Isaias 58 - Chol: I T’an Dios

Jini mero isujm bʌ ch'ajb

¹ Cha'len c'am bʌ oñel. Mach a cha'len bʌq'uen. Cha'len t'an che' bajche' trompeta. Tiq'ui c cha'año' bʌ cha'an i mul.

² Ti jujump'ejl q'uin mi' sʌclañoñob yilal. Tijicñayob cha'an cʌntesʌbilob tic bijlel. Mi' lon pʌsob i bʌ che' bajche' winic toj bʌ i melbal xuc'ul bʌ i pusic'al quic'ot. Mi' c'ajtibeñoñob i cʌntesʌntel ti mandar. Tijicñayob mi' ñochtañoñob.

³ Mi' subeñoñob: Lolom jach mic cha'len lojon ch'ajb. Cʌxti muq'uic a q'uel. ¿Chucoch mic lon tic'lan c bʌ ti cabʌl wocol che' ma'anic ma' p'ison lojon ti wenta? che'ob. Pero ti' q'uiñilel ch'ajb mi la' mel chuqui mi la' bajñel ña'tan ti la' pusic'al. Mi la' to'ol c'ʌn ti wocol e'tel jini x'e'telob la' cha'an.

⁴ Ti' yorajlel ch'ajb mi la' cha'len a'leya. Mi la' cha'len jats' cha'an jontol la' pusic'al. Che' mi la' lon cha'len ch'ajb ma'anic chuqui mi la' c'ajtibeñon ti wocol t'an cha'an mi cubin ya' ti panchan.

⁵ ¿Tsa' ba c subeyetla cha'an mi la' cha'len ch'ajb che' bajche' iliyi? ¿Uts'at ba mij q'uel che' ma' lij a bʌ che' bajche' ac', che' ma' lʌp coxtal, che' ma' wʌc' ti a pam i tinil c'ajc? ¿Jimba iliyi i q'uiñilel ch'ajb mu' bʌ c mulan? Mach jinic.

⁶ Jini ch'ajb mu' bʌ c mulan jiñʌch che' ma' cʌy a tic'lan a pi'ʌlob. Yom ma' mel chuqui uts'at ti' tojlel x'e'telob a cha'an. Ac'ʌ ti colel jini woli bʌ i yubiñob i tic'lʌntel. Tuc'u cadena tac mu' bʌ' i cʌchet.

⁷ Yom ma' t'oxbeñob i bʌl a ñʌc' jini wi'ñayo' bʌ. Pʌyʌ ochel ti a wotot jini mach bʌ anic i yotot. Aq'ueñob i pislel jini mach bʌ añobic i cha'an. Mach yomic ma' mujcun a bʌ che' mi' tilelob i c'ajtin chuqui yomob a pi'ʌlob jump'ejl bʌ a tat a ña'.

⁸ Mi che'ʌch ma' cha'len ch'ajb bajche' iliyi, mi caj cʌc' ti wen lejmel a c'ʌc'al che' bajche' i sʌclel pañimil che' ti sʌc'ajel. Mi caj cʌc' ti lajmel a chʌmel. Mi caj i tsictiyel toj bʌ a pusic'al baqui jach ma' majlel. Mi caj j cʌntañet majlel. Joñon a Yumon.

⁹ Che' jini mi caj a pejcañon. Mi caj c jac'beñet. Mi caj a c'ajtibeñon a coltʌntel. Mi caj c subeñet: “Wʌ'ʌch añon”, cho'on. Cʌyʌ a tic'lan a pi'ʌlob. Cʌyʌ a'leya yic'ot jop't'an.

¹⁰ T'oxbeñob a waj jini wi'ñayo' bʌ. Coltan jini woli bʌ ti c'oj'ol yic'ot jini mach bʌ añobic i chubʌ'an. Che' jini mi' caj a wubin i tijicñʌyel a pusic'al. Lajalet bajche' c'ajc ya' ba' ic'yoch'an. Mi' caj ti sʌc jilel a wocol che' bajche' axñal ti xinq'uiñil.

¹¹ Ti pejtelel ora mi caj c toj'esañet majlel. Mi caj cʌq'ueñet i bʌl a ñʌc' ya' ba' tiquin pañimil. Mi caj c tsijibtesan a p'ʌtʌlel. Lajal mi caj a wajñel che' bajche' pʌc'ʌbʌl mulbil bʌ ti ja', che' bajche' i loq'uib ja' mach bʌ anic mi' tiquin.

¹² A walobilob mi caj i cha' wa'chocoñob jini tejclum tac tsa' bʌ jejmi ti yambʌ ora. Mi caj i cha' ña'tañob i cʌntesʌbal i ñojte'elob tsa' bʌ cʌq'ueyob. Mi caj a cʌjñel che' bajche' jini wen yujil bʌ i wa'chocontel ts'ajc che' jejmen. A wujil i cha' melol bij.

¹³ Mi ñuc ma' q'uel i q'uiñilel c'aj o, mi ma'anic ma' mel chuqui ma' bajñel ña'tan a mel, mi tijicña ma' q'uel i q'uiñilel caj o che' ma' wʌc'on ti c'uxbintel, mi muc'ʌch a quep cʌy a we'tel, yic'ot jini mu' bʌ i bajñel mulan a pusic'al, yic'ot to'ol t'an cha'an ma' wʌc' ti ñuc jini q'uin,

¹⁴ che' jini mi caj a taj a tijicñʌyel tic tojlel. Mi caj cʌq'ueñet a p'ʌtʌlel cha'an mi' mʌjlel a cha'an ti' tojlel cabʌl tejclum tac. Mi caj cʌq'ueñet a ch'ʌmben pejtel jini tijicña bʌ tsa' bʌ c wʌn sube Jacob. A Yumon. Tsa'ix c subeyet. Che' tsi' yʌlʌ lac Yum.