che'en lac Yum.

⁶ ¿Chucoch ju'ucñayob ti t'an ya' ti tejclum? Ubinla t'an ya' ti Templo. Jiñʌch i t'an lac Yum. Woli' yʌq'ueñob i toj i mul i contrajob.

⁷ Ti pejtelel ora c'ʌlʌl wʌle ma'anic ba' ubibil lac cha'an iliyi. Che' maxto i cha'le bajq'uel x'ixic, ¿mejl ba i yʌc' alʌl ti pañimil? Isujm, che' maxto anic woli ti c'oj'ol mi caj i q'uel pañimil ch'iton bʌ i yalobil.

⁸ Ma'anic ba' q'uelbil lac cha'an. Isujmʌch jump'ejl tejclum mi caj i yilan pañimil ti jump'ejl jach q'uin. Bajc'ʌl mi caj i ñopob Dios ti ora. Che' bʌ maxto anic tsa' caji ti bajq'uel Sion, mi caj i bʌc' ac' ti pañimil i yalobil.

⁹ Joñon mi cʌc' ti cʌntʌntel alʌl. Joñon mi cʌc' ti lotol che' i yorajlelix mi' q'uel pañimil. Che' ja'el mi caj cʌc' ti pañimil cabʌl calobilob ti Sion, che'en lac Yum Dios.

¹⁰ Yom tem tijicñayetla yic'ot Jerusalén. La' ñuc'ac la' pusic'al pejteletla mu' bʌ la' c'uxbin. Wen tijicñayetla pejteletla tsa' bʌ la' wuc'ta.

¹¹ Yom tijicñayet che' bajche' alʌl che' cabʌl i ya'lel i chu' mu' bʌ i tsu'san. Che'ʌch i ñuclel Jerusalén. Yom temel mi la' ñaj'an yic'ot jini ya' bʌ chumulob, come ya' mi' p'ojlel pejtel chuqui wen.

¹² Come woli' yʌl lac Yum: Mi caj cʌq'ueñob cabʌl i ñʌch'tʌlel che' bajche' i yonlel colem ja'. Mi caj cʌq'ueñob i ñuclel ti' tojlel pejtelel tejclum tac. Mi caj i cuchbeñob tilel i chubʌ'an Sion che' bajche' i yonlel colem ja' che' mi' bujt'el. Mi caj i we'sañetla. Mi caj i meq'uetla, mi caj i xixbañetla ti' pix.

¹³ Che' bajche' mi' xixban i yalobil x'ixic, che'ʌch mi caj c tijicñesañetla ja'el. Ya' ti Jerusalén tijicña mi caj la' wubin.

¹⁴ Che' mi la' q'uel iliyi, tijicña la' pusic'al mi caj la' wubin. La' bʌc'tal mi caj i tsijibʌyel che' bajche' pimel. Che' jini lac Yum mi caj i yʌc' ti cʌjñel i p'ʌtʌlel ti' tojlel jini x'e'telob i cha'an. Che' ja'el mi caj i yʌc' ti cʌjñel i mich'ajel ti' tojlel i contrajob.

¹⁵ Come lac Yum mi caj i tilel yic'ot c'ajc. Mi caj i choc tilel wocol che' bajche' p'ʌtʌl bʌ ic' cha'an mi' jisan i contrajob che' cʌlʌxix i mich'ajel che' bajche' i nich c'ajc.

¹⁶ Lac Yum mi caj i jisañob ti c'ajc yic'ot ti espada che' mi' melob ti' tojlel pejtel winicob. Cabʌlob mi caj i tsʌnsʌntelob cha'an lac Yum.

¹⁷ Temel mi caj i jilelob jini mu' bʌ i sʌq'uesañob i bʌ cha'an mi' ch'ujutesañob dioste' ya' ti ojlil pʌc'ʌbʌl joyol bʌ ti te', yic'ot jini mu' bʌ i c'uxbeñob i bʌc'tal chitam yic'ot tsuc yic'ot yan tac bʌ bʌte'el mach bʌ sʌquic. Ti junyajl jach, mi caj i laj jisʌntelob.

¹⁸ Come cʌmbil c cha'an i pensar yic'ot i melbal pejtelel winicob. Jini cha'an mi caj c tempan tilel pejtelel winicob yujilo' bʌ t'an ti chajp ti chajp. Mi caj i tilelob cha'an meloñel. Mi caj i q'uelob c ñuclel.

¹⁹ Mi caj cʌc' ti q'uelol i yejtal c p'ʌtʌlel. Mi caj c choc majlel ti yambʌ tejclum tac jini coltʌbilo' bʌ c cha'an mu' bʌ i loq'uelob ti uts'at che' mic cha'len meloñel. Mux caj i majlelob ti Tarsis, ti Put, ti Lud, ti Mesec, ti Ros, ti Tubal, yic'ot ti Grecia, yic'ot ya' ba'an jini chumulob ti' ti'il ñajb ba' mach wis ubibilic i cha'añob c t'an, ba' mach wis q'uelbilic i cha'añob c ñuclel. Mi caj i tsictesʌbeñob majlel c ñuclel ti pejtelel tejclum tac.

²⁰ Mi caj i lu' pʌyob tilel la' pi'ʌlob loq'uemo' bʌ ti pejtelel tejclum tac, i wenta i majtan lac Yum. Mi caj i sujtelob ti caballo, ti carreta, yic'ot ti ab, yic'ot ti mula, yic'ot ti camello, ti ch'ujul bʌ wits ti Jerusalén, che'en lac Yum. C majtañʌch che' bajche' i wut jam tsa' bʌ i ch'ʌmbeyoñob tilel israelob cha'an mi' yotsañob tic Templo.

²¹ Mi caj cotsan lamital ti motomajob yic'ot ti levíjob, che'en lac Yum.

²² Jini tsiji' bʌ panchan yic'ot tsiji' bʌ pañimil mu' bʌ caj c mel, mi caj i chʌn ajñel ti pejtelel ora. Che' ja'el mi caj i chʌn ajñelob la' p'olbalob tic tojlel. Ma'anic mi caj i ñajʌyel la' c'aba'.

²³ Ti jujump'ejl uw ti' q'uiñilel tsiji' bʌ uw, ti jujump'ejl semana ti q'uiñilel c'aj o, mi caj i tilelob pejtelel winicob cha'an mi' ñocchocoñob i bʌ tic tojlel.

²⁴ Che' mi' cha' majlelob, mi caj i q'uelbeñob i bʌc'tal jini chʌmeño' bʌ tsa' bʌ i ñusayob c t'an. Mach chʌmic i motso' ti pejtelel ora. Mach yajpic jini c'ajc mu' bʌ i pulob. Ts'a' mi caj i q'uelob pejtel winicob, che'en lac Yum.