Isaias 56 - Chol: I T’an Dios

I tijicñʌyel mu' bʌ i jac' xuc'ul bʌ i t'an Dios

¹ Jiñʌch woli bʌ i yʌl lac Yum: Melela chuqui toj yic'ot chuqui uts'at, come wolix i lʌc'tiyel i yorajlel cha'an mij coltañetla. Mi caj j coltañetla ti ñuc bʌ c p'ʌtʌlel ti' tojlel la' contrajob.

² Tijicña jini winic mu' bʌ i xuc'chocon i bʌ ti' melol pejtelel c mandar, mu' bʌ i p'is ti' wenta i q'uiñilel c'aj o, mu' bʌ i chʌcʌ tsajin i bʌ cha'an ma'anic mi' mel jontolil.

³ Che' mi' ñop lac Yum jini ch'oyol bʌ ti yambʌ lum, mach yomic mi' lon al: “Parte mi' yʌc'on lac Yum, parte mi' yʌc' i cha'año' bʌ”. Jini winic mach bʌ mejlic i cha'len ñujpuñel mach che'ic yom mi' ña'tan, come c cha'añʌch ja'el.

⁴ Jini winic mu' bʌ i p'is ti' wenta i q'uiñilel c'aj o, mu' bʌ i mel jini com bʌ, mi xuc'ul mi' yajñel ti trato bʌ c t'an,

⁵ an chuqui wen uts'at mi caj cʌq'uen anquese ma'anic i yalobil. Mi caj i c'uxbintel i c'aba' ti mal cotot ti pejtelel ora. Mi caj cʌq'uen i c'aba' mach bʌ yujilic jilel, yic'ot mach bʌ yujilic yajpel.

⁶ Che'ʌch ja'el jini ñajt bʌ ch'oyolob mu' bʌ i ñopoñob, mu' bʌ i yʌc'ob i bʌ cha'an mi' c'uxbiñon, cha'an mi' yochel ti x'e'telob c cha'an. Mi tsi' p'isiyob ti wenta i q'uiñilel c'aj o, mi xuc'ulob mi' yajñelob ti trato bʌ c t'an,

⁷ mi caj c pʌyob tilel ti ch'ujul bʌ c wits ya' ti Jerusalén. Tal i yorajlel, mi caj cʌq'uen i tijicñʌyelob i pusic'al ti' yotlel oración ba' mi' pejcañoñob. Mi caj c ch'ʌmbeñob i yofrenda yic'ot pulbil bʌ c majtan ja'el, come jini cotot mi caj i pejcʌntel ti' yotlel oración i cha'an winicob x'ixicob ti pejtelel lum tac.

⁸ Che'ʌch woli' yʌl lac Yum Dios mu' bʌ caj i cha' much'quin jini israelob ba' pam pujquemob. Mi caj c pʌy tilel yaño' bʌ ja'el mach bʌ israelobic, che'en lac Yum.

I tic'ol jontol bʌ xcʌntaya

⁹ Pejtelel bʌte'el, la'la ti jisaya. La' jisan c tejclum.

¹⁰ Come laj xpots'ob jini xcʌntayajob, jini x'alt'añob tic tejclum. Ma'anic chuqui mi' q'uelob. Lajalob bajche' uma' bʌ ts'i' mach bʌ yujilic woj, met wʌyʌlob jach bʌ. Mi' wen mulañob wʌyel. Ma'anic mi' ña'tañob che' an bʌbʌq'uen bʌ ti' tojlel c tejclum.

¹¹ Lajalob bajche' wi'ñal bʌ ts'i' mach bʌ muq'uic i ñaj'an. Ma'anobic i pusic'al jini xcʌnta tiñʌme'ob. Ti jujuntiquilob mi' bajñel ña'tañob chuqui yomob. Mi' bajan sʌclañob i wenlel.

¹² Mi' yʌlob: Conla c sʌclan vino cha'an mi lac yʌc'an. Ijc'ʌl mux lac cha' mel che' bajche' wʌle, pero ñumeñix, che'ob.