Isaias 65 - Chol: I T’an Dios

I castigo jini xñusat'añob

¹ Lac Yum tsi' yʌlʌ: Tsa cʌc'ʌ c bʌ ti cʌjñel i cha'an jini mach bʌ anic tsi' c'ajtiyoñob. Tsi' tajayoñob jini mach bʌ anic tsi' sʌclayoñob. Tsac subeyob jini mach bʌ i cʌñʌyoñobic: “Um ba' añon. La'la”, cho'on.

² Pero ti pejtelel q'uin wolic chʌn pʌy c cha'año' bʌ. Tsi' ñusayob c t'an. Tsi' tsajcayob i bijlel jontolil yic'ot chuqui tac jach yomob.

³ Mi' chʌn xic'oñob ti mich'ajel, come ñʌmʌlob ti dioste' tac. Mi' ch'ujutesañob ti pʌc'ʌbʌl. Mi' pulbeñob pom ti pulʌntib melbil bʌ ti ladrillo.

⁴ Ti ac'ʌlel mi' majlelob ba'an mucoñibʌl yic'ot ch'en tac cha'an mi' ch'ujutesañob xibajob. Mi' tsʌnsʌbeñob chitam cha'an mi' c'uxob i bʌc'tal yic'ot yambʌ tic'bil tac bʌ i bʌl i ñʌc'.

⁵ Mi' lon subeñob i bʌ: “Cʌlen ya'i, mach a tʌlon, come wen sʌcon. Bibi'et”, che'ob. Jini winicob mi' techbeñoñob c mich'ajel.

⁶ Ts'ijbubil pejtelel iliyi ba' q'uelel c cha'an. Mach ñʌch'ʌlic mi caj j cʌytʌl. Mi caj j q'uextʌbeñob i mul.

⁷ Mi caj i tojob i mul, yic'ot i mul i tatob. Come junlajal tsi' puluyob pom ti wits. Tsi' ts'a'leyoñob ti bujbujtʌl. Jini cha'an mi caj cʌq'ueñob i toj i mul. Che' bajche' an i melbalob, che'ʌch mi caj c p'isbeñob i wocol.

Lac Yum mi' wen coltan jini toj bʌ, pero mi' jisan jini xnusat'añob

⁸ Lac Yum woli' yʌl: Ma'anic mi caj c laj jisañob, come mach junlajalobic. Mi caj c yajcañob che' bajche' mi la' yajcan ts'usub ya' ti ts'usubil ba' xʌbʌl uts'at bʌ ts'usub yic'ot mach bʌ uts'atic. Mi' la' wʌl: “Mach ma' wʌc' ti sajtel jini wen bʌ, come añʌch i c'ʌjñibal lac cha'an”, che'etla. Che'ʌch mi caj c mel ti' tojlel israelob. Ma'anic mi caj c lu' jisañob come c'ux mi cubin c winicob.

⁹ Mi caj cʌc' ti p'ojlel i p'olbalob Israel. Mi' cajelob ti chumtʌl ti ch'ujul bʌ wits ti Judá jini yajcʌbilo' bʌ c cha'an. I cha'añobix mi' majlel jini lum. Ya' mi caj i yajñelob x'e'telob c cha'an.

¹⁰ Pejtelel jini joctʌl ti Sarón mi caj i sujtel cha'an i buc'ujib tiñʌme'. Jini joctʌl ti Acor mi caj i yochel cha'an i potrero wacax. I cha'añobʌch jini winicob mu' bʌ i sʌclañoñob.

¹¹ Pero jatetla mu' bʌ la' tʌts' la' bʌ tic tojlel, mu' bʌ la' ts'a'len jini Templo, mu' bʌ la' ch'ujutesan jini dios Gad, yic'ot jini dios Meni,

¹² mi caj cʌq'uetla ti tsʌnsʌntel ti espada. Ti la' pejtelel mi caj la' majlel ti tsʌnsʌntel. Come che' bʌ tsac pʌyʌyetla, ma'anic tsa' la' jac'beyon. Che' bʌ tsac pejcayetla, ma'anic tsa' la' wubiyon. Tsa' la' mele jontolil ti' tojel c wut. Tsa' la' yajca chuqui tac ts'a'lebil c cha'an.

¹³ Jini cha'an lac Yum Dios woli' subeñetla: Q'uelela c winicob. Mi caj i tajob chuqui mi' c'uxob, pero jatetla mi caj la' wubin wi'ñal. P'isi ti la' wenta. Jini c winicob mi' cajelob ti uch'el, pero jatetla mi caj la' wubin tiquin ti'. Ña'tanla, tijicña mi caj i yubiñob c winicob, pero jatetla mi caj la' wubin quisin.

¹⁴ Q'uelela c winicob. Mi caj i cha'leñob c'ay cha'an i tijicñʌyel i pusic'al, pero jatetla mi caj la' cha'len oñel. Mi caj la' cha'len uq'uel cha'an ch'ijiyem la' pusic'al, come ma'anic la' coltʌntel.

¹⁵ Mi caj i ña'tintel la' c'aba' che' bajche' p'ajoñel ti' tojlel jini yajcʌbilo' bʌ c cha'an, che'en. Lac Yum Dios mi caj i yʌq'uetla ti tsʌnsʌntel. Pero mi caj i yotsʌbeñob yambʌ i c'aba' jini x'e'telob i cha'an.

¹⁶ Majqui jach yom i tajben i yutslel Dios ti jini lum mi caj i wa'chocon i t'an ti' c'aba' jini isujm bʌ Dios, come ma'anix i ña'tʌntel wocol am bʌ ti yambʌ ora. Yajpemix tic wut a mul, che'en.

Tsiji' bʌ panchan yic'ot pañimil

¹⁷ La' wilan wolic mel tsiji' bʌ panchan yic'ot tsiji' bʌ pañimil. Ma'anic mi caj i chʌn ña'tʌntel jini tsa'ix bʌ ñumi. Ma'anix majch mi caj i chʌn c'ajtesan.

¹⁸ La' ñuc'ac la' pusic'al ti pejtelel ora. Yom tijicñayetla cha'an pejtel jini woli bʌ c mel. Tijicña mi caj c cha' mel Jerusalén. Tijicña mi caj i yubiñob jini ya' bʌ chumulob.

¹⁹ Joñon ja'el tijicña mi caj j q'uel Jerusalén. Tijicña mi caj j q'uel jini ya' bʌ chumulob. Ma'anix mi caj i chʌn ubintel uq'uel yic'ot oñel.

²⁰ Ya'i ma'anix mi' chʌmelob alʌlob, mi jinic winic maxto bʌ ñoxobic. Mi an mu' bʌ i chʌmel che' an jo'c'al i jabilel, ch'iton to mi' chʌmel. Jini xmulil mu' bʌ i taj jo'c'al i jabilel che' mi' chʌmel cha'an i mul, ch'iton to mi' chʌmel.

^21-22 Winicob mi caj i wa'chocoñob i yotot. Ya'i mi caj i chumtʌlob. Ma'anic majch mi caj i chilbeñob. Che' mi' pʌc'ob ts'usubil, mi caj i c'uxbeñob i wut. Ma'anic majch mi caj i xujch'ibeñob. Mi caj i tam'añob i jabilel che' bajche' i jabilel colem te'. Tijicñayob jini yajcʌbilo' bʌ c cha'an, come i cha'añobʌch pejtelel i wut i ye'tel.

²³ Mach lolomic jach mi caj i cha'leñob e'tel. Mach cha'anic wocol mi caj i cosañob i yalobilob, come junlajalob i yalobilob yic'ot i tatob. I p'olbalobʌch jini coltʌbilo' bʌ i cha'an lac Yum.

²⁴ Mi caj i yujtel che' maxto cajic i pʌyoñob, joñon mi caj c jac'beñob. Che' woliyob to ti t'an, mi caj cubiñob.

²⁵ Jini bʌte'el ts'i' yic'ot tiñʌme' temel mi caj i cha'leñob buc'bal. Jini bajlum mi caj i c'uxe' jam che' bajche' wacax. Jini lucum am bʌ i veneno ma'anix mi caj i c'ux winicob. Ya' ti ch'ujul bʌ c wits ma'anic majch mi caj i tic'lan i pi'ʌl. Ma'anic majqui yujil jisaya, che'en lac Yum.