Isaias 55 - Chol: I T’an Dios

I yʌc'bal lac Yum

¹ Yom ma' jal'an jumuc', majqui jach an i tiquin ti'. La' tilic i jap ja' mu' bʌ cʌc'. Jini mach bʌ añobic i taq'uin, la' tilicob i c'ux waj i jap vino yic'ot lech ti' majtan jach.

² ¿Chucoch mi la' to'ol jisan la' taq'uin ti' mʌñol jini mach bʌ wajic? Woli ti to'ol jilel la' taq'uin che' wi'ñayetla. Ñich'tanla c t'an. Che' jini mi caj la' c'ux wen bʌ i bʌl la' ñʌc'. Mi caj la' tijicñesan la' pusic'al yic'ot sumuc tac bʌ i bʌl la' ñʌc'.

³ La'la ba' añon. Ubinla c t'an. Ñich'tañonla cha'an chʌn cuxul mi la' wajñel. Mi caj c mel xuc'ul bʌ t'an la' wic'ot. Mi caj c p'untañetla. C'ux mi cubiñetla che' bajche' tsaj c'uxbi David.

⁴ Tsac wa'choco David ti testigo ti' tojlel c tejclum. Tsac wa'choco ti yumʌl yic'ot ti xcʌntesaya ti' tojlel cabʌl tejclum tac mach bʌ la' pi'ʌlobic.

⁵ Jatet ja'el mi caj a pʌybeñon tilel yambʌ tejclumob mach bʌ i cʌñʌyoñobic, yic'ot yaño' bʌ winicob mach bʌ a pi'ʌlobic. Ajñel mi caj i tilelob ba' añet cha'an mi' cʌñob a Yum Dios, jini Ch'ujul Bʌ ti Israel, come tsa'ix i ñuq'uesayet.

⁶ Sajcanla lac Yum che' mu' to mejlel ti tajtʌl. Pʌyʌla che' lʌc'ʌl to an.

⁷ La' i cʌy i mul jini xjontolil. Jini mach bʌ tojic la i cʌy i ña'tan jontolil. La' i sutq'uin i bʌ ti lac Yum, come mi caj i p'untan. Mi caj i ñusʌben i mul ti pejtelel i pusic'al.

⁸ Come mach lajalic mi la' ña'tan bajche' wolic ña'tan. Mach lajalic la' bijlel bajche' c bijlel, che'en lac Yum.

⁹ Wen chan jini panchan. Mach la' tajayic i chanlel. Che' ja'el c bijlel ñumen chan bajche' la' bijlel. Mic ts'ʌctesan pejtel mu' bʌ c ña'tan c mel. Mach mejlic la' ch'ʌmben i sujmlel jini mu' bʌ c ña'tan.

¹⁰ Jini ja'al yic'ot i ña'al tsʌñal mi' yajlel tilel ti panchan. Ma'anix mi' chʌn sujtel. Mi' laj ch'ʌch' jini lum. Che' ach'ix jini lum mi' colel pʌc'ʌbʌl. Mi' yʌc' i wut. Mi' cha'leñob pac' winicob cha'an mi' tajob chuqui mi' c'uxob.

¹¹ Che'ʌch ja'el c t'an mu' bʌ c sub. Mach lolomic jach. Mach to'o sujtic. Mi' mel chuqui tac com. Mi' jolontesan i ye'tel tsa' bʌ cʌq'ue i mel.

¹² Mi caj la' wajñel ti' tijicñʌyel la' pusic'al yic'ot ti la' ñʌch'tʌlel. Jini wits yic'ot bujtʌl tac mi' cajel ti c'ay yubil ti' tojel la' wut. Jini te' tac mi caj i jats'ob i c'ʌb cha'an tijicña pañimil.

¹³ Ya' ba' tsa' coli ch'ix mi caj i colel taj. Ya' ba' tsa' coli ich'ite' mi caj i colel mirto te'. Ti pejtelelob mi caj i subob i ñuclel i c'aba' lac Yum. Mi caj i yʌc'ob ti cʌjñel lac Yum ti pejtelel ora.